حصہ 2
اپنے جیونساتھی کے وفادار رہیں
”جسے خدا نے جوڑا ہے اُسے آدمی جُدا نہ کرے۔“—مرقس 10:9
یہوواہ خدا شادیشُدہ جوڑوں سے توقع کرتا ہے کہ وہ ایک دوسرے کے وفادار رہیں۔ (ملاکی 2:14) یہ اِس لیے بھی اہم ہے کیونکہ جس رشتے میں وفاداری نہیں ہوتی، اُس میں بھروسا بھی نہیں ہوتا۔ اور بھروسے کے بغیر محبت نہیں بڑھ سکتی۔
آجکل شادی میں بےوفائی بہت عام ہو گئی ہے۔ اگر آپ چاہتے ہیں کہ آپ کی شادی کا بندھن ہمیشہ قائم رہے تو آپ کو دو اہم باتوں پر عمل کرنا چاہیے۔
1 اپنے شادی کے بندھن کو اہم مقام دیں
خدا کا کلام کیا کہتا ہے؟ ہمیں اُن باتوں پر زیادہ دھیان دینا چاہیے ”جو بنیادی اہمیت کی حامل ہیں۔“ (فلپیوں 1:10، اُردو جیو ورشن) بِلاشُبہ شادی کا رشتہ اِن اہم باتوں میں سے ایک ہے۔ اِس لیے آپ کو شادی کے بندھن کو زندگی میں اہم مقام دینا چاہیے۔
یہوواہ خدا چاہتا ہے کہ آپ اپنے جیونساتھی کو پوری توجہ دیں اور ’اُس کے ساتھ شاد رہیں۔‘ (امثال 5:18) خدا یہ بھی چاہتا ہے کہ آپ اپنے جیونساتھی کی ضروریات کو کبھی نظرانداز نہ کریں بلکہ ایک دوسرے کو خوش کرنے کی پوری کوشش کریں۔ (1-کرنتھیوں 10:24) اُسے احساس دِلائیں کہ وہ آپ کے لیے بہت خاص ہے اور آپ اُس کی قدر کرتے ہیں۔
آپ کیا کر سکتے ہیں؟
-
باقاعدگی سے ایک دوسرے کے ساتھ وقت گزاریں اور اِس دوران اپنے جیونساتھی کو پوری توجہ دیں۔
-
صرف اپنے بارے میں سوچنے کی بجائے اپنے جیونساتھی کی ضروریات اور خواہشات کا خیال رکھیں۔
2 اپنے دل میں غلط خواہشات کو پیدا نہ ہونے دیں
خدا کا کلام کیا کہتا ہے؟ ”جس کسی نے بُری خواہش سے کسی عورت پر نگاہ کی وہ اپنے دل میں اُس کے ساتھ زِنا کر چُکا۔“ (متی 5:28) اگر کوئی شخص گندی باتوں کے بارے میں سوچتا رہتا ہے تو ایک لحاظ سے وہ اپنے جیونساتھی سے بےوفائی کر رہا ہوتا ہے۔
یہوواہ خدا آپ کو نصیحت کرتا ہے کہ آپ ”اپنے دل کی خوب حفاظت“ کریں۔ (امثال 4:23؛ یرمیاہ 17:9) اِس لیے آپ کو خبردار رہنا چاہیے کہ آپ کن چیزوں پر نظر کرتے ہیں۔ (متی 5:29، 30) خدا کے بندے ایوب کی مثال پر غور کریں جنہوں نے اپنی آنکھوں سے عہد کِیا تھا کہ وہ بُری خواہش سے کسی غیرعورت پر نظر نہیں کریں گے۔ (ایوب 31:1) یہ ٹھان لیں کہ آپ کبھی فحش مواد نہیں دیکھیں گے اور اپنے جیونساتھی کے علاوہ کسی کو اپنا دل نہیں دیں گے۔
آپ کیا کر سکتے ہیں؟
-
دوسروں پر ظاہر کریں کہ آپ اپنے جیونساتھی کے وفادار رہنا چاہتے ہیں۔
-
اپنے جیونساتھی کے احساسات کا لحاظ رکھیں۔ اگر کسی مخالف جنس کے ساتھ آپ کی دوستی اِتنی گہری ہو جاتی ہے کہ آپ کے جیونساتھی کو بُرا لگ سکتا ہے تو اِسے فوراً ختم کر دیں۔
