Yettita mamlakatdan bo‘lgan minglab Yahovaning Shohidlari Shri Lankadagi birodar-u opa-singillari bilan u yerda o‘tgan ilk maxsus anjumandan bahramand bo‘ldi. «Jasoratli bo‘ling!» deb nomlangan maxsus anjuman 2018-yili 6–8-iyul kunlari poytaxt shahar Kolombodagi «Sugatadasa» milliy sport kompleksida bo‘lib o‘tdi. Kelganlarning yuqori soni 14 121 kishini tashkil etdi. Diqqatga sazovor voqealar Yetakchi kengash a’zosining nutqlari, Shri Lankada har qachongidan ham ko‘proq odam suvga cho‘mgani va mahalliy birodar-u opa-singillarimiz deyarli 3 500 ta kishiga o‘zgacha mehmondo‘stlik ko‘rsatgani bo‘ldi.

Tayyorgarliklar 2017-yili sentyabrda, Shri Lankadagi mahalliy jamoatlar maxsus anjuman bo‘lishi to‘g‘risida xabar olganida boshlandi. Tadbirni o‘tkazish uchun ko‘rilgan barcha tayyorgarliklardan tashqari, stadionni anchagina ta’mirlash va tozalash kerak edi. Bu bo‘yashni, axlatni tozalashni, singan stullarni tuzatishni va yo‘llardagi chuqurlarni yopishni o‘z ichiga oldi. Anjuman bo‘lishidan uch hafta oldin yuzlab Shohidlar yordamga keldi. Xavfsizlik xizmati xodimining aytishicha, birodarlarimiz juda qisqa vaqt ichida amalga oshirgan ta’mirlash ishlarini qilish uchun to‘rt yil kerak bo‘lardi.

Ma’naviy dastur Shri Lanka madaniyatining yorqin taraflarini ko‘rsatadigan turli tadbirlar bilan yakun topdi. Ayniqsa, milliy raqs va qo‘shiqlar dasturning unutilmas lahzalariga aylandi. Unda, shuningdek, yosh Shohidlar hamdu-sano qo‘shiqlarini kuyladi.

Shri Lankadagi filial vakili Ashli Ferdinands quyidagicha dedi: «Maxsus anjuman mamlakatimizdagi birodar-u opa-singillar uchun ajoyib hadya bo‘ldi va ko‘pgina mehmonlarni kutib olish sharafiga ega qildi. Ushbu anjuman yaxshi o‘tishi uchun yordamini ayamagan anchagina ixtiyoriy xizmatchilardan minnatdormiz. Albatta, bularning barchasi uchun yaxshi hadyalarning Manbai bo‘lmish samoviy Otamizni ulug‘laymiz». (Yoqub 1:17)