Bugu Ya U Thoma Ya Dzikhosi 15:1-34
15 Nga ṅwaha wa vhu 18 hu tshi khou vhusa Khosi Yerobeamu+ murwa wa Nebatha, Abiamu a vha khosi kha ḽa Yuda.+
2 O vhusa miṅwaha miraru Yerusalema. Mme awe o vha a tshi pfi Maaka+ muḓuhulu wa Abishalomo.
3 O tevhedza zwivhi zwoṱhe zwe khotsi awe a zwi ita, o vha a si tsha shumela* Yehova Mudzimu wawe nga mbilu yawe yoṱhe, u fana na Davida makhulukuku wawe.
4 Naho zwo ralo, a tshi itela Davida,+ Yehova Mudzimu wawe o mu ṋea luvhone ngei Yerusalema+ nga u vhea murwa wawe uri a vhe khosi na u ita uri Yerusalema hu dzule hu hone.
5 Davida o ita zwo lugaho phanḓa ha Yehova, maḓuvha oṱhe a vhutshilo hawe o ita zwoṱhe zwe a vha o laiwa, nga nnḓa ha mafhungo a Uria wa Muhethe.+
6 Misi yoṱhe ya vhutshilo ha Abiamu ho vha hu na nndwa vhukati ha Rehabeamu na Yerobeamu.+
7 Mafhungo oṱhe a Abiamu na zwoṱhe zwe a ita, naa a zwo ngo ṅwaliwa buguni ya mafhungo a zwifhingani zwa kale zwa mahosi a Yuda?+ Ha vha na nndwa vhukati ha Abiamu na Yerobeamu.+
8 Abiamu a vhulungwa na vhomakhulukuku wawe Muḓini wa Davida; murwa wawe Asa+ a vha khosi vhudzuloni hawe.+
9 Nga ṅwaha wa vhu 20 hu tshi khou vhusa Khosi Yerobeamu wa Isiraele, Asa a thoma u vhusa kha ḽa Yuda.
10 O vhusa Yerusalema miṅwaha ya 41. Makhulu wawe o vha a tshi pfi Maaka+ muḓuhulu wa Abishalomo.
11 Asa o ita zwo lugaho phanḓa ha Yehova,+ u fana na Davida makhulukuku wawe.
12 O pandela vhanna vha rengisaho muvhili thembeleni shangoni ḽeneḽo,+ a fhelisa midzimu yoṱhe ya zwifanyiso i nengisaho,* yo itwaho nga vhomakhulukuku wawe.+
13 O dzhiela makhulu wawe Maaka+ vhuimo ha nṱha, ngauri Maaka o vha o ita tshifanyiso tshi shumiswaho hu tshi gwadamelwa thanda khethwa.* Asa a rema tshenetsho tshifanyiso tshi nengisaho,+ a tshi fhisa Govhani ḽa Kidironi.+
14 Fhedzi ho ngo thutha fhethu ha vhurabeli.+ Naho zwo ralo, Asa o shumela Yehova nga mbilu yawe yoṱhe kha vhutshilo hawe hoṱhe.
15 A ḓisa zwithu zwe ene na khotsi awe vha zwi ita zwikhethwa nḓuni ya Yehova: siḽiva, musuku na thundu dzo fhambanaho.+
16 Asa na Baasha+ khosi ya Isiraele vho vha vha tshi dzulela u lwa.
17 Khosi Baasha wa Isiraele a ḓa a lwa na Yuda, a fhaṱa* Rama+ uri a thivhele vhathu uri vha si dzhene kana u bva shangoni ḽa Khosi Asa wa Yuda.+
18 Asa a dzhia siḽiva yoṱhe na musuku mbulungeloni dza nḓuni ya Yehova na mbulungeloni dza nḓuni* ya khosi a zwi ṋea vhashumeli vhawe. Khosi Asa a vha ruma kha Benihadada murwa wa Tabarimoni murwa wa Hesioni, khosi ya Siria+ i dzulaho Damaseko, a ri:
19 “Hu na thendelano* vhukati hanga na iwe na vhukati ha khotsi anga na khotsi au. Ndi khou u rumela tshifhiwa tsha siḽiva na tsha musuku. Iḓa u fhelise thendelano* ye wa i ita na Khosi Baasha wa Isiraele uri a nnditshe.”
