“Eci ame nda kala omõla, huvange wa enda oku ndi tata lãvi poku ndi veta kuenda oku ndi popia lãvi. Noke yoku kuela, ndatembo yange wa enda oku ndi veta. Eye lulume waye va enda oku ndi tata ndupika. Noke nda kuata ovisimĩlo vioku liponda.”—Madh, a wo ko India.

 “Ocisoko Cuhayele Voluali Luosi, ca lekisa okuti: “Akãi oku tatiwa lungangala voluali luosi kua siata oku livokiya calua.” Ekonomuiso lia lingiwa lia lekisa okuti, pokati kakãi vatatu umosi o tatiwa lungangala, ale oku putuiwa.

 Nda ocitangi caco ca pita ale love, citava okuti ku kolipo kuenda o kuata ohele kocitumãlo kuosi wenda omo lioku tatiwa lungangala ale oku putuiwa. Noke o fetika oku sima okuti omanu valua va sima okuti ‘Akãi ka va kuete Esilivilo.’ Pole, anga hẽ Suku wa kapako muẽle akãi?

 Ocisonehuwa: “[Suku] wa va lulika ulume lukãi.—Efetikilo 1:27.

 Elomboloko liaco: Suku wa lulika ulume kuenda ukãi. Eye o va tenda okuti vosi va sukila oku sumbiwa. Handi vali, Suku o lavoka okuti ulume o sola “ukãi waye ndeci a li sole eye muẽle,” okuti ka lavulula ovina viosi ukãi a linga, oku u popia lãvi ale oku u tata lungangala. (Va Efeso 5:33; Va Kolosai 3:19) Ocili okuti, oku teyuila akãi ku kuete esilivilo lialua ku Suku.

 “Eci nda kala omõla vamue pokati kepata liange va enda oku lipekela lame. Eci nda tẽlisa 17 kanyamo, cime cange wa ndi sapuila okuti nda sia tavele oku lipekela laye ndi tundisiwa kupange. Eci nda linga ukulu, ulume wange, olonjali kuenda omanu posongo ka va ndi sumbilile. Pole, nda lilongisa ovina vialua viatiamẽla ku Yehova, Ululiki. b Eye wa sumbila calua akãi. Eci ci ñuatisa oku limbuka okuti eye o ndi sole calua kuenda ndi kuete esilivilo kovaso aye.”—Maria, wo ko Argentina.

 Ocisonehuwa: “Kuli ekamba limue li kakatela okuti, manjove ketimba ci sule.”—Olosapo 18:24.

 Elomboloko liaco: Ekamba liocili li pondola oku ku kuatisa. Nda o sukila ekuatiso, situluila ovisimĩlo viove komunu umue ove wa kolela.

 “Vokuenda kueci ci soka 20 kanyamo, sia la situluila omunu laumue okuti nda putuiwile. Eci ca ndi kokela oku pua esanju, oku kuata asakalalo kuenda esumue. Pole, eci nda situluila omunu umue ocitangi caco, nda kavuluisiwa calua.”—EElif, wo ko Türkiya.

 Ocisonehuwa: “Osimbu vu yeki ku [Suku] asakalalo ene osi, momo eye o vu tati.”—1 Petulu 5:7.

 Elomboloko liaco: Eci o likutilila ku Suku, eye o yeva ohutililo yove. (Osamo 55:22; 65:2) Momo eye o ku tata kuenda o ku kuatisa oku limbuka okuti, ove o kuete esilivilo kokuaye.

 “Eci nda fetika oku lilongisa ovina viatiamẽla ku Yehova, ca ndi kuatisa oku sakula apute ange ana a ndi kokelele esumuo lialua. Kaliye ndi pondola oku likutilila ku Suku loku u sapuila ndomo ndi liyevite. Eye o kasi ndekamba limue lia kũlĩha ciwa ovisimĩlo viange.”—Ana, wo ko Belize.

 Ocisonehuwa: “A Yehova. . . ove o ka lingila esunga vana ka va kuete isia kuenda vana va talisiwa ohali, oco okuti omunu wa pangiwa loneketela lalimue eteke a va kokela vali usumba.”—Osamo 10:17, 18.

 Elomboloko liaco: Suku o ka malako ekambo liosi liesunga, oku kongelamo ungangala wa siata oku lingiwa kakãi.

 “Oku lilongisa okuti Yehova ndomo o kamalako ungangala wa siata oku lingiwa kakãi kuenda komãla vatito, ci kasi ndovihemba vi kavuluisa kokuange. Eci ci ndi kuatisa oku kuata ombembua yovutima.”—Roberta, wo ko Mesico.

 Oco o lilongise ovina vikuavo vi lekisa ndomo Embimbiliya lieca elavoko, esunga lieci o kolelela kolohuminyo vialio kuenda ndomo Olombangi Via Yehova via siata oku eca ekuatiso Liembimbiliya koloneke vilo, pinga oco va ku nyule ocali komunu una wa ku ĩha okokanda aka.

 Tapa ocipama caco.