Yeremiyo 29:1-32
29 Surgun bo‘lganlar orasida qolgan oqsoqollar, ruhoniylar, payg‘ambarlarga va shoh Navuxodonosor Quddusdan Bobilga surgun qilgan butun xalqga Yeremiyo payg‘ambar Quddusdan maktub yubordi.
2 Bu xat shoh Yoxoniyo+, shohning onasi+, saroy amaldorlari, Yahudo va Quddus beklari, hunarmandlar-u temirchilar* Quddusdan jo‘natib yuborilganidan so‘ng yozilgan edi+.
3 U maktubni Shofon+ o‘g‘li Elasax hamda Xilqiyo o‘g‘li Gamariyah orqali Bobilga yubordi. Yahudo shohi Zidqiyo+ ularni Bobil shohi Navuxodonosor oldiga jo‘natgan edi. Maktubda shunday deyilgandi:
4 «Isroil Xudosi, Qo‘shinlar Sarvari Yahova O‘zi Quddusdan Bobilga surgun qilgan butun xalqga shunday demoqda:
5 “Uylar qurib, ularda yashanglar. Bog‘lar yaratib, mevalarini yenglar.
6 Uylanib, o‘g‘il-qizlar ko‘ringlar. O‘g‘illaringizni uylantirib, qizlaringizni erga beringlar, toki ular ham o‘g‘il-qizlar ko‘rishsin. Shu yerda ko‘payinglar, soningiz kamaymasin.
7 Men sizlarni surgun qilgan shaharda tinchlik bo‘lishiga harakat qiling, shahar uchun Yahovaga ibodat qiling. Chunki shaharda tinchlik bo‘lsa, sizlar ham tinch yashaysiz+.
8 Isroil Tangrisi, Qo‘shinlar Sarvari Yahova shunday demoqda: “Orangizdagi payg‘ambarlar va folbinlar sizlarni aldashiga yo‘l qo‘ymanglar+, ko‘rgan tushlarini aytib berishganida ularga quloq solmanglar.
9 Chunki Yahova demoqda: “Ular Mening nomimdan yolg‘onni bashorat qilishyapti. Men ularni jo‘natganim yo‘q”»+.
10 «Shuning uchun Yahova demoqda: “Bobildagi 70 yil nihoyasiga yetgach, sizlarga yana nazar solaman+ va sizlarni bu yerga qaytarib olib kelib, va’damni bajaraman”+.
11 “Sizlar haqingizda qilgan niyatlarimni O‘zim yaxshi bilaman, — demoqda Yahova. — Musibat emas, tinchlik keltirish niyatidaman+, sizlarga porloq kelajak va umid baxsh etaman+.
12 Sizlar Meni chaqirasizlar, kelib Menga ibodat qilasizlar va Men sizlarni eshitaman”+.
13 “Meni izlaysizlar va topasizlar+, chunki Meni butun qalbingiz bilan qidirasizlar+.
14 Meni topishingizga izn beraman”+,— demoqda Yahova. “Asirda bo‘lganlaringizni to‘playman, O‘zim sizlarni tarqatib yuborgan barcha xalqlar orasidan va joylardan yig‘ib olaman+, — demoqda Yahova. — Sizlarni qayerdan surgun qilgan bo‘lsam, o‘sha yerga qaytarib olib kelaman”+.
15 Ammo sizlar: “Yahova bizga Bobilda payg‘ambarlar berdi”,— dedingiz.
16 Dovud taxtida o‘tirgan shohga+ va Quddus shahrida yashayotgan butun xalqga — surgunga ketmagan birodarlaringizga Yahova shunday demoqda:
17 “Mana, ularga qarshi qilich, ocharchilik va o‘lat yuboryapman,+ — demoqda Qo‘shinlar Sarvari Yahova. — Ularni yomonligidan yeyishga yaramaydigan, chirigan* anjirlar singari qilaman”+.
18 “Ularni qilich+, ocharchilik va o‘lat bilan ta’qib qilaman. Yer yuzidagi barcha shohliklar ularni ko‘rib dahshatga tushishadi+, qarg‘aganda ularning nomini tilga olishadi va hayratda qolib, hushtak chalishadi+. Men ularni tarqatib yuborgan barcha xalqlar orasida masxara bo‘lishadi+.
19 Chunki ular xizmatchilarim payg‘ambarlar orqali aytgan so‘zlarimni tinglashmadi, — demoqda Yahova. — Men ularni qayta-qayta yuborgandim”+.
“Ammo sizlar quloq solmadingiz”+,— demoqda Yahova.
20 Shu sababli, ey xalq, Men Quddusdan Bobilga surgun qilgan odamlar, Yahovaning so‘zini tinglang!
21 Mening nomimdan sizlarga yolg‘onni bashorat qilayotgan+ Xulayo o‘g‘li Axab hamda Masiyo o‘g‘li Zidqiyo haqida Isroil Tangrisi, Qo‘shinlar Sarvari Yahova shunday demoqda: “Ularni Bobil shohi Navuxodonosor qo‘liga beraman va u ko‘z o‘ngingizda ularni o‘ldiradi.
22 Bobildagi Yahudoning barcha surgun qilinganlari ular bilan sodir bo‘lganlarni qarg‘ish sifatida ishlatib: “Yahova seni Bobil shohi o‘tda kuydirgan Zidqiyo bilan Axabning ko‘yiga solsin!” — deydigan bo‘lishadi.
23 Chunki ular yaqinining xotini bilan zino qilib, Isroilda o‘zlarini sharmandalarcha tutishdi+. Men ularga buyurmagan bo‘lsam-da, Mening nomimdan yolg‘on so‘zlarni aytishdi+.
“Men bundan xabardorman va buning guvohiman”+,— demoqda Yahova».
24 «Naxalamlik Shamayoga+ esa shunday deb aytasan:
25 “Isroil Xudosi, Qo‘shinlar Sarvari Yahova demoqda: “Sen Quddusdagi butun xalqga, Masiyo o‘g‘li ruhoniy Zafaniyoga+ va barcha ruhoniylarga o‘z nomingdan maktub jo‘natib, quyidagilarni aytding:
26 “O‘zini payg‘ambarday tutadigan har qanday telbani nazorat qilib, kundalasin* deb, Yahova seni ruhoniy Yohayido o‘rniga Yahova uyining nazoratchisi bo‘lishing uchun ruhoniy etib tayinlagan edi+.
27 Shunday ekan, nega orangizda o‘zini payg‘ambarday tutayotgan+ onoto‘tlik+ Yeremiyoni jazolamading?
28 U hatto Bobilga, bizlarga maktub yo‘llab, shunday dedi: “Bu uzoq davom etadi! Uylar qurib, ularda yashanglar. Bog‘lar yaratib, mevalarini yenglar...”»+.
29 Ruhoniy Zafaniyo+ bu maktubni Yeremiyoga eshittirib o‘qib berayotganida,
30 Yahova Yeremiyoga quyidagi so‘zini ayon qildi:
31 «Surgunda bo‘lgan butun xalqga quyidagi xabarni jo‘nat: “Yahova naxalamlik Shamayo haqida shunday demoqda: “Men yubormagan bo‘lsam-da, Shamayo sizlarga bashorat qilgani va sizlarni yolg‘onga ishontirmoqchi bo‘lgani uchun+,
32 Yahova demoqda: “Men naxalamlik Shamayoni va avlodlarini jazolayman. Bu xalq orasida uning avlodlaridan birortasi ham omon qolmaydi va Men xalqimga qiladigan yaxshilikni u ko‘rmaydi,— demoqda Yahova. — Chunki u xalqni Yahovaga qarshi isyon ko‘tarishga undadi”».
Izohlar
^ Boshqa variant «qo‘rg‘on quruvchilari».
^ Boshqa variant «yorilib ketgan».
^ Asl matnda bu yerda ikkita so‘z qo‘llanilgan bo‘lib, biri «oyoqlar uchun kunda», ikkinchisi «bosh va qo‘llar uchun kunda» ma’nosini anglatishi mumkin.
