Ibtido 16:1-16
-
Hojar va Ismoil (1-16)
16 Ibromning xotini Soray befarzand edi+. Uning Hojar ismli misrlik cho‘risi bor edi+.
2 Soray Ibromga: «Iltimos, gapimga quloq soling! Yahova menga farzand bermadi. Shuning uchun, cho‘rimning yoniga kiring. Ehtimol, shu yo‘sin men farzandli bo‘larman»+,— deb aytdi. Ibrom Sorayning gapiga quloq soldi.
3 Ibrom Kan’on yurtida yashayotganiga o‘n yil bo‘lganda, uning xotini Soray misrlik cho‘risi Hojarni eri Ibromga xotin qilib berdi.
4 Shunday qilib, Ibrom Hojarga yaqinlashdi va u homilador bo‘ldi. Hojar homilador ekanini bilgach, bekasini mensimay qo‘ydi.
5 Shunda Soray Ibromga: «Mening tahqirlanishimga siz javobgarsiz. O‘zim cho‘rimni qo‘yningizga solib qo‘ydim*. U esa homilador ekanini bilganidan keyin meni nazariga ilmay qo‘ydi. Endi oramizdagi bu masalani Yahovaga soldim»,— deb aytdi.
6 Ibrom Sorayga: «Mana, cho‘ring o‘z izmingda. U bilan qanday yo‘l tutishni ma’qul deb bilsang, shunday qil»,— dedi. So‘ngra, Soray cho‘risini kamsita boshladi va Hojar undan qochib ketdi.
7 Keyinroq Yahovaning farishtasi uni sahrodagi buloq — Shurga+ olib boradigan yo‘ldagi buloq yonidan topdi.
8 U: «Ey, Sorayning cho‘risi Hojar, qayerdan kelib, qayerga ketyapsan?» — deb so‘radi. Hojar unga javoban: «Men bekam Soraydan qochib kelyapman»,— dedi.
9 Yahovaning farishtasi unga: «Bekangning oldiga qaytib bor va unga itoatli bo‘lib yur»,— deb aytdi.
10 So‘ng Yahovaning farishtasi: «Sening zurriyotingni* shunchalik ko‘paytiramanki, ularning sanog‘iga yetolmaysan»+,— dedi.
11 Yahovaning farishtasi unga yana shularni aytdi: «Sen homiladorsan va o‘g‘il tug‘ib, ismini Ismoil* qo‘yasan, chunki Yahova sening faryodingni eshitdi.
12 O‘g‘ling yovvoyi eshakday* bo‘ladi. U hammaga qarshi, hamma unga qarshi chiqadi. U barcha birodarlarining yonida yashab yuradi*».
13 Hojar o‘zi bilan gaplashgan Yahovaga murojaat qilib: «Sen hamma narsani ko‘ra oladigan* Xudosan»+,— dedi. Chunki Hojar: «Haqiqatan ham bu yerda meni ko‘rib turganni ko‘rdimmi?» — deb o‘ylagan edi.
14 Shuning uchun ushbu buloq Ber-Laxay-Ruy*, deb atalib qoldi. (Bu buloq Kadesh bilan Baridning o‘rtasida joylashgan.)
15 Hojar Ibromga o‘g‘il tug‘ib berdi va Ibrom o‘g‘lining ismini Ismoil qo‘ydi+.
16 Hojar Ismoilni tuqqanida, Ibrom 86 yoshda edi.
Izohlar
^ So‘zma-so‘z «qo‘lingizga berdim».
^ So‘zma-so‘z «urug‘ingni».
^ Ma’nosi «Xudo eshitadi».
^ Yoki «qulon». Ayrimlarning fikricha «zebra». Ehtimol bu, o‘ta kuchli mustaqillik ruhini namoyon etishiga ishora qilgan.
^ Boshqa variant «barcha birodarlariga dushman bo‘lib yashaydi».
^ Yoki «meni ko‘rib turgan»; yoki «O‘zini ko‘rsatgan».
^ Ma’nosi «meni ko‘rib turgan barhayot Zotning bulog‘i».
