Ибтидо 45:1–28
45 Бу сўзлардан кейин Юсуф ўзини тута олмай+, хизматкорларига: «Бу ердан чиқиб кетинглар!» — дея бақирди. Улар чиқиб кетгач, Юсуф ўзини ака-укаларига танитди+.
2 У шунчалик баланд овозда йиғлаб юбордики, буни мисрликлар ҳам, фиръавннинг саройидагилар ҳам эшитди.
3 Юсуф ака-укаларига: «Мен Юсуфман. Отам ҳали ҳам ҳаётмилар?» — деди. Бироқ улар ҳайратдан донг қотиб қолишди ва унга жавоб бера олишмади.
4 Кейин Юсуф уларга: «Илтимос, яқинроқ келинглар»,— деди. Улар Юсуфнинг олдига яқинроқ боришди.
Шунда Юсуф уларга қуйидагиларни айтди: «Сизлар Мисрга сотиб юборган укангиз Юсуфман+.
5 Аммо сизлар ташвишланманглар ва мени бу ерга сотиб юборганингиз учун бир-бирингизни айбламанглар. Худо ҳаётингизни сақлаб қолиш учун, мени сизлардан аввал бу ерга юборди+.
6 Ер юзида очарчилик бошланганига энди икки йил бўлди+, яна беш йил ер шудгор қилинмайди ва ўрим-йиғим бўлмайди.
7 Худо ер юзида наслингизни сақлаб қолиш+ ва буюк бир нажот орқали сизларни тирик қолдириш учун, мени сизлардан аввал бу ерга юборди.
8 Мени бу ерга сизлар эмас, балки ҳақ Худо юборди. Тангри мени фиръавннинг бош маслаҳатчиси* этиб тайинлаб, хонадони устидан хўжайин ва бутун Миср юртининг ҳокими қилиб қўйди+.
9 Отамнинг олдига тезроқ қайтиб боринглар-да, ўғлингиз Юсуф мана бундай деди деб айтинглар: “Худо мени бутун Миср юрти устидан хўжайин қилиб тайинлади+. Ортга сурмасдан, тезроқ ёнимга келинг+.
10 Бу ерга келиб, Гўшен ерига+ жойлашасиз. Ўшанда фарзандларингиз, невараларингиз, молларингиз ва бор-будингиз билан менинг ёнимда бўласиз.
11 Бор-будингиздан айрилиб, очликдан қийналмаслигингиз учун, мен сизни ва хонадонингизни озиқ-овқат билан таъминлаб тураман+. Чунки очарчилик яна беш йил давом этади”.
12 Бу гапларни чиндан ҳам мен айтаётганимни сизлар ва укам Бенямин кўриб турибсизлар+.
13 Миср юртида шон-шарафга эга эканимни ҳамда барча кўрганларингизни отамга айтиб беринглар ва тезроқ бориб, отамни бу ерга олиб келинглар».
14 Кейин Юсуф укаси Беняминни бўйнидан қучоқлаб йиғлади, Бенямин ҳам уни қучоқлаганча йиғларди+.
15 Юсуф ҳамма акаларини ўпди ва уларни қучоқлаб йиғлади. Шундан кейин акалари у билан гаплаша бошлашди.
16 «Юсуфнинг акалари келибди!» — деган хабар фиръавннинг саройига етиб борди. Буни эшитиб, фиръавн ҳам, унинг хизматкорлари ҳам хурсанд бўлишди.
17 Фиръавн Юсуфга қуйидагиларни айтди: «Акаларингга: “Юкларингизни уловларга ортиб, Канъон юртига йўл олинглар.
18 Отангизни, хонадон аҳлингизни олиб, бу ерга — менинг олдимга келинглар. Мен сизларга Миср юртининг энг яхши нарсаларини бераман. Сизлар юртнинг энг сара неъматларини ейсизлар”+,— деб айт.
19 Уларга яна бундай дегин+: “Миср юртидан аравалар олиб+, уларга болаларингизни, хотинларингизни ҳамда отангизни ўтирғизиб, бу ерга олиб келинглар+.
20 Қолган мол-мулкингиз учун қайғурманглар+, чунки Миср юртининг энг яхши нарсалари сизларники бўлади”».
21 Исроил ўғиллари айтилгандек қилишди. Юсуф уларга, фиръавннинг буйруғига кўра, аравалар ҳамда йўл учун озиқ-овқат берди.
22 Юсуф акаларининг ҳар бирига биттадан янги кийим-бош, Беняминга эса 300 шекел кумуш билан беш сидра кийим-бош берди+.
23 Отасига бўлса, Мисрнинг энг яхши нарсалари ортилган ўнта эшак ҳамда дон, нон, йўл учун озиқ-овқат юкланган ўнта урғочи эшак бериб юборди.
24 Юсуф акаларини кузатаётиб, уларга: «Тағин йўлда бир-бирингиз билан жанжаллашиб юрманглар»+,— деб тайинлади.
25 Шундай қилиб, улар Миср юртидан чиқишди ва Канъон юртига — оталари Ёқубнинг олдига етиб келишди.
26 Кейин унга: «Юсуф тирик экан! У бутун Миср юртини бошқараётган экан!»+ — деб айтишди. Ёқуб донг қотиб қолди, чунки ўғилларининг гапларига ишонмади+.
27 Улар оталарига Юсуфнинг ҳамма гапларини айтиб беришгандан ва уни олиб келиш учун Юсуф юборган араваларни кўргандан сўнг, Ёқуб ўзига кела бошлади.
28 Кейин Исроил: «Бўлди, ишондим! Ўғлим Юсуф тирик экан! Кўзим очиқлигида уни бориб кўришим керак!»+ — дея хитоб қилди.
Изоҳлар
^ Сўзма-сўз «отаси».