20 Benihadada a thetshelesa Khosi Asa, a ruma vhalangammbi vhawe uri vha ye vha lwe na miḓi ya Isiraele, vha kunda muḓi wa Iyoni,+ Dani,+ Abele-bethe-maaka, ḽoṱhe ḽa Kinerothe na shango ḽa Nafutali.
21 Musi Baasha a tshi zwi pfa, a ṱavhanya a litsha u fhaṱa Rama, a bvela phanḓa a tshi dzula Thiritsa.+
22 Khosi Asa a vhidza Vhayuda vhoṱhe, ho vha hu songo fanela u sala na muthu na muthihi, vha hwala matombo na matanda a ngei Rama zwe Baasha a vha a tshi khou fhaṱa ngazwo, Khosi Asa a fhaṱa* ngazwo muḓi wa Geba+ ngei Benyamini na Mitsipa.+
23 Mafhungo oṱhe a Asa na mishumo yawe i sumbedzaho u vha na maanḓa na zwoṱhe zwe a ita na miḓi ye a i fhaṱa,* naa a zwo ngo ṅwaliwa buguni ya mafhungo a zwifhingani zwa kale zwa mahosi a Yuda? Musi o no kalaha a farwa nga vhulwadze ha milenzhe.+
24 Asa a vhulungwa na vhomakhulukuku wawe Muḓini wa Davida makhulukuku wawe; murwa wawe Yehoshafati+ a vha khosi vhudzuloni hawe.
25 Nadaba+ murwa wa Yerobeamu a vha khosi ya Isiraele nga ṅwaha wa vhuvhili hu tshi khou vhusa Khosi Asa wa Yuda, a vhusa Isiraele miṅwaha mivhili.
26 O ita zwi sa takadzi Yehova, a tshimbila nḓilani dza khotsi awe,+ a ita uri Isiraele ḽi ite tshivhi.+
27 Baasha murwa wa Ahia wa nnḓu ya Isashari a mu itela tshimbevha, Baasha a mu vhulaya ngei Gibethoni+ muḓini wa Vhafilisita, tshifhingani tshe Nadaba na Vhaisiraele vhoṱhe vha vha vho tanga Gibethoni.
28 Ngauralo, Baasha a mu vhulaya nga ṅwaha wa vhuraru hu tshi khou vhusa Khosi Asa wa Yuda, a vha khosi vhudzuloni hawe.
29 Musi a tshi tou vha khosi, o vhulaya vha nnḓu yoṱhe ya Yerobeamu. Ho ngo sia na muthu na muthihi wa Yerobeamu a tshi khou tshila, o vha fhelisa u tendelana na zwe Yehova a zwi amba a tshi shumisa mushumeli wawe Ahia wa Mushiḽo.+
30 Zwenezwi zwo itiswa nga zwivhi zwe Yerobeamu a zwi ita, a ita uri Isiraele ḽi ite tshivhi, na nge a sinyusa nga maanḓa Yehova Mudzimu wa Isiraele.
31 Mafhungo oṱhe a Nadaba na zwoṱhe zwe a ita, naa a zwo ngo ṅwaliwa buguni ya zwifhingani zwa kale zwa mahosi a Isiraele?
32 Asa na Baasha khosi ya Isiraele vho vha vha tshi dzulela u lwa.+
33 Nga ṅwaha wa vhuraru hu tshi khou vhusa Khosi Asa wa Yuda, Baasha murwa wa Ahia a vha khosi kha ḽoṱhe ḽa Isiraele ngei Thiritsa, a vhusa miṅwaha ya 24.+
34 Fhedzi o bvela phanḓa a tshi ita zwi sa takadzi Yehova,+ a tshimbila nḓilani dza Yerobeamu, a ita uri Isiraele ḽi ite tshivhi.+
Ṱhaluso dzi re magumoni a siaṱari
^ Kana “ḓikumedzela tshoṱhe kha.”
^ Ipfi ḽine ḽa amba zwenezwi ḽa Tshihevheru ḽi tshimbidzana na ipfi “vhutoko” nahone ḽi shumiswa sa mubulo wa u goḓa.
^ Sedzani Mutevhe Wa Ṱhalutshedzo Ya Maipfi.
^ Kana “khwaṱhisa; fhaṱulula.”
^ Kana “pfamoni.”
^ Kana “mulanga.”
^ Kana “mulanga.”
^ Kana “khwaṱhisa; fhaṱulula.”
^ Kana “khwaṱhisa; fhaṱulula.”
