وفاقی آئینی عدالت میں فتح

جرمنی میں یہوواہ کے گواہوں نے کارلسروہی کی وفاقی آئینی عدالت میں ممتاز کامیابی حاصل کی۔‏ پس اُنہوں نے اپنی پہچان کے سلسلے میں ایک اہم قدم اُٹھایا۔‏

جرمنی میں یہوواہ کے گواہوں کو منادی کرتے ہوئے ۱۰۰ سال سے زیادہ عرصہ ہو گیا ہے۔‏ اُنہوں نے بیسویں صدی کی دو بڑی آمریتوں—‏قومی اشتراکیت اور کمیونسٹوں—‏کے ہاتھوں سخت اذیت برداشت کی ہے۔‏ سن ۱۹۹۰ سے لیکر گواہوں نے قانونِ‌عامہ کی کارپوریشن کے طور پر قانونی حیثیت حاصل کرنے کی کوشش جاری رکھی ہے۔‏ گواہوں نے دو مثبت عدالتی فیصلوں اور ایک مخالف فیصلے کے استرداد کے بعد وفاقی آئینی عدالت سے اپیل کی جس نے دسمبر ۱۹،‏ ۲۰۰۰ کو اپنا فیصلہ سنایا۔‏

یہوواہ کے گواہوں کے حق میں متفقہ فیصلہ

عدالت کے ساتوں ججوں نے گواہوں کے حق میں فیصلہ سنایا۔‏ اُنہوں نے ۱۹۹۷ میں وفاقی انتظامی عدالت کے فیصلے کو رد کرتے ہوئے عدالت کو گواہوں کی درخواست پر نظرثانی کرنے کی ہدایت کی۔‏

وفاقی آئینی عدالت نے اس موقع پر ملک اور مذہبی گروہوں کے مابین بنیادی تعلقات پر بھی تبصرہ کِیا۔‏ بنیادی طور پر،‏ ایک مذہب کی قدرومنزلت کا تعیّن ”‏اُسکے اعتقادات کی بجائے اُسکے پیروکاروں کے چال‌چلن سے“‏ کِیا جاتا ہے۔‏

عدالت نے یہ بھی بیان کِیا کہ جب گواہ ”‏مسیحی غیرجانبداری“‏ پر عمل‌پیرا ہوتے ہیں تو وہ ”‏جمہوری اُصولوں کی خلاف‌ورزی نہیں کرتے“‏ اور ”‏جمہوریت کو کسی دوسری حکومت میں تبدیل نہیں کرنا چاہتے۔‏“‏ لہٰذا گواہوں کے سیاسی الیکشن میں شمولیت نہ کرنے کے مؤقف کو قانونی حیثیت حاصل کرنے کے سلسلے میں اُنکے مطالبے پر اثرانداز نہیں ہونا چاہئے۔‏—‏یوحنا ۱۸:‏۳۶؛‏ رومیوں ۱۳:‏۱‏۔‏

عدالت نے مزید بیان کِیا کہ ایک ایماندار شخص—‏چاہے وہ گواہ ہے یا کسی دوسرے مذہب سے تعلق رکھتا ہے—‏بعض‌اوقات کسی ایسی صورتحال میں مبتلا ہو سکتا ہے جہاں اُس کے ملک کے قوانین اور اُس کے ایمان کے تقاضوں کے مابین تضاد ہو سکتا ہے۔‏ اگر وہ ”‏اپنے مذہبی اعتقادات کو قانون پر ترجیح“‏ دیتے ہوئے اپنے ضمیر کے مطابق فیصلہ کرتا ہے تو ملک اُس کے اس عمل کو جائز اور مذہبی آزادی کی حدود میں خیال کر سکتا ہے۔‏—‏اعمال ۵:‏۲۹‏۔‏

عدالت کا فیصلہ اخباروں کی شہ‌سُرخی بن گیا۔‏ جرمنی کا شاید ہی کوئی ایسا اخبار ہو جس نے اس عدالتی فیصلے کی خبر شائع نہ کی ہو۔‏ تمام بڑےبڑے ٹیلیویژن اور ریڈیو سٹیشنوں نے رپورٹیں اور انٹرویوز نشر کئے۔‏ اس سے پہلے جرمنی میں یہوواہ کے نام کی تشہیر اتنے وسیع پیمانے پرکبھی نہیں ہوئی تھی۔‏

‏[‏صفحہ ۸ پر تصویر کا حوالہ]‏

AP Photo/​Daniel Maurer