Ndomo Suku a Tata Ocisitatũi
Koloneke vilo kuli eci ci 70 kolohuluwa viomanu ovisitatũi voluali luosi kuenda valua va sapela kueci ci soka 200 kalimi oku ilaika. Omanu valua ovisitatũi va siata oku tatiwa lãvi la vakuavo, ndomo ci lekisiwa vatosi a kuãimo:
“Voluali luosi ovihandeleko vi teyuila ovisitatũi olonjanja vialua ka via kapiwileko.”—Associação Nacional de Surdos (U.S.).
“Kolofeka vialua omanu ovisitatũi olohukũi calua, ka va kuete epuluvi lioku tanga, oku talavaya kuenda oku kũlĩha asapulo.”—Federação Mundial de Surdos.
Suku o tenda ndati omanu ovisitatũi? Nye Embimbiliya li popia catiamẽla kovisitatũi? Kuenda Olombangi Via Yehova via siata oku va kuatisa ndati koloneke vilo?
Ndomo Suku a Tenda Ovisitatũi
Embimbiliya lilombolola okuti Yehova a Suku wa kapako ocisitatũi. Eye o yongola okuti va tatiwa lesunga kuenda va kuatisiwa lepindiso eye a eca.
Ocisonehua: “Ku ka siñale omunu ocisitatũi.”—Ovisila 19:14.
Elomboloko: Ocihandeleko ca Yehova ko Isareli yosimbu ca teyuilile ocisitatũi.
Ocisonehua: “Suku hokuacameko.”—Ovilinga 10:34.
lomboloko: Yehova wa kapako omanu volofeka viosi, ekalo, alimi, oku kongelamo ovisitatũi.
Ocisonehua: “Yesu wa linga ungende . . . , oku kunda olondaka viwa Viusoma.”—Mateo 9:35.
Elomboloko: Yesu weyile palo posi oco a longise omanu catiamẽla Kusoma wa Suku kuenda eci owo u ka lingila omanu vosi—oku kongelamo ovisitatũi.—Mateo 6:10.
Ocisonehua: Toke muẽle Yesu wa situlula “ovatũi ovisitatũi kuenda vana va kuete onjanjo kelimi.”—Marko 7:37.
Elomboloko: Yesu wa lekisa eci Usoma wa Suku u ka linga eci ovisitatũi vi ka yeva kuenda oku vangula. Vepuluvi liaco, Yesu locisola wa linga olondimbukiso oco a sapele lulume ocisitatũi osimbu handi ko sakuile.—Marko 7:31-35.
Ocisonehua: “Ovatũi ovisitatũi a ka situluka.”—Isaya 35:5.
Elomboloko: Yehova wa eca ocitumasuku cokuti ovisitatũi vi ka yeva.—Isaya 29:18.
Ndomo Olombangi Via Yehova Via Siata Oku Kuatisa Ovisitatũi Koloneke Vilo
Olombangi Via Yehova vi kundila esapulo limue li eca elavoko kovisitatũi voluali luosi. Nye tua siata oku linga oco tu tẽlise upange waco? Tua panga Embimbiliya kuenda olovideo vielilongiso Liembimbiliya kueci ci pitãhala 100 kalimi oku ilaika. Tu longisavo Embimbiliya kuenda tua sokiya Olohongele kelimi lioku ilaika. Asokiyo aco osi a lingiwa ocali ku vana va yongola oku lilongisa catiamẽla ku Suku. Momo lie? Momo Yesu wa popia hati: “Wa tambuli ocali, ecivo ocali.”—Mateo 10:8.
Ove o pondola oku sanga ovina viaco vo Internet ale oku vi tapa vonumbi yi kuãimo:
JW.ORG. tioka ponepa elimi konele yondio oco o sange ulandu kelimi lioku ilaika o yongola.
JW Library Sign Language app. Kapa ocimalẽho eci ocali vo telefone yove oco o tẽle oku tapa ale oku tala olovideo kelimi lioku ilaika.
Ovimalẽhe Vipi Vioku Lilongisa Embimbiliya Tua Sokiya?
