یہوواہ کا کلام زندہ ہے

ہوسیع کی کتاب سے اہم نکات

اسرائیل کی دس قبیلوں پر مشتمل شمالی سلطنت سے سچی پرستش تقریباً ختم ہو چکی ہے۔‏ یربعام دوم کی حکومت کے تحت اسرائیلی مالی طور پر خوشحال رہے لیکن اس کی موت کے فوراً بعد اُن کی خوشحالی ختم ہو جاتی ہے۔‏ اس کے بعد بدامنی اور سیاسی عدمِ‌استحکام یا ابتری کا دَور شروع ہو جاتا ہے۔‏ یربعام دوم کے بعد آنے والے چھ بادشاہوں میں سے چار کو قتل کر دیا جاتا ہے۔‏ (‏۲-‏سلاطین ۱۴:‏۲۹؛‏ ۱۵:‏۸-‏۳۰؛‏ ۱۷:‏۱-‏۶‏)‏ ہوسیع نے ۸۰۴ قبل‌ازمسیح میں افراتفری کے اسی دَور میں نبوّت کرنا شروع کی اور اس نے ۵۹ سال تک نبوّت کی۔‏

اسرائیل کی باغی قوم کے لئے یہوواہ خدا کے احساسات کی واضح عکاسی ہوسیع کی شادی‌شُدہ زندگی میں پیش آنے والے واقعات سے ہوتی ہے۔‏ ہوسیع کے پیغام کا موضوع اسرائیل کے گُناہ کو بےنقاب کرنا اَور اس کی اور یہوداہ کی سلطنت کے خلاف نبوّتی فیصلے سنانا ہے۔‏ ہوسیع نے اپنے نام کی حامل اس کتاب کو نرم‌ولطیف الفاظ مگر بامعنی اور پُرزور زبان استعمال کرتے ہوئے تحریر کِیا ہے۔‏ خدا کے الہامی کلام کا حصہ ہوتے ہوئے اس کتاب کا پیغام زندہ اور مؤثر ہے۔‏—‏عبرانیوں ۴:‏۱۲‏۔‏

‏’‏جا اپنے لئے ایک بدکار بیوی لے‘‏

‏(‏ہوسیع ۱:‏۱–‏۳:‏۵‏)‏

یہوواہ خدا ہوسیع سے کہتا ہے:‏ ’‏جا اپنے لئے ایک بدکار بیوی لے۔‏‘‏ (‏ہوسیع ۱:‏۲‏)‏ یہوواہ خدا کی فرمانبرداری کرتے ہوئے ہوسیع جمر سے شادی کرتا ہے اور اس کا ایک بیٹا پیدا ہوتا ہے۔‏ اس کے بعد جمر دو اَور بچوں کو جنم دیتی ہے جوکہ اُس کی ناجائز اولاد ہیں۔‏ ان دونوں بچوں کے نام لورحامہ اور لوعمی ہیں۔‏ ان کے ناموں کا مطلب یہوواہ خدا کے اسرائیل پر رحم نہ کرنے اور اپنے بیوفا لوگوں کو رد کرنے کی طرف اشارہ کرتا ہے۔‏

درحقیقت یہوواہ خدا اپنے باغی لوگوں کے بارے میں کیسا محسوس کرتا ہے؟‏ وہ ہوسیع کو بتاتا ہے:‏ ”‏جا اُس عورت سے جو اپنے یار کی پیاری اور بدکار ہے محبت رکھ جس طرح کہ [‏یہوواہ]‏ بنی‌اسرائیل سے جو غیرمعبودوں پر نگاہ کرتے ہیں اور کشمش کے کُلچے چاہتے ہیں محبت رکھتا ہے۔‏“‏—‏ہوسیع ۳:‏۱‏۔‏

