Bugu Ya U Thoma Ya Dzikhosi 2:1-46
2 Musi Davida e tsini na u fa, a laya murwa wawe Salomo a ri:
2 “Ndi tsini na u fa. Ngauralo, ḓikhwaṱhise+ u vhe na tshivhindi.+
3 U thetshelese Yehova Mudzimu wau nga u tshimbila nḓilani dzawe na u tevhedza maitele awe, ndaela dzawe, khaṱhulo na khumbudzo dzawe, samusi zwo ṅwaliwa kha Mulayo wa Mushe;+ ndi hone u tshi ḓo bvelela* kha zwoṱhe zwine wa ḓo zwi ita huṅwe na huṅwe hune wa ḓo ya.
4 Yehova u ḓo ita zwe a mpfulufhedzisa a ri: ‘Arali vharwa vhau vha thetshelesa vha tshimbila phanḓa hanga nga u fhulufhedzea nga mbilu dzavho dzoṱhe na nga zwoṱhe zwine vha vha zwone,+ hu ḓo dzula hu na munna wa lushaka lwau kha khuluṋoni ya Isiraele.’+
5 “Na iwe u a zwi ḓivha zwavhuḓi zwe Yoaba murwa wa Tseruya a nnyita, zwe a ita vhalangammbi vhavhili vha Isiraele, Abinere+ murwa wa Nere na Amasa+ murwa wa Yethere. O vha vhulaya, a shulula malofha+ musi ḽo lala, a ḓodza malofha a nndwa kha bannda ḽe ḽa vha ḽi khunduni dzawe na kha thovho* dze a vha o dzi ambara milenzheni yawe.
6 U ite nga vhuṱali uri mmvi dzawe dzi si ye Vhiḓani* nga mulalo.+
7 “Fhedzi vharwa vha Barasilai+ wa Mugiḽiada u vha sumbedze lufuno lu sa shanduki, vha fanela u vha vhaṅwe vha vhane vha ḽa ṱafulani yau, ngauri vho ntikedza+ musi ndi tshi khou shavha Abesalomo mukomana wau.+
8 “Hu dovha ha vha na Shimei murwa wa Gera wa Mubenyamini wa ngei Bakurimi. Ndi ene we a ntsema+ lu ṱungufhadzaho nga ḓuvha ḽe nda vha ndi tshi khou ya Mahanaimi;+ fhedzi musi a tshi ḓa u nṱanganedza ngei Mulamboni wa Yorodane, ndo mu anela nga Yehova nda ri: ‘A thi nga u vhulayi nga banga.’+
9 U songo litsha u mu pfisa vhuṱungu,+ ngauri wo ṱalifha, u a ḓivha zwine wa fanela u mu ita; u ise mmvi dzawe Vhiḓani* dzi na malofha.”+
10 Davida a vhulungwa na vhomakhulukuku wawe Muḓini wa Davida.+
11 Davida o vhusa Isiraele miṅwaha ya 40. O vhusa miṅwaha ya 7 e Heburoni,+ a vhusa miṅwaha ya 33 e Yerusalema.+
12 Salomo a dzula kha khuluṋoni ya Davida khotsi awe, vhuhosi hawe ha ḓi khwaṱha vhu tshi ya.+
13 Nga murahu ha tshifhinga, Adonia murwa wa Hagithi a ya ha Batseba mme a Salomo. Batseba a mu vhudzisa u ri: “Naa wo ḓa nga mulalo?” Adonia a fhindula a ri: “Ndo ḓa nga mulalo.”
14 A ri: “Ndi na mafhungo ane nda ṱoḓa u u vhudza one.” Batseba a ri: “Amba.”
15 Ene a ri: “U a zwi ḓivha zwavhuḓi uri vhuhosi ho vha hu hanga, Vhaisiraele vho vha vha tshi khou lavhelela uri ndi vhe khosi;+ fhedzi zwithu zwa shanduka vhuhosi ha vha ha murathu wanga, ngauri ndi Yehova we a mu ṋea hone.+
16 Fhedzi zwino ndi khou humbela tshithu tshithihi kha iwe. U songo mpandela.” Batseba a amba nae a ri: “Amba.”
17 Adonia a ri: “Ndi humbela uri u ambe na khosi Salomo a nṋee Abisaga+ wa Musunema uri a vhe mufumakadzi wanga, ngauri iwe u ḓo u thetshelesa.”