Embimbiliya kelimi lioku ilaika. Embimbiliya li Kola—Epongoluilo Lioluali Luokaliye kelimi lioku ilaika lio ko Amerika, olio Embimbiliya liatete lia sonehiwa liosi voluali luosi. Embimbiliya li Kola—Epongoluilo Lioluali Luokaliye liosi ale onepa yimue ño kelimi lioku ilaika lalimi akuavo, a siata oku vokiyiwavo unyamo lunyamo. (Oco o sange ulala walimi ale oco o tale Embimbiliya vo Internet, tala vokakasia “ Embimbiliya li Kola—Epongoluilo Lioluali Luokaliye Kelimi Lioku Ilaika.”)
Tala ovideo losapi, A Versão Completa da Tradução do Novo Mundo da Bíblia Está Disponível Em Língua de Sinais Americana, oco o lilongise ovina vikuavo via tiamẽla kupange woku pongolola Embimbiliya kelimi lioku ilaika.
Oco o lilongise vali Embimbiliya, kapa ocimalẽho JW Library Sign Language app. Ocimalẽho caco ci ku kuatisa oku nõla ovinimbu Viembimbiliya kelimi lioku ilaika.
Dmytro la Vita olonjali vimue okuti ovisitatũi kuenda omãla vavo va kasi oku va yevelela. Kũlĩhĩsa ndomo epata liavo li kuatisiwa poku tala eteke leteke Embimbiliya kelimi lioku ilaika.
Olovideo vioku lilongisa Embimbiliya. Olombangi Via Yehova via siata oku panga olovideo kelimi lioku ilaika oco vi kuatise omanu oku kuata elomboloko kuenda oku kapako olonumbi Viembimbiliya viatiamẽla . . .
Elilongiso Liembimbiliya. Lilongisa esapulo Liembimbiliya kelimi lioku ilaika kocitumãlo o sangiwa lekuatiso liulongisi umue. Pinga elilongiso liaco Liembimbiliya li lingiwa ocali.
Jeson Senajonon o kasi ko Filipina. Limbuka ndomo elilongiso lietu Liembimbiliya lio kuatisa oku kuata ukamba umue wa pama la Suku.
Mario Antúnez wa kala ulongisi umue wonembele ko Honduras. Kũlĩhĩsa ndomo eye a sanga atambululo kapulilo aye Vembimbiliya. Vulandu waye wa lombolola hati: “Nda Kuata Apulilo Alua Okuti Atambululo a Sule.”
Olohongele kuenda ovipito. Tu kuete akongelo kuenda ovimunga kalimi oku ilaika voluali luosi, muna ovisitatũi via siata oku liongoluila oco va lilongise loku fendela olosemana viosi. Tua siatavo oku linga asokiyo ovipito vinene kelimi lioku ilaika poku longisa Embimbiliya unyamo lunyamo. Kolohongele vietu kuenda kovipito, kua siata oku kala vamanji va pongoluilako ovisitatũi kuenda olomeke. Tua siatavo panga alivulu kelimi lio braile okuti a eciwa ocali.
Sanga ekongelo limue ocipepi locitumãlo cove.
Lilongisa eci catiamẽla kolohongele viofeka levi vimbo vi lingiwa unyamo lunyamo.
Linga esokiyo lioku kala Kocipito Colofa via Yesu, okuti oco ocipito cetu ca velapo cunyamo.
José Luis Ayala o kasi ko Mesiku. Eye wa citiwa okuti ocisitatũi, noke weya oku linga omeke. Limbuka ndomo a kuatisiwa oku kala ulongisi umue Wembimbiliya wa loñoloha.
a Yehova onduko ya Suku. (Osamo 83:18) Tanga ocipama losapi “Yehova Helie?”
Ove o ka ci Sola
NDOMO KU TALAVAYIWA LOLOMBANJAILE VIOVE
Ovisitatũi ka Via Ivaliwile
Tu kuete olovideo kueci ci pitahãla 100 kalimi oku ilaika! Tua siata oku vi panga ndati loku vi eca?
OVOLANDU
Ndi Lete Omuenyo Lovaka
James Ryan wa citiwa okuti ocisitatuĩ kuenje noke liotembo yimue wa linga omeke. Nye co kuatisa oku kuata ocimãho komuenyo?
KOKUETU
Pinga Oco o Nyuliwe
Sapeli eci catiamẽla kosapi yimue Yembimbiliya, ale lilongisa ovina vikuavo viatiamẽla Kolombangi Via Yehova.