صحیفائی سوالات کے جواب:‏

۱:‏۱‏—‏ہوسیع اپنی خدمتگزاری کے دوران یہوداہ کے چار بادشاہوں اور اسرائیل کے ایک بادشاہ کا ذکر کیوں کرتا ہے؟‏ اسلئےکہ صرف داؤد  کے گھرانے سے تعلق رکھنے والے بادشاہ ہی خدا کے چنے ہوئے لوگوں کے راست حکمران سمجھے جاتے تھے۔‏ شمالی سلطنت کے بادشاہ داؤد کی نسل سے نہیں تھے جبکہ یہوداہ کے بادشاہ اُس کی نسل سے تھے۔‏

۱:‏۲-‏۹‏—‏کیا ہوسیع نے واقعی ایک بدکار عورت سے شادی کی تھی؟‏ جی‌ہاں،‏ ہوسیع نے واقعی ایک ایسی عورت سے شادی کی تھی جو بعد میں زناکار بن گئی۔‏ تاہم،‏ ہوسیع نبی یہ نہیں بتاتا کہ اپنی خاندانی زندگی کی بابت اُس نے جوکچھ بیان کِیا وہ کوئی خواب تھا یا رویا۔‏

۱:‏۷‏—‏یہوداہ کے گھرانے پر کب رحم ظاہر کرکے اُسے بچایا گیا تھا؟‏ یہ پیشینگوئی ۷۳۲ قبل‌ازمسیح میں حزقیاہ بادشاہ کے زمانے میں پوری ہوئی۔‏ اُس وقت،‏ اسوریوں کی طرف سے یروشلیم کو درپیش خطرے کو ٹالنے کے لئے یہوواہ خدا کے ایک فرشتے نے راتوں رات دُشمن فوجوں کے ۰۰۰،‏۸۵،‏۱ سپاہیوں کو مار ڈالا۔‏ (‏۲-‏سلاطین ۱۹:‏۳۴،‏ ۳۵‏)‏ یوں یہوواہ خدا نے یہوداہ کو ”‏کمان اور تلوار اور لڑائی اور گھوڑوں اور سواروں“‏ کے وسیلہ سے نہیں بلکہ اپنے فرشتہ کے ذریعہ بچایا۔‏

۱:‏۱۰،‏ ۱۱‏—‏اگرچہ اسرائیل کی شمالی سلطنت ۷۴۰ قبل‌ازمسیح میں ختم ہو گئی توبھی بنی‌اسرائیل اور بنی‌یہوداہ کو کیسے ”‏متحد“‏ کِیا گیا؟‏ (‏کیتھولک ترجمہ)‏ یہوداہ کے باشندوں کے ۶۰۷ قبل‌ازمسیح میں بابل کی اسیری میں جانے سے پہلے شمالی سلطنت کے بیشتر لوگ اسرائیل کے ملک کو چھوڑ کر یہوداہ میں آ گئے تھے۔‏ (‏۲-‏تواریخ ۱۱:‏۱۳-‏۱۷؛‏ ۳۰:‏۶-‏۱۲،‏ ۱۸-‏۲۰،‏ ۲۵‏)‏ پس جب ۵۳۷ قبل‌ازمسیح میں یہودی اپنے مُلک واپس لوٹے تو اسرائیل کی شمالی سلطنت کے لوگوں کی اولاد بھی ان کے ساتھ تھی۔‏—‏عزرا ۲:‏۷۰‏۔‏

۲:‏۲۱-‏۲۳‏—‏جب یہوواہ خدا نے یہ کہا کہ ”‏مَیں [‏یزرعیل]‏ کو اُس سرزمین میں اپنے لئے بوؤں گا اور لوؔرحامہ پر رحم کروں گا“‏ تو کس بات کی پیشینگوئی کی گئی تھی؟‏ جمر سے پیدا ہونے والے ہوسیع کے پہلوٹھے بیٹے کا نام یزرعیل تھا۔‏ (‏ہوسیع ۱:‏۲-‏۴‏)‏ اس کے نام کا مطلب ہے،‏ ”‏خدا بیج بوتا ہے۔‏“‏ یہ الفاظ ۵۳۷ قبل‌ازمسیح میں یہوواہ خدا کے ایک وفادار بقیے کو جمع کرنے اور انہیں بیج کی طرح یہوداہ میں بونے کی نبوّتی تصویر پیش کرتے ہیں۔‏ ستر سال تک ویران پڑی رہنے والی زمین میں اب اناج،‏ مے اور تیل پیدا کرنے کی ضرورت ہے۔‏ پیشینگوئی شاعرانہ انداز میں بیان کرتی ہے کہ یہ چیزیں زمین سے خوراک پیدا کرنے کی درخواست کریں گی۔‏ زمین آسمان سے بارش برسانے کی درخواست کرے گی۔‏ نیز آسمان خدا سے بادل فراہم کرنے کی درخواست کرے گا۔‏ اس سب کا مقصد اسیری سے لوٹنے والے بقیے کی ضروریات پوری کرنا تھا۔‏ پولس اور پطرس رسول نے ہوسیع ۲:‏۲۳ کا اطلاق روحانی اسرائیل کے بقیے کو جمع کرنے پر کِیا۔‏—‏رومیوں ۹:‏۲۵،‏ ۲۶؛‏ ۱-‏پطرس ۲:‏۱۰‏۔‏

ہمارے لئے سبق:‏

۱:‏۲-‏۹؛‏ ۳:‏۱،‏ ۲‏۔‏ ذرا اُن قربانیوں کی بابت سوچیں جو ہوسیع نے خدا کی مرضی پوری کرنے کے لئے اپنی شادی کو قائم رکھنے کے سلسلے میں دی تھیں!‏ جب خدا کی مرضی پوری کرنے کی بات آتی ہے تو ہم کس حد تک اپنی ذاتی ترجیحات کو قربان کرنے کے لئے تیار ہوتے ہیں؟‏

۱:‏۶-‏۹‏۔‏ یہوواہ خدا روحانی زناکاری سے اُتنی ہی نفرت کرتا ہے جتنی جسمانی زناکاری سے۔‏

۱:‏۷،‏ ۱۰،‏ ۱۱؛‏ ۲:‏۱۴-‏۲۳‏۔‏ یہوواہ خدا نے اسرائیل اور یہوداہ کی سلطنت کی بابت جوکچھ کہا وہ پورا ہوا۔‏ یہوواہ خدا کا کلام ہمیشہ سچ ثابت ہوتا ہے۔‏

۲:‏۱۶،‏ ۱۹،‏ ۲۱-‏۲۳؛‏ ۳:‏۱-‏۴‏۔‏ یہوواہ خدا دل سے توبہ کرنے والوں کو معاف کرنے کے لئے تیار ہے۔‏ (‏نحمیاہ ۹:‏۱۷‏)‏ یہوواہ خدا کی طرح ہمیں بھی دوسروں کے ساتھ اپنے برتاؤ میں ہمدردی اور رحم‌دلی ظاہر کرنی چاہئے۔‏

‏”‏[‏یہوواہ]‏ کا جھگڑا ہے“‏

‏(‏ہوسیع ۴:‏۱–‏۱۳:‏۱۶‏)‏

‏”‏اس مُلک کے رہنے والوں سے [‏یہوواہ]‏ کا جھگڑا ہے۔‏“‏ مگر کیوں؟‏ اِسلئےکہ ”‏یہ مُلک راستی‌وشفقت اور خداشناسی سے خالی ہے۔‏“‏ (‏ہوسیع ۴:‏۱‏)‏ اسرائیل کے باغی لوگ دھوکادہی اور خون‌ریزی جیسے کاموں میں  ملوث ہیں۔‏ اُنہوں نے جسمانی اور روحانی زناکاری کی ہے۔‏ وہ مدد کے لئے خدا پر بھروسا کرنے کی بجائے ”‏مصرؔ کی دُہائی دیتے اور اؔسُور کو جاتے ہیں۔‏“‏—‏ہوسیع ۷:‏۱۱‏۔‏

یہوواہ خدا اُن کے خلاف سزا سناتے ہوئے کہتا ہے:‏ ”‏اسرائیل نگلا گیا۔‏“‏ (‏ہوسیع ۸:‏۸‏)‏ یہوداہ کی سلطنت بھی جرم سے پاک نہیں ہے۔‏ ہوسیع ۱۲:‏۲ بیان کرتی ہے:‏ ”‏[‏یہوواہ]‏ کا یہوؔداہ کے ساتھ بھی جھگڑا ہے اور یعقوؔب کی روِش کے مطابق اُس کو سزا دے گا اور اُس کے اعمال کے موافق اُس کو جزا دے گا۔‏“‏ مگر خدا کے وعدہ کے مطابق اس کی بحالی ہوگی۔‏ یہوواہ خدا فرماتا ہے:‏ ”‏مَیں اُن کو پاتال کے قابو سے نجات دُونگا مَیں اُن کو موت سے چھڑاؤں گا۔‏“‏—‏ہوسیع ۱۳:‏۱۴‏۔‏

صحیفائی سوالات کے جواب:‏

۶:‏۱-‏۳‏—‏کون یہ کہہ رہا تھا:‏ ”‏آؤ ہم [‏یہوواہ]‏ کی طرف رُجُوع کریں“‏؟‏ ہو سکتا ہے کہ بیوفا اسرائیلی یہوواہ خدا کی طرف رُجوع کرنے کے لئے ایک دوسرے کی حوصلہ‌افزائی کر رہے ہوں۔‏ اگر ایسا ہے تو وہ محض توبہ کرنے کا دعویٰ کر رہے تھے۔‏ اُن کی نیکی ”‏صبح کے بادل اور شبنم کی مانند جلد“‏ جانے والی تھی۔‏ (‏ہوسیع ۶:‏۴‏)‏ دوسری جانب،‏ یہ ہوسیع بھی ہو سکتا تھا جو لوگوں سے خدا کی طرف رُجوع کرنے کی درخواست کر رہا تھا۔‏ صورتحال خواہ کچھ بھی ہو،‏ اسرائیل کی دس قبیلوں پر مشتمل سلطنت کے باغی لوگوں کو دل سے توبہ کرنے اور یہوواہ خدا کی طرف رُجوع کرنے کی ضرورت تھی۔‏

۷:‏۴‏—‏کس طرح زناکار اسرائیلی ’‏گرم تنور کی مانند‘‏ تھے؟‏ یہ موازنہ اُن کے دل میں موجود بُری خواہشات کی انتہا کو ظاہر کرتا ہے۔‏

ہمارے لئے سبق:‏

۴:‏۱،‏ ۶‏۔‏ یہوواہ خدا کی خوشنودی حاصل کرنے کے لئے ہمیں اس کا علم حاصل کرنا اور جوکچھ ہم سیکھتے ہیں اس کی مطابقت میں عمل کرنا چاہئے۔‏

۴:‏۹-‏۱۳‏۔‏ یہوواہ خدا ایسے لوگوں کو سزا دے گا جو بدکاری کرتے اور جھوٹی پرستش میں شریک ہوتے ہیں۔‏—‏ہوسیع ۱:‏۴‏۔‏

۵:‏۱‏۔‏ خدا کے لوگوں کی پیشوائی کرنے والوں کو مکمل طور پر برگشتگی کو رد کرنا چاہئے۔‏ بصورتِ‌دیگر،‏ وہ بعض کو جھوٹی پرستش میں اُلجھا سکتے اور یوں اُن کے لئے ایک ’‏پھندا اور دام‘‏ بن سکتے ہیں۔‏

۶:‏۱-‏۴؛‏ ۷:‏۱۴،‏ ۱۶‏۔‏ محض زبانی کلامی توبہ کرنا ریاکاری ہے اور اس کا کوئی فائدہ نہیں۔‏ خدا کے رحم کا طالب ہونے کے لئے ایک خطاکار شخص کو دل سے توبہ کرنی چاہئے۔‏ وہ اس کا اظہار ”‏حق‌تعالیٰ“‏ کی سچی پرستش کی طرف رُجوع کرنے سے کر سکتا ہے۔‏ ایسے شخص کے کام بھی خدا کے اعلیٰ معیاروں کی مطابقت میں ہونے چاہئیں۔‏—‏ہوسیع ۷:‏۱۶‏۔‏

