Bugu Ya U Thoma Ya Dzikhosi 21:1-29
21 Nga murahu ha zwenezwo zwithu, ha vha na mafhungo a tsimu ya minḓirivhe ya Nabothe wa Muyeseriele; yo vha i ngei Yeseriele,+ tsini na pfamo ya Ahaba khosi ya Samaria.
2 Ahaba a amba na Nabothe a ri: “Nṋee tsimu yau ya minḓirivhe uri ndi lime miroho khayo, ngauri i tsini na nnḓu yanga. Vhudzuloni hayo ndi ḓo u ṋea tsimu ya minḓirivhe ya khwine. Kana arali u tshi funa, ndi ḓo i renga nga mutengo wo i teaho.”
3 Fhedzi Nabothe a amba na Ahaba a ri: “Yehova a nga si ntendele ndi tshi ita zwithu zwo raloho, uri ndi u ṋee ifa ḽa vhomakhulukuku wanga.”+
4 Ahaba a vhuyelela nḓuni yawe, o sinyuwa na u ṱungufhadzwa nga zwe Nabothe wa Muyeseriele a zwi amba a tshi ri: “Ndi nga si u ṋee ifa ḽa vhomakhulukuku wanga.” Ahaba a eḓela mmbeteni wawe, o lavhelesa luvhondo, a si tende u ḽa zwiḽiwa.
5 Mufumakadzi wawe Isabele+ a ḓa khae a mu vhudzisa a ri: “Ndi ngani wo ṱungufhala u sa tendi u ḽa zwiḽiwa?”
6 Ahaba a mu fhindula a ri: “Ndo amba na Nabothe wa Muyeseriele nda ri: ‘Nthengisele tsimu yau ya minḓirivhe. Kana arali u tshi funa, ndi ḓo u ṋea iṅwe tsimu ya minḓirivhe vhudzuloni hayo.’ Fhedzi ene a ri: ‘A thi nga u ṋei tsimu yanga ya minḓirivhe.’”
7 Mufumakadzi wawe Isabele a amba nae a ri: “Naa a si iwe ane a khou vhusa Isiraele? Vuwa u ḽe, u takale. Ndi ḓo u ṋea tsimu ya minḓirivhe ya Nabothe wa Muyeseriele.”+
8 A ṅwala marifhi nga dzina ḽa Ahaba a gandisa nga luswayo lwawe,+ a rumela eneo marifhi kha vhahulwane+ na vharangaphanḓa vhane vha dzula muḓini muthihi na Nabothe.
9 Kha eneo marifhi o ṅwala uri: “Ḓivhadzani ḓuvha ḽa u ḓidzima, Nabothe a dzule phanḓa ha vhathu vhoṱhe.
10 Ni dzudze vhanna vha sa ḓivhalei phanḓa hawe, ni ri vha mu pomoke+ vha ri: ‘Wo sema Mudzimu na khosi!’+ Ni kone u mu bvisela nnḓa ni mu kanḓe nga matombo a fe.”+
11 Vhathu vha wonoyo muḓi, vhahulwane na vharangaphanḓa vhane vha dzula muḓini muthihi na Nabothe, vha ita zwe Isabele a vha laya zwone kha marifhi e a vha rumela one.
12 Vha ḓivhadza tshifhinga tsha u ḓidzima, vha dzudza Nabothe phanḓa ha vhathu.
13 Vhanna vhavhili vha sa ḓivhalei vha dzhena vha dzula phanḓa hawe vha thoma u pomoka Nabothe vhathu vhoṱhe vha tshi zwi pfa vha ri: “Nabothe o sema Mudzimu na khosi!”+ Nga murahu ha zwenezwo vha mu bvisela nnḓa ha muḓi vha mu kanḓa nga matombo a fa.+
14 Vha rumela mulaedza ha Isabele, vha ri: “Nabothe o kanḓwa nga matombo a fa.”+
15 Musi Isabele a tshi tou pfa uri Nabothe o kanḓwa nga matombo a fa, a amba na Ahaba a ri: “Takuwa u ye u dzhie tsimu ya minḓirivhe ya Nabothe wa Muyeseriele,+ ye a hana u u rengisela yone, ngauri Nabothe ha tsha tshila. O fa.”
16 Musi Ahaba a tshi tou pfa uri Nabothe o fa, Ahaba a takuwa a tsela tsimuni ya minḓirivhe ya Nabothe wa Muyeseriele, uri a i dzhie.
17 Fhedzi Yehova a amba na Elia+ wa Mutisibe, a ri:
18 “Takuwa, u ye Samaria+ uri u ṱangane na Ahaba khosi ya Isiraele. O ya tsimuni ya minḓirivhe ya Nabothe uri a i dzhie.
19 U mu vhudze uri: ‘Yehova u ri: “Naa wo vhulaya muthu+ wa dovha wa dzhia na thundu yawe?”’+ Nga murahu ha zwenezwo u mu vhudze uri: ‘Yehova u ri: “Henefhaḽa he mmbwa dza ṋanzwa malofha a Nabothe, dzi ḓo ṋanzwa na au.”’”+
20 Ahaba a amba na Elia a ri: “Iwe swina ḽanga,+ wo nngwana!” Elia a ri: “Ndo u wana. Mudzimu u ri: ‘Ngauri wo ḓiimisela u ita zwi sa takadzi Yehova,+
21 ndi khou u ḓisela khombo, ndi ḓo fhelisa vhanna vhoṱhe*+ vha nnḓu ya Ahaba, u katela na vhane vha si kone u ḓitsireledza na vha si na nungo kha ḽa Isiraele.+
22 Ndi ḓo ita uri nnḓu yau i fane na ya Yerobeamu+ murwa wa Nebatha na ya Baasha+ murwa wa Ahia, ngauri wo ntsinyusa wa ita uri Isiraele ḽi ite tshivhi.’
23 Yehova o dovha a amba zwine zwa ḓo itea kha Isabele a ri: ‘Isabele u ḓo ḽiwa nga dzimmbwa shangoni ḽa Yeseriele.+
24 Wa lushaka lwa Ahaba ane a fela muḓini u ḓo ḽiwa nga mmbwa, ane a fela ḓakani, u ḓo ḽiwa nga zwiṋoni.+
25 A hu athu u vhuya ha vha na muṅwe muthu ane a fana na Ahaba,+ we a vha o ḓiimisela u ita zwi sa takadzi Yehova, o ṱuṱuwedzwa nga mufumakadzi wawe Isabele.+
26 O ita zwithu zwi nengisaho nga u tevhela midzimu ya zwifanyiso i nengisaho,* u fana na zwe zwa itwa nga Vhaamori vhoṱhe, vhe Yehova a vha pandela phanḓa ha Vhaisiraele.’”+
27 Musi Ahaba a tshi tou pfa enea maipfi, a kherukanya zwiambaro zwawe a ambara madzanganda; a ḓidzima zwiḽiwa a eḓela o ambara eneo madzanganda a tshimbila o ṱungufhala.
28 Yehova a amba na Elia wa Mutisibe a ri:
29 “Naa wo i vhona nḓila ye Ahaba a ḓiṱukufhadza ngayo nga nṱhani ha zwe nda amba uri zwi ḓo mu ḓela?+ Ngauri o ḓiṱukufhadza phanḓa hanga, ndi nga si ḓise khombo a tshi kha ḓi tshila. Ndi ḓo ḓisa khombo kha vha nnḓu yawe misini ya murwa wawe.”+
Ṱhaluso dzi re magumoni a siaṱari
^ Thevhedz., “vhoṱhe vhane vha rundela luvhondo.” Ndi ḽiambele ḽa Tshihevheru ḽa u sumbedza u nyadza, ḽine kha haya mafhungo ḽa ambela kha vhanna na vhatukana.
^ Ipfi ḽine ḽa amba zwenezwi ḽa Tshihevheru ḽi tshimbidzana na ipfi “vhutoko” nahone ḽi shumiswa sa mubulo wa u goḓa.
