Bugu Ya U Thoma Ya Koronika 10:1-14
-
Lufu lwa Saulo na vharwa vhawe (1-14)
10 Vhafilisita vho vha vha tshi khou lwa na Vhaisiraele. Vhaisiraele vha shavha Vhafilisita, ha vhulawa vhanzhi Thavhani ya Giliboa.+
2 Vhafilisita vha pandamedza Saulo na vharwa vhawe, Vhafilisita vha vhulaya Yonathani, Abinadaba na Malakisua,+ vharwa vha Saulo.
3 Nndwa ya vha khulu kha Saulo, vhapfuli vha mu pfula nga misevhe yavho, vha mu huvhadza.+
4 Saulo a amba na muhwali wa zwiṱhavhane zwawe a ri: “Ṱomola banga ḽau u mmbulaye ngaḽo, uri havha vhanna vha songo fumbaho vha si ḓe vha ntambudza.”+ Fhedzi muhwali wa zwiṱhavhane zwawe a hana, ngauri o vha a tshi khou ofha nga maanḓa. Ngauralo, Saulo a dzhia banga a ḓiwisela khaḽo.+
5 Musi muhwali wa zwiṱhavhane zwawe a tshi vhona uri Saulo o fa, na ene a ḓiwisela kha banga ḽawe a fa.
6 Ngauralo, Saulo na vharwa vhawe vhararu vha fa, na vhoṱhe vha muṱa wawe vha re nae vha fa vhoṱhe.+
7 Musi vhathu vha Isiraele vha re govhani vha tshi vhona uri vhathu vhoṱhe vho shavha na uri Saulo na vharwa vhawe vho fa, vha ṱutshela miḓi yavho vha shavha; Vhafilisita vha ḓa vha dzula khayo.
8 Nga ḓuvha ḽi tevhelaho, musi Vhafilisita vha tshi ḓa u dzhia thundu dza vho vhulawaho, vha wana Saulo na vharwa vhawe vho fa Thavhani ya Giliboa.+
9 Vha tumula ṱhoho yawe vha mu bvula tshiambaro tsha nndwa, vha rumela mulaedza shangoni ḽoṱhe ḽa Vhafilisita uri vha phaḓaladze eneo mafhungo kha midzimu yavho ya zwifanyiso+ na kha vhathu.
10 Vha vhea tshiambaro tshawe tsha nndwa nḓuni* ya mudzimu wavho, dethele ḽawe vha ḽi ombela nḓuni ya Dagoni.+
11 Musi vhathu vhoṱhe vha Yabese+ ngei Giḽiada vha tshi pfa zwoṱhe zwe Vhafilisita vha zwi ita kha Saulo,+
12 vhahali vhoṱhe vha takuwa vha ya vha hwala tshitumbu tsha Saulo na zwitumbu zwa vharwa vhawe. Vha vhuyelela nazwo Yabese,+ vha vhulunga marambo avho fhasi ha muri muhulu ngei Yabese, vha ḓidzima zwiḽiwa maḓuvha a sumbe.
13 Saulo o fa nga nṱhani ha u sa fhulufhedzea kha Yehova nge a si thetshelese zwe Yehova a amba,+ na nge a vhudzisa mungome+
14 nṱhani ha u vhudzisa Yehova. Ngauralo, a mu vhulaya, a ṋea vhuhosi