۶:‏۶‏۔‏ گُناہ کرنا خدا کے لئے ہماری سچی محبت کی کمی کو ظاہر کرتا ہے۔‏ خدا کے لئے گزرانی جانے والی کسی بھی طرح کی قربانیاں اس کمی کو پورا نہیں کر سکتیں۔‏

۸:‏۷،‏ ۱۳؛‏ ۹:‏۱۷؛‏ ۱۰:‏۱۳‏۔‏ برگشتہ اسرائیلیوں کے سلسلے میں یہ اصول سچ ثابت ہوا:‏ ”‏آدمی جوکچھ بوتا ہے وہی کاٹے گا۔‏“‏—‏گلتیوں ۶:‏۷‏۔‏

۸:‏۸؛‏ ۱۳:‏۱۶‏۔‏ شمالی سلطنت کے بارے میں یہ پیشینگوئیاں اُس وقت پوری ہوئیں جب اسوریوں نے اس کے دارالحکومت،‏ سامریہ پر قبضہ کر لیا۔‏ (‏۲-‏سلاطین ۱۷:‏۳-‏۶‏)‏ ہم یقین رکھ سکتے ہیں کہ خدا نے جوکچھ فرمایا ہے وہ اُسے ضرور پورا کرے گا۔‏—‏گنتی ۲۳:‏۱۹‏۔‏

۸:‏۱۴‏۔‏ یہوواہ خدا نے ۶۰۷ قبل‌ازمسیح میں بابلیوں کے ہاتھوں ”‏[‏یہوداہ]‏ کے شہروں پر آگ“‏ بھیجی اور پیشینگوئی کے مطابق یروشلیم سمیت تمام یہوداہ پر تباہی لایا۔‏ (‏۲-‏تواریخ ۳۶:‏۱۹‏)‏ خدا کا کلام ہمیشہ پورا ہوتا ہے۔‏—‏یشوع ۲۳:‏۱۴‏۔‏

۹:‏۱۰‏۔‏ اگرچہ اسرائیلی سچے خدا کی چنی ہوئی قوم تھے توبھی وہ ”‏بعلؔ‌فغور کے پاس گئے اور اپنے آپ کو باعثِ‌رُسوائی کے لئے مخصوص کِیا۔‏“‏ اُن کی بُری مثال سے آگاہی پاتے ہوئے ہمیں یہوواہ خدا کے  لئے اپنی مخصوصیت پر قائم رہنے کے سلسلے میں خبردار رہنا چاہئے۔‏—‏۱-‏کرنتھیوں ۱۰:‏۱۱‏۔‏

۱۰:‏۱،‏ ۲،‏ ۱۲‏۔‏ ہمیں دغاباز یا ریاکار دل سے خدا کی پرستش نہیں کرنی چاہئے۔‏ جب ہم ’‏اپنے لئے صداقت سے تخم‌ریزی کرتے ہیں تو ہم خدا کی شفقت سے فصل کاٹتے ہیں۔‏‘‏

۱۰:‏۵‏۔‏ بیت‌آون (‏جس کا مطلب ہے،‏ ”‏بدی کا شہر“‏)‏ بیت‌ایل (‏جس کا مطلب ہے،‏ ”‏خدا کا گھر“‏)‏ کو دیا جانے والا توہین‌آمیز نام ہے۔‏ جب بیت‌آون میں نصب بچھڑے کی مورت اسیری میں لیجائی گئی تو سامریہ کے لوگوں نے اس کے لئے ماتم کِیا۔‏ بےجان بت جو اپنی حفاظت نہیں کر سکتے ان پر بھروسا رکھنا کسقدر احمقانہ بات ہے!‏—‏زبور ۱۳۵:‏۱۵-‏۱۸؛‏ یرمیاہ ۱۰:‏۳-‏۵‏۔‏

