آپکو پُرتپاک دعوت دی جاتی ہے

خداوند یسوع نے کوئی ۰۰۰،‏۲ سال قبل جس آخری عشائیے کو رائج کِیا وہ محض دلچسپی کا حامل کوئی تاریخی واقعہ نہیں ہے۔‏ اس نے اپنی ابتدا ہی سے لوگوں پر بہت گہرا اثر ڈالا ہے۔‏ انجیل میں اُس رات کے واقعات کی سرگزشت پڑھنے سے متاثر ہوکر بہتیروں نے مختلف طریقوں سے خداوند کا عشائیہ منانے کی کوشش کی ہے۔‏

یہ بات قابلِ‌فہم ہے کیونکہ یسوع مسیح نے خود حکم دیا تھا کہ اُسکے پیروکاروں کو اِس واقعہ کی یادگار باقاعدگی سے منانی چاہئے۔‏ اُس نے اُنہیں خاص طور پر بتایا تھا:‏ ”‏میری یادگاری کے لئے یہی کِیا کرو۔‏“‏—‏لوقا ۲۲:‏۱۹؛‏ ۱-‏کرنتھیوں ۱۱:‏۲۳-‏۲۵‏۔‏

بِلاشُبہ،‏ اِس تقریب کا منایا جانا اُسی صورت میں بااَجر ثابت ہوگا جب خدا کے کلام بائبل کے مطابق اسکی صحیح سمجھ ہوگی۔‏ علاوہ‌ازیں،‏ یہ معلوم کرنا بھی ضروری ہے کہ بائبل اس تقریب کے وقت اور طریقے کی بابت کیا کہتی ہے۔‏

یسوع کے حکم کے مطابق،‏ پوری دُنیا میں یہوواہ کے گواہ بدھ کی شام،‏ اپریل ۱۶،‏ ۲۰۰۳ کو یسوع کی موت کی یادگار منانے کیلئے جمع ہونگے۔‏ یہ اُن کیلئے صحائف کا جائزہ لینے اور خداوند یسوع مسیح پر ایمان اور محبت کو مضبوط کرنے کا موقع ہوگا جس نے کہا:‏ ”‏خدا نے دُنیا سے ایسی محبت رکھی کہ اُس نے اپنا اکلوتا بیٹا بخش دیا تاکہ جو کوئی اُس پر ایمان لائے ہلاک نہ ہو بلکہ ہمیشہ کی زندگی پائے۔‏“‏ (‏یوحنا ۳:‏۱۶‏)‏ اُس شام آپکو اُن کیساتھ جمع ہونے کی پُرتپاک دعوت دی جاتی ہے تاکہ آپ بھی یسوع مسیح اور آسمانی باپ،‏ یہوواہ خدا پر اپنے ایمان اور محبت کو مضبوط کر سکیں۔‏