Vhane ra vha vhala uri ndi Ṱhanzi dza Yehova ndi vhane vha ṱanganela nga u fhisea kha u huwelela mafhungo maḓifha a Muvhuso wa Mudzimu ṅwedzi muṅwe na muṅwe. (Mateo 24:14) Kha vhenevho vhathu, hu katelwa vhane vha vha Ṱhanzi dzo lovhedzwaho, kathihi na vhane naho vha sa athu lovhedzwa, vha fanelea u shela mulenzhe kha mushumo wa u huwelela.

 Hai. A zwi vhuyi zwa ṱoḓa uri muthu a ṋeele uri a vhe muṅwe wa Ṱhanzi kana uri a ṋewe mushumo kana ndugelo kha ndangulo yashu. (Mishumo 8:18-20) Zwi re zwone ndi uri vhunzhi ha miṋeelo yashu i bva kha vhathu vhane musi vha tshi ṋeela, vha sa ṅwale madzina avho. Muṅwe na muṅwe ane a vha Ṱhanzi u ṋeela tshifhinga tshawe, nungo dzawe na thundu yashu kha mushumo washu wa shango ḽoṱhe u ya nga zwine a zwi tama na zwiimo zwawe.—2 Vhakorinta 9:7.

 Ṅwedzi muṅwe na muṅwe, Ṱhanzi dzi rumela muvhigo wa mushumo wa u huwelela we vha u ita tshivhidzoni tshine vha ṱanganela khatsho. Hezwi zwi itwa nga u ḓifunela.

 Mivhigo ya tshivhidzo i a ṱanganywa nahone ya rumelwa ofisini ya davhi. Davhi ḽi rumela mivhigo ya shango ḽiṅwe na ḽiṅwe ḽine ḽa vha fhasi haḽo ofisini dzashu khulwane.

 Nga murahu ha ṅwaha muṅwe na muṅwe wa tshumelo, a hu ṅwalwa tshivhalo tsha Ṱhanzi dzi re hone shangoni ḽiṅwe na ḽiṅwe. Tshenetsho tshivhalo tshi a ṱanganywa u itela u vhona mbalo ya Dziṱhanzi shangoni ḽoṱhe. Mivhigo yo dodombedzwaho ya shango ḽiṅwe na ḽiṅwe, u katela na tshenzhelo dza mushumo wa u huwelela, zwi a gandiswa kha Yearbook of Jehovah’s Witnesses. Yeneyo mivhigo i a ri ṱuṱuwedza, samusi na Vhakriste vha ḓanani ḽa u thoma ḽa miṅwaha vho ṱuṱuwedzwa nga mivhigo i fanaho na yeneyo.​—Mishumo 2:​41; 4:4; 15:3.

 Naho ri sa kateli vhathu vho raloho kha tshivhalo tsha Dziṱhanzi, ri a vha ṱanganedza nga mbilu tshena zwivhidzoni zwashu. Vhunzhi havho vha vha hone nga Tshihumbudzo tsha lufu lwa Kristo tsha ṅwaha muṅwe na muṅwe, tshivhalo tshavho ri tshi wana musi ri tshi sedza phambano vhukati ha vhane vha vha hone kha wonoyu muṱangano na tshivhalo tsha Dziṱhanzi. Nga 2023, vhe vha vha hone Tshihumbudzoni ndi vha 20 461 767.

 Vhunzhi ha vhane vha si ḓe miṱanganoni yashu vha vhuyelwa nga mbekanyamushumo yashu ya pfunzo ya Bivhili ya mahala ya hayani. Nga 2023, nga u tou angaredza ro fara pfunzo dza Bivhili dza 7 281 212 ṅwedzi muṅwe na muṅwe, dziṅwe dza hone dzo farwa nga tshifhinga tshithihi na vhathu vho fhamba-fhambanaho.

 Kanzhi mihasho ya muvhuso ine ya vhala vhathu i tou vhudzisa vhathu uri vha dzhena kereke ifhio. Sa tsumbo, Muhasho wa U Vhala Vhathu wa United States u amba uri tsenguluso yavho “ndi ya u ṱoḓa u vhona arali vhathu vhane wa vha vhudzisa vha dzi ḓidzhia sa vhathu vha vhurereli,” wa engedza nga ḽa uri tshivhalo tshine wa tshi wana “tshi ya nga zwiimo.” Riṋe ri ita zwo fhambanaho na zwenezwo, vhane ra vha vhala uri ndi Ṱhanzi dza Yehova ndi vhane vha huwelela na u vhiga wonoyo mushumo, hu si vhane vha sokou ḓivhidza uri ndi Ṱhanzi dza Yehova.