Shohlar ikkinchi kitob 4:1-12
4 Abnur Xevronda vafot etganini eshitib+, Shoul o‘g‘li Ishbositning+ jasorati so‘ndi. Barcha isroilliklar ham tinchligini yo‘qotdi.
2 U yerda Shoulning o‘g‘liga tegishli bosqinchilar to‘dasiga boshchilik qiladigan ikki kishi bor edi. Birining ismi Banax, boshqasiniki Raxav edi. Ular Benyamin qabilasidan, bero‘tlik Rimmon degan kishining o‘g‘illari edi. (Bero‘t+ Benyamin qabilasining hududiga kirardi.
3 Bero‘tliklar Gitayimga+ qochib borib, bugungacha o‘sha yerda musofir bo‘lib kun kechirishyapti.)
4 Shoul o‘g‘li Yo‘natanning+ oyoqlari mayib* bir o‘g‘li bor edi+. Yizrildan+ Shoul bilan Yo‘natanning o‘limi haqida xabar kelganda, u besh yoshda edi. O‘shanda enagasi uni ko‘tarib qochib ketayotganida, vahimaga tushib qolganidan bolani qo‘lidan tushirib yuborgan va u yiqilib nogiron bo‘lib qolgan edi. Uning ismi Mefibosit+ edi.
5 Bero‘tlik Rimmonning Raxav bilan Banax degan o‘g‘illari kun qizigan vaqtda Ishbositning uyiga borishdi. Tush payti bo‘lgani uchun u dam olayotgan edi.
6 Ular xuddi bug‘doy olgani kelganday uyga kirishdi-da, Ishbositning qorniga qilich sanchib, uni o‘ldirishdi. Keyin aka-uka Raxav bilan Banax+ qochib ketishdi.
7 Ular uyga kirishganda, Ishbosit o‘z yotoqxonasida to‘shakda yotgan edi. Ular uni o‘ldirib, boshini kesib tashlashdi. So‘ng uning boshini olib, tuni bilan Arabaga olib boradigan yo‘ldan yurishdi.
8 Ular Ishbositning+ boshini Xevronga, shoh Dovudga olib borib, unga: «Joningizni* olmoqchi bo‘lgan+ dushmaningiz Shoul+ o‘g‘li Ishbositning boshini sizga keltirdik. Bugun Yahova shoh hazratlariga Shouldan va uning avlodlaridan qasd olishga imkoniyat yaratdi»,— deb aytishdi.
9 Biroq Dovud bero‘tlik Rimmonning o‘g‘illari Raxav bilan Banaxga shunday javob berdi: «Meni barcha kulfatlardan qutqargan* barhayot Yahova shohid+.
10 Bir kishi menga: “Shoul o‘ldi”+,— degan xabar keltirib, bu men uchun yaxshi xabar bo‘ladi deb o‘ylagan edi. Men uni tutib olib Zixlaxda o‘ldirgan edim+. O‘sha xabarchi mendan shunday mukofot olgan edi!
11 Shunday ekan, aybsiz kishini o‘z uyida, o‘z to‘shagida o‘ldirgan yovuz kimsalarni jazosiz qoldirmasligim shubhasiz! Uning qonini sizlarning qo‘lingizdan talab qilib+, sizlarni yer yuzidan yo‘q qilib tashlayman!»
12 So‘ng Dovudning buyrug‘iga binoan, odamlari ularni o‘ldirib+, ikkovining qo‘l-oyoqlarini chopib tashlashdi, tanalarini bo‘lsa Xevrondagi hovuz yoniga osib qo‘yishdi+. Ishbositning boshini esa Xevronga olib borib, Abnur dafn etilgan joyga ko‘mishdi.
