Zakariyo 12:1-14
12 Xudoning xabari:
«Bu, Yahovaning Isroil to‘g‘risidagi so‘zi»,— demoqda Yahova.U samolarni yoygan+,Yerning poydevorini o‘rnatgan+,Inson ichidagi ruhni* yaratgan.
2 «Men Quddusni, atrofdagi xalqlarni mast qilib, gandiraklatib qo‘yadigan qadahga aylantiraman. Yahudo bilan Quddus qamal qilinadi+.
3 O‘sha kuni Men Quddusni barcha xalqlar uchun og‘ir bir tosh qilib qo‘yaman. Uni ko‘targanlarning hammasi qattiq jarohat olishi aniq+. Yer yuzidagi jamiki millatlar unga qarshi to‘planadi»+.
4 Yahova demoqda: «O‘sha kuni hamma otlarni vahimaga solib, suvorilarini aqldan ozdiraman. Yahudo xonadoniga ko‘zimni tikaman, xalqlarning hamma otlarini esa ko‘r qilib qo‘yaman.
5 Yahudo shayxlari ko‘nglida: “Quddus aholisi biz uchun qudrat manbai, chunki Qo‘shinlar Sarvari Yahova ularning Xudosidir”+,— deb aytishadi.
6 O‘sha kuni Men Yahudo shayxlarini o‘rmon ichidagi olovday, o‘rib olingan don bog‘lamlari orasidagi mash’aladay qilib qo‘yaman+. Ular o‘ng va chap tomonidagi hamma xalqlarni kuydirib kulga aylantirishadi+. Quddus aholisi yana o‘z joyida — Quddusda yashaydi+.
7 Dovud xonadonining hamda Quddus aholisining shon-shuhrati Yahudonikidan ustun turmasligi uchun, Yahova avvaliga Yahudo chodirlarini qutqaradi.
8 O‘sha kuni Yahova Quddusda yashovchilarni himoya qiladi+. O‘sha kuni ularning orasidagi qoqilib yuradiganlar* Dovudday kuchli, Dovud xonadoni esa ilohiy zotday, ularni boshlab boradigan Yahovaning farishtasiday bo‘ladi+.
9 O‘sha kuni Quddusga qarshi chiqqan hamma millatlarni aniq yo‘q qilaman+.
10 Men Dovud xonadoni va Quddus aholisi ustiga iltifot-u iltijo ruhini yog‘diraman. O‘zlari badanini teshgan kishiga ular qarab turishadi+. Ular yagona o‘g‘li uchun aza tutayotganday yig‘lashadi, to‘ng‘ichi uchun qayg‘u chekayotganday qattiq qayg‘urishadi.
11 O‘sha kuni Quddusdagi faryod, Maxido‘+ tekisligida joylashgan Hadad-Rimmondagi dod-faryodday bo‘ladi.
12 Butun yurtda yig‘i ko‘tariladi, har bir oila alohida yig‘laydi. Dovud xonadonining oilalari alohida, ularning ayollari alohida yig‘laydi. Natan+ xonadonining oilalari alohida, ularning ayollari alohida yig‘laydi.
13 Levi+ xonadonining oilalari alohida, ularning ayollari alohida yig‘laydi. Shimey+ xonadonining oilalari alohida, ularning ayollari alohida yig‘laydi.
14 Qolgan oilalarning hammasi alohida, ularning ayollari alohida yig‘laydi.