18 Batseba a mu fhindula a ri: “Zwo luga! Ndi ḓo u ambela na khosi.”
19 Batseba a ya ha Khosi Salomo uri a ambele Adonia. Khosi ya ṱavhanya ya takuwa uri i mu ṱanganedze na u mu losha. Ya dzula kha khuluṋoni yayo ya ri hu ḓiswe khuluṋoni ya mme ayo uri a dzule kha tsha u ḽa tshayo.
20 Batseba a ri: “Hu na tshithu tshithihi tshiṱuku tshine nda ṱoḓa u u humbela tshone. U songo ntshonisa.” Khosi ya ri: “Mme anga, nkhumbele; a thi nga u shonisi.”
21 Batseba a ri: “Abisaga wa Musunema nga a ṋewe Adonia mukomana wau uri a vhe mufumakadzi wawe.”
22 Khosi Salomo a fhindula mme awe a ri: “Ndi ngani u tshi khou humbela uri Abisaga wa Musunema a ṋewe Adonia? U nga dovha wa mu humbelela na vhuhosi+ ngauri ndi mukomana wanga,+ u khou tikedzwa nga tshifhe Abiathara na Yoaba+ murwa wa Tseruya.”+
23 Khosi Salomo a ana nga Yehova a ri: “Ngavhe Mudzimu a tshi nnyita tsha uri na tsha uri a dovhe a engedze arali zwe Adonia a zwi humbela zwi sa vhei vhutshilo hawe khomboni.
24 Ndi ana nga Yehova a tshilaho, we a nkhwaṱhisa+ a ndzudza kha khuluṋoni ya Davida khotsi anga, we a mphaṱela nnḓu,*+ samusi o fhulufhedzisa, ndi ri ṋamusi Adonia u ḓo vhulawa.”+
25 Khosi ya ṱavhanya ya ruma Benaya+ murwa wa Yehoyada, a ya a vhulaya Adonia.
26 Khosi ya amba na tshifhe Abiathara+ ya ri: “Iya masimuni au ngei Anathothe!+ Ngauri wo tewa nga u fa, fhedzi ndi nga si u vhulaye ṋamusi, ngauri wo vha u tshi hwala Mbulungelo ya Yehova Murena Muvhusahoṱhe tshifhingani tsha Davida khotsi anga,+ wo tambula na khotsi anga.”+
27 Ngauralo, Salomo a pandela Abiathara uri a si tsha vha tshifhe wa Yehova, a ita zwe Yehova a zwi amba nga ha nnḓu ya Eli+ ngei Shiḽo.+
28 Musi Yoaba we a vha a tshi tikedza Adonia+ a tshi pfa eneo mafhungo, naho a songo tikedza Abesalomo,+ a shavhela denndeni ḽa Yehova+ a swika a farelela ṋanga dza aḽeṱare.
29 Khosi Salomo a vhudzwa uri: “Yoaba o shavhela denndeni ḽa Yehova, o ima henefho tsini na aḽeṱare.” Ngauralo, Salomo a ruma Benaya murwa wa Yehoyada, a ri: “Iya u mu vhulaye!”
30 Benaya a swika denndeni ḽa Yehova, a amba na Yoaba a ri: “Khosi i ri: ‘Ibva afho!’” Fhedzi ene a ri: “Aiwa! Ndi ḓo fela henefha.” Benaya a vhuyelela kha khosi a ri: “Yoaba o mmbudza zwenezwo musi a tshi mphindula.”
