Sahroda 14:1-45
14 Shunda butun jamoa faryod ko‘tarib, tuni bilan ho‘ngrab yig‘ladi+.
2 Barcha Isroil o‘g‘illari Muso bilan Horunga qarshi chiqib, noliy boshlashdi+. Butun jamoa: «Qaniydi, Misr yurtida yoki mana shu sahroda o‘lib ketsak edi!
3 Yahova bizni bu yurtga qilichdan o‘tkazgani olib boryaptimi?+ Axir xotinlarimiz-u bola-chaqalarimiz o‘ljaga aylanadi–ku!+ Undan ko‘ra, Misrga qaytganimiz yaxshiroq emasmi?»+ — derdi.
4 Ular hatto bir-biriga: «Kelinglar, ustimizdan boshliq tayinlab, Misrga qaytamiz!»+ — deya boshlashdi.
5 Buni ko‘rgan Muso bilan Horun, butun Isroil jamoasi oldida yerga yuztuban tiz cho‘kishdi.
6 Ushbu yurtni ko‘rib kelganlar orasida bo‘lgan Nun o‘g‘li Yoshua+ va Yafunax o‘g‘li Xolib+ kiyimlarini yirtib,
7 Isroil o‘g‘illarining butun jamoasiga shunday deyishdi: «Biz ko‘zdan kechirib kelgan yurt juda-juda yaxshi yurt ekan+.
8 Agar Yahova bizdan mamnun bo‘lsa, bizni albatta bu yurtga olib borib, sut bilan asal oqib yotgan yurtni bizga beradi+.
9 Faqat Yahovaga qarshi isyon ko‘tarmanglar va ushbu yurtning odamlaridan qo‘rqmanglar+, chunki biz ularni osonlikcha yenga olamiz*. Ular himoyasiz qolgan, Yahova esa biz bilan+. Ulardan qo‘rqmanglar».
10 Ammo jamoa ularni toshbo‘ron qilamiz, deya boshladi+. Shu payt, butun Isroil xalqiga uchrashuv chodiri ustida Yahovaning ulug‘vorligi ko‘rindi+.
11 Yahova Musoga: «Qachongacha bu xalq Menga hurmatsizlik ko‘rsatadi?+ Ularning orasida shuncha alomatlar ko‘rsatganimga qaramay, qachongacha Menga ishonmay yuradi?+
12 Ularga o‘lat yuborib, qirib tashlayman-da, sendan esa ularga qaraganda buyukroq va qudratliroq xalq keltirib chiqaraman»+,— deb aytdi.
13 Lekin Muso Yahovaga bunday dedi: «Buni eshitgan misrliklar nima deydi? Sen bu xalqni O‘z qudrating bilan ularning orasidan olib chiqqan eding-ku+.
14 Axir ular bu haqda ushbu yurtning aholisiga aytib berishadi. Yahova, ular ham Sen shu xalq orasida ekaningni, ular bilan yuzma-yuz ko‘rishganingni+ eshitishgan-ku+. Shuningdek, Sen Yahova ekaningni va Sening buluting shu xalq ustida turganini, kunduzi bulut ustuni orqali, kechasi esa olov ustuni orqali ularning oldida borayotganingni eshitishgan+.
15 Agar bu xalqni bitta qoldirmay o‘ldirib yuborsang, Sening shuhrating to‘g‘risida eshitgan xalqlar:
16 “Yahova bu xalqni O‘zi va’da bergan yurtga olib bora olmay, sahroda qirib tashlabdi”+,— deb aytishmaydimi?
17 Shunday ekan, Yahova, iltimos, qudrating naqadar buyukligini ko‘rsat. Axir O‘zing va’da berib:
18 “Yahova sabr-toqatli*, mehr-sadoqatga* boy+, ayb va gunohni kechiruvchi, shu bilan bir vaqtda aybdorni jazosiz qoldirmaydigan, otalari qilgan gunohning oqibatlarini o‘g‘illari, nevaralari va evaralari boshdan kechirishiga yo‘l qo‘yadigan Tangridir+”,— degan eding-ku.
19 Iltimos, mehr-sadoqating naqadar buyuk ekanini namoyon etib, bu xalqni Misr yurtida bo‘lganidan tortib to hozirgacha kechirib kelganingday, yana kechiraqol»+.
20 Bunga javoban Yahova dedi: «Iltimosingga ko‘ra ularni kechiraman+.
21 Hayotim bilan qasam ichib aytamanki, butun yer yuzi Yahovaning ulug‘vorligiga to‘ladi+.
22 Ammo Mening ulug‘vorligimni va Misrda hamda sahroda yaratgan alomatlarimni+ ko‘rgan bo‘lsa-da, Meni o‘n marta sinab+, gapimga quloq solmaganlarning+ hech biri,
23 Men otalariga va’da bergan yurtni ko‘rmaydi. Ha, Menga hurmatsizlik ko‘rsatganlarning hech biri bu yurtni ko‘rmaydi+.
24 Biroq xizmatkorim Xolib+ o‘zgacha ruhni namoyon etib, butun qalbi bilan Menga ergashgani uchun, o‘zi ko‘rib kelgan yurtga uni olib kiraman va uning avlodi unga egalik qiladi+.
