Levilar 24:1-23
24 Yahova Musoga gapirishda davom etib, dedi:
2 «Moychiroqlar doim yonib turishi uchun, Isroil o‘g‘illariga sof zaytun moyini olib kelib turishni buyur+.
3 Uchrashuv chodirining ichida, shohidlik sandig‘ini to‘sib turgan pardaning tashqi tomonidagi moychiroqlar Yahovaning oldida kechqurundan ertalabgacha doim yonib turishiga Horun javobgar bo‘ladi. Bu, sizlar va barcha avlodlaringiz uchun asrlar osha amal qilinadigan qoida bo‘lsin.
4 Yahovaning oldida turgan sof oltindan yasalgan chiroqpoyaning moychiroqlarini+ Horun doim hozirlab qo‘ysin.
5 Oliy navli undan halqa shaklidagi 12 ta non pishir. Halqa shaklidagi har bir non uchun efaning* o‘ndan ikki qismiga teng un sarflanishi kerak.
6 Nonlarni Yahovaning oldidagi sof oltindan yasalgan stolning ustiga+ ikki taxlam qilib, har bir taxlamga oltitadan qo‘y+.
7 Har bir taxlam ustiga toza xushbo‘y smoladan qo‘y va u Yahovaga atab olovda kuydiriladigan ramz nazrining noni bo‘ladi+.
8 Har Shabbat kuni, nonlar muntazam ravishda Yahovaning huzuriga qo‘yib turilsin+. Bu, Isroil xalqi uchun asrlar osha amal qilinadigan ahd bo‘lsin.
9 Bu nonlar Horun bilan uning o‘g‘illariga tegishli bo‘lsin+ va ularni muqaddas joyda yeyishsin+. Yahovaga atab olovda kuydiriladigan nazrlardan bo‘lgan bu nonlar, ruhoniy uchun g‘oyat muqaddas narsa bo‘lsin. Bu, asrlar osha rioya qilinadigan qoidadir».
10 Isroil o‘g‘illari orasida onasi Isroil xalqidan, otasi misrlik bo‘lgan bir kishi bor edi+. Qarorgohda u bilan Isroil o‘g‘illaridan bo‘lgan bir kishi o‘rtasida janjal chiqdi.
11 Onasi Isroil xalqidan bo‘lgan kishi Xudoning ismiga qarshi haqoratli so‘zlar aytib, qarg‘ashga tushdi+. Shunda uni Musoning oldiga olib borishdi+. Onasining ismi Shalumit bo‘lib, Dan qabilasiga tegishli Dibrining qizi edi.
12 Unga nisbatan Yahovaning qarori aniq bo‘lmaguncha, uni qamab qo‘yishdi+.
13 So‘ng Yahova Musoga shunday dedi:
14 «Qarg‘agan o‘sha kishini qarorgoh tashqarisiga olib chiqinglar. Uning aytgan so‘zlarini eshitganlarning bari qo‘llarini uning boshiga qo‘yishsin, keyin esa butun jamoa uni toshbo‘ron qilsin+.
15 Isroil xalqiga esa bunday deb ayt: “Kim o‘z Tangrisini qarg‘asa, qilgan gunohi uchun javob beradi.
16 Yahovaning ismiga qarshi haqoratli so‘zlar aytgan inson albatta o‘ldirilsin+. Butun jamoa uni toshbo‘ron qilsin. Musofir bo‘ladimi yoki Isroil xalqidanmi, Allohning ismiga qarshi haqoratli so‘zlar aytgan odam o‘ldirilsin.
17 Birovning joniga qasd qilgan inson albatta o‘ldirilsin+.
18 Kim boshqa kishining uy hayvonini urib o‘ldirsa, hayvon evaziga hayvon berib, yetkazgan zararni qoplasin.
19 Bordi-yu, biron kishi yaqiniga jarohat yetkazsa, unga ham jarohat yetkazilsin+.
20 Shikast evaziga shikast, ko‘z evaziga ko‘z, tish evaziga tish. U boshqa insonga qanaqa jarohat yetkazsa, unga ham xuddi shunaqa jarohat yetkazilsin+.
21 Hayvonni urib o‘ldirgan odam keltirgan ziyonining o‘rnini qoplasin+. Ammo kim odam o‘ldirsa, o‘zi ham o‘ldirilsin+.
22 Musofir uchun ham, Isroil xalqidan bo‘lgan inson uchun ham bitta qonun tatbiq etilsin+, chunki Men Tangringiz Yahovaman”».
23 Muso buni Isroil o‘g‘illariga aytdi va ular qarg‘ish so‘zlarini aytgan o‘sha odamni qarorgohning tashqarisiga olib chiqib, toshbo‘ron qilishdi+. Yahova Musoga nimaiki buyurgan bo‘lsa, ular barini bajarishdi.
Izohlar
^ Bir efa=22 l. Ilovaning B14 mavzusiga q.
