دُنیابھر میں کی جانے والی ایک خاص دُعا

ہر روز لاکھوں یہاں تک کہ کروڑوں لوگ کائنات کے خالق سے ایک خاص چیز کی درخواست کرتے ہیں۔‏ وہ خدا کی بادشاہت کے آنے کے لئے دُعا کرتے ہیں۔‏ لیکن حیرانگی کی بات ہے کہ اِن میں سے زیادہ‌تر یہ نہیں جانتے کہ خدا کی بادشاہت دراصل کیا ہے۔‏

ایک اندازے کے مطابق تقریباً ۰۰۰،‏۳۷ ایسے مذاہب ہیں جو یسوع مسیح کی پیروی کرنے کا دعویٰ کرتے ہیں۔‏ دو ارب سے زیادہ لوگ اِن مذاہب سے تعلق رکھتے ہیں۔‏ ان میں سے بہتیرے ایک خاص دُعا کرتے ہیں جو دُعائےربانی کے نام سے مشہور ہے۔‏ کیا آپ بھی اِس دُعا سے واقف ہیں؟‏ یسوع مسیح نے یہ دُعا اپنے پیروکاروں کو سکھائی تھی۔‏ یہ دُعا یوں شروع ہوتی ہے:‏ ”‏اَے ہمارے باپ تُو جو آسمان پر ہے تیرا نام پاک مانا جائے۔‏ تیری بادشاہی آئے۔‏ تیری مرضی جیسی آسمان پر پوری ہوتی ہے زمین پر بھی ہو۔‏“‏—‏متی ۶:‏۹،‏ ۱۰‏۔‏

کئی صدیوں سے مسیحی اِن الفاظ کو چرچ میں عبادت کے دوران دہراتے آ رہے ہیں۔‏ اِن الفاظ کو خاندان کے طور پر اور اکیلے میں دُعا کرتے وقت بھی باقاعدگی سے استعمال کِیا جاتا ہے۔‏ لوگ اِس دُعا کو اچھے اور بُرے وقت میں بڑے خلوص سے دہراتے ہیں۔‏ ایسے بھی لوگ ہیں جو ہر روز اِس دُعا کو بار بار دہراتے رہتے ہیں لیکن اِس کے مطلب کے بارے میں زیادہ خیال نہیں کرتے۔‏ کیا آپ کو معلوم ہے کہ مسیحیوں کے علاوہ دوسرے مذاہب کے اراکین بھی خدا کی بادشاہت کے آنے کے لئے دُعا کرتے ہیں؟‏

دوسرے مذاہب میں خدا کی بادشاہت کی تعلیم

کسی قریبی رشتہ‌دار کی موت پر یہودی مذہب میں ایک خاص دُعا کی جاتی ہے۔‏ دراصل اِس دُعا میں موت اور ماتم کا کوئی ذکر نہیں۔‏ اِس میں یہ الفاظ شامل ہیں:‏ ”‏خدا اپنی بادشاہت تیری ہی عمر میں قائم کرے۔‏“‏ * یہودی عبادت‌خانوں میں پُرانے زمانے سے ایک ایسی دُعا بھی کی جاتی ہے جس میں اِبنِ‌داؤد یعنی مسیحا کی بادشاہت کے آنے کا ذکر ہوتا ہے۔‏

یہودیوں کے علاوہ دوسرے مذاہب کے اراکین میں سے بھی‌بعض خدا کی بادشاہت کے آنے کا انتظار کر رہے ہیں۔‏ مثال کے طور پر ۱۹ ویں صدی میں اِنڈیا کے ایک مذہبی رہنما نے ہندوؤں،‏ مسلمانوں اور مسیحیوں کے درمیان اچھے تعلقات کو فروغ دینے کی کوشش کی۔‏ دی ٹائمز آف اِنڈیا کے مطابق اُس نے کہا:‏ ”‏خدا کی سچی بادشاہت تب ہی وجود میں آئے گی جب مشرق اور مغرب میں اتحاد ہوگا۔‏“‏ اور حال ہی میں آسٹریلیا کے شہر سٹراتھ‌فیلڈ کے اسلامی کالج کی پرنسپل صاحبہ نے ایک اخبار میں یوں لکھا:‏ ”‏تمام مسلمانوں کی طرح مَیں بھی اِس بات پر ایمان رکھتی ہوں کہ عیسیٰ مسیح واپس آ کر خدا کی سچی بادشاہت قائم کرے گا۔‏“‏

واقعی،‏ دُنیابھر میں اربوں لوگ خدا کی بادشاہت کے آنے کے منتظر ہیں۔‏ لیکن ذرا ایک حیرت‌انگیز حقیقت پر غور کیجئے۔‏

آپ کو معلوم ہوگا کہ یہوواہ کے گواہ،‏ جو اِس رسالے کو شائع کرتے ہیں،‏ گھر گھر جا کر لوگوں کے ساتھ خدا کے کلام پر بات‌چیت کرتے ہیں۔‏ ہم یہ کام دُنیا کے ۲۳۶ ممالک میں اور ۴۰۰ سے زائد زبانوں میں کرتے ہیں۔‏ ہمارا پیغام خاص طور پر خدا کی بادشاہت کے بارے میں ہے۔‏ ذرا غور کیجئے کہ اِس رسالے کا عنوان کیا ہے:‏ مینارِنگہبانی  یہوواہ کی بادشاہت کا اعلان کر رہا ہے۔‏ اکثر اوقات ہم لوگوں سے پوچھتے ہیں کہ ”‏کیا آپ خدا کی بادشاہت کے آنے کے لئے دُعا کرتے ہیں؟‏“‏ اِس پر بہت سے لوگ ہاں میں جواب دیتے ہیں۔‏ لیکن جب ہم ان سے پوچھتے ہیں کہ ”‏خدا کی بادشاہت کیا ہے؟‏“‏ تو زیادہ‌تر لوگ اِس کی وضاحت نہیں کر سکتے ہیں۔‏

اگر ان تمام لوگوں کو یہ معلوم نہیں کہ خدا کی بادشاہت کیا ہے تو وہ اس کے آنے کے لئے دُعا کیوں کرتے ہیں؟‏ کیا خدا کی بادشاہت ایک ایسی چیز ہے جس کی وضاحت کرنا مشکل ہے؟‏ جی‌نہیں۔‏ خدا کے کلام بائبل میں اس کے بارے میں بہت سی معلومات پائی جاتی ہے اور اِس معلومات کو سمجھنا مشکل نہیں۔‏ سب سے اچھی بات یہ ہے کہ جب آپ خدا کی بادشاہت کے بارے میں سیکھیں گے تو آپ اِس مشکل دَور میں تسلی پائیں گے۔‏ اگلے مضمون میں بتایا جائے گا کہ ایسا کیوں ہے۔‏ اس کے بعد ہم دیکھیں گے کہ یسوع مسیح کی یہ دُعا کہ ’‏خدا کی بادشاہت آئے‘‏ کب پوری ہوگی۔‏

‏[‏فٹ‌نوٹ]‏