۱۱:‏۱-‏۴‏۔‏ یہوواہ خدا ہمیشہ اپنے لوگوں کے ساتھ محبت سے پیش آتا ہے۔‏ یہوواہ خدا کی تابعداری کرنا کبھی بھی مشکل نہیں ہوتا۔‏

۱۱:‏۸-‏۱۱؛‏ ۱۳:‏۱۴‏۔‏ اپنے لوگوں کے درمیان سچی پرستش کو دوبارہ بحال کرنے کے حوالے سے یہوواہ خدا کا کلام ’‏بےانجام اس کے پاس واپس نہ گیا۔‏‘‏ (‏یسعیاہ ۵۵:‏۱۱‏)‏ سن ۵۳۷ قبل‌ازمسیح میں بابل کی اسیری سے ایک بقیہ یروشلیم واپس آیا۔‏ (‏عزرا ۲:‏۱؛‏ ۳:‏۱-‏۳‏)‏ پس یہوواہ خدا نے اپنے نبیوں کی معرفت جوکچھ فرمایا ہے وہ ضرور پورا ہوگا۔‏

۱۲:‏۶‏۔‏ ہمیں شفقت دکھانے،‏ انصاف کرنے اور ہمیشہ یہوواہ خدا پر اُمید رکھنے کا عزم کرنا چاہئے۔‏

۱۳:‏۶‏۔‏ اسرائیلی ”‏اپنی چراگاہوں میں سیر ہوئے اور سیر ہو کر اُن کے دل میں گھمنڈ سمایا اور [‏یہوواہ کو]‏ بھول گئے۔‏“‏ ہمیں تکبّر کرنے سے خبردار رہنا چاہئے۔‏

‏”‏[‏یہوواہ]‏ کی راہیں راست ہیں“‏

‏(‏ہوسیع ۱۴:‏۱-‏۹‏)‏

ہوسیع التجا کرتا ہے:‏ ”‏اَے اؔسرائیل [‏یہوواہ]‏ اپنے خدا کی طرف رُجُوع لا کیونکہ تُو اپنی بدکرداری کے سبب سے گِر گیا ہے۔‏“‏ وہ لوگوں کو یہوواہ خدا سے یہ کہنے کی تاکید کرتا ہے:‏ ”‏ہماری تمام بدکرداری کو دُور کر اور فضل سے ہم کو قبول فرما۔‏ تب ہم اپنے لبوں سے قُربانیاں گذرانینگے۔‏“‏—‏ہوسیع ۱۴:‏۱،‏ ۲‏۔‏

ایک تائب گنہگار کو یہوواہ خدا کی طرف رُجوع لانے،‏ اس کی راہوں کو قبول کرنے اور حمد کی قربانیاں گزراننے کی ضرورت ہے۔‏ مگر کیوں؟‏ اسلئےکہ ”‏[‏یہوواہ]‏ کی راہیں راست ہیں اور صادق اُن میں چلیں گے۔‏“‏ (‏ہوسیع ۱۴:‏۹‏)‏ ہم کسقدر خوش ہیں کہ اب بھی بیشتر لوگ ان ”‏آخری دنوں میں ڈرتے ہوئے [‏یہوواہ]‏ اور اُس کی مہربانی کے طالب ہونگے۔‏“‏—‏ہوسیع ۳:‏۵‏۔‏

‏[‏صفحہ ۲۸ پر تصویر]‏

ہوسیع کے خاندان نے اسرائیل کے ساتھ یہوواہ خدا کے برتاؤ کی تصویر پیش کی

‏[‏صفحہ ۳۱ پر تصویر]‏

سن ۷۴۰ قبل‌ازمسیح میں سامریہ کی بربادی کے ساتھ اسرائیل کی دس قبیلوں پر مشتمل سلطنت کا خاتمہ ہو گیا