31 Khosi ya amba nae ya ri: “Mu ite zwe a amba; mu vhulaye u mu vhulunge, u ṱanzwe nṋe na vha nnḓu ya khotsi anga malofha e Yoaba a a shulula hu si na tshiitisi.+
32 Yehova u ḓo vhila eneo malofha kha ṱhoho ya Yoaba, ngauri o vhulaya vhanna vhavhili vho lugaho u mu fhira nga banga khotsi anga Davida a sa zwi ḓivhi: Vhenevho vhanna ndi Abinere+ murwa wa Nere, mulangammbi wa Isiraele+ na Amasa+ murwa wa Yethere, mulangammbi wa Yuda.+
33 Malofha avho a ḓo vhilwa kha Yoaba na kha ṱhoho dza vhana vhawe u ya nga hu sa fheli;+ fhedzi ngavhe hu tshi vha na mulalo u bvaho ha Yehova nga hu sa fheli kha Davida, kha vhana* vhawe, kha nnḓu yawe na kha khuluṋoni yawe.”
34 Benaya murwa wa Yehoyada a ya a mu vhulaya, a vhulungwa nḓuni yawe ngei sogani.
35 Khosi ya vhea Benaya+ murwa wa Yehoyada uri a vhe mulangammbi vhudzuloni ha Yoaba, khosi ya vhea tshifhe Tsadoko+ vhudzuloni ha Abiathara.
36 Mafheleloni khosi ya vhidza Shimei+ ya amba nae ya ri: “Ḓifhaṱele nnḓu Yerusalema, u dzule henefho; u songo bva henefho wa ya huṅwe fhethu.
37 Ḓuvha ḽine wa ḓo bva henefho wa wela Govha ḽa Kidironi,+ u ḓivhe uri u ḓo fa. Mulandu wa malofha au u ḓo vhilwa nṱha ha ṱhoho yau.”
38 Shimei a amba na khosi a ri: “Zwe wa amba zwi a pfala. Mushumeli wau u ḓo ita zwe thovhela muṋe wanga a amba.” Ngauralo, Shimei a dzula Yerusalema tshifhinga tshilapfu.
39 Fhedzi musi ho no fhela miṅwaha miraru, phuli mbili dza Shimei dza shavhela ha Akise+ murwa wa Maaka khosi ya Gathi. Musi Shimei a tshi vhudzwa uri: “Phuli dzau dzo shavhela ngei Gathi,”
40 Shimei a ṱavhanya a dzhia sale a i vhofhelela kha donngi yawe a ya ha Akise ngei Gathi u ṱoḓa phuli dzawe. Musi Shimei a tshi vhuya ngei Gathi na phuli dzawe,
41 Salomo a vhudzwa uri: “Shimei o bva Yerusalema a ya Gathi, a dovha a vhuya.”
42 Khosi ya vhidza Shimei ya amba nae ya ri: “Naa a tho ngo u anisa nga Yehova nda u sevha nda ri: ‘Ḓuvha ḽine wa ḓo bva fhano wa ya huṅwe fhethu, u ḓivhe uri u ḓo fa’? Naa a wo ngo mmbudza uri: ‘Zwe wa amba zwi a pfala, ndi ḓo zwi tevhedza’?+
43 Zwino ndi ngani u songo tevhedza muano we wa aniwa phanḓa ha Yehova na ndaela ye nda u ṋea yone?”
44 Khosi ya amba na Shimei ya ri: “Mbiluni yau u a zwi ḓivha zwe wa khakhela khotsi anga Davida ngazwo,+ Yehova u ḓo vhila honoho vhukhakhi kha ṱhoho yau.+
45 Fhedzi Khosi Salomo u ḓo fhaṱutshedzwa,+ khuluṋoni ya Davida i ḓo khwaṱha phanḓa ha Yehova lini na lini.”
46 Khosi ya laya Benaya murwa wa Yehoyada, a ya a mu vhulaya.+
Muvhuso wa khwaṱha musi hu tshi khou vhusa Salomo.+
Ṱhaluso dzi re magumoni a siaṱari
^ Kana “ita nga vhuṱali.”
^ Kana “phashane, navhula.”
^ Kana “Sheol.” Sedzani Mutevhe Wa Ṱhalutshedzo Ya Maipfi.
^ Kana “Sheol.” Sedzani Mutevhe Wa Ṱhalutshedzo Ya Maipfi.
^ Kana “muvhuso.”
^ Kana “vhaḓuhulu.”