25 Vodiyda omoleklar bilan kan’onliklar yashaydi+. Shu bois, ertaga orqaga burilib, Qizil dengizga olib boradigan yo‘ldan sahroga boringlar»+.
26 Yahova keyin Muso bilan Horunga dedi:
27 «Qachongacha bu yovuz jamoa Mendan noliyveradi?+ Isroil xalqi Mendan noliyotganini eshitdim+.
28 Ularga bunday deb ayt: “Hayotim bilan qasam ichib aytamanki,— deyapti Yahova,— Menga nima deb aytgan bo‘lsangizlar, shuni boshingizga solaman!+
29 Jasadlaringiz shu sahroda qoladi+. Ha, ro‘yxatdan o‘tgan, 20 va undan yuqori yoshdagilarning, Mendan noliganlarning jasadlari shu sahroda qoladi+.
30 Yafunax o‘g‘li Xolib bilan Nun o‘g‘li Yoshuadan bo‘lak hech biringiz, unda yashaysizlar deya sizlarga ont ichgan* yurtga+ kirmaysizlar+.
31 O‘ljaga aylanadi, degan bola-chaqangizni u yerga olib boraman+ va ular sizlar rad etgan yurtdan+ bahramand bo‘lishadi.
32 Sizlarning jasadlaringiz esa shu sahroda qoladi.
33 Barchangiz o‘lib bitmaguningizcha, o‘g‘illaringiz shu sahroda 40 yil+ cho‘ponlik qilib, bevafolik* qilganingiz uchun javob berishadi+.
34 Yurtni ko‘zdan kechirib chiqishga ketgan 40 kunga+ muvofiq — bir kun evaziga bir yildan — qilgan gunohlaringiz uchun 40 yil+ davomida jazo tortasizlar. Shunda, Menga qarshi chiqish qanaqa bo‘lishini bilib olasizlar.
35 Bularni Men — Yahova aytyapman. Ushbu yovuz jamoa bilan — birgalashib Menga qarshi chiqqanlar bilan shunday yo‘l tutaman: shu sahroda ularning kuni bitib, shu yerning o‘zida hammasi o‘lib ketadi+.
36 Shuningdek, Muso yurtni ko‘rib kelish uchun yuborgan kishilar qaytgach, o‘sha yurt haqida yomon xabar keltirib+, butun jamoa Undan nolishiga sababchi bo‘lgan kishilar,
37 ha, o‘sha yurt to‘g‘risida yomon xabar olib kelgan kishilar ham jazolanib, Yahovaning oldida o‘lishadi+.
38 Yurtni ko‘rib kelish uchun yuborilganlar orasidan faqat Nun o‘g‘li Yoshua bilan Yafunax o‘g‘li Xolib tirik qolishadi”+».
39 Muso bu so‘zlarni butun Isroil xalqiga aytganida, xalq qattiq qayg‘urdi.
40 Buning ustiga, ular sahar turib: «Biz gunoh qildik. Lekin endi, Yahova aytgan joyga borishga tayyormiz»,— deya, tog‘ning tepasiga chiqmoqchi bo‘lishdi+.
41 Biroq Muso ularga dedi: «Nega sizlar Yahovaning buyrug‘ini buzyapsizlar? Bu bilan hech narsaga erisha olmaysizlar.
42 Tog‘ga chiqa ko‘rmanglar, chunki Yahova sizlar bilan emas. Dushmanlaringiz sizlarni mag‘lub qiladi+.
43 U yerda omoleklar bilan kan’onliklar sizlarga qarshi chiqib+, qilichdan o‘tkazadi. Yahovaga ergashishdan bosh tortganingiz uchun, Yahova sizlar bilan bo‘lmaydi»+.
44 Ammo ular o‘zbilarmonlik qilib tog‘ning tepasiga chiqishdi+. Muso bo‘lsa, Yahovaning ahd sandig‘i bilan birga qarorgohning o‘rtasida qoldi+.
45 Shunda o‘sha tog‘da yashaydigan omoleklar bilan kan’onliklar pastga tushib, ularga hujum qildi va Xo‘rmaxgacha+ ularni quvib bordi.
Izohlar
^ So‘zma-so‘z «ular biz uchun non bo‘ladi».
^ Yoki «g‘azablanishga shoshmaydigan».
^ Yoki «mehr-inoyatga».
^ So‘zma-so‘z «qo‘limni ko‘targan».
^ So‘zma-so‘z «fohishalik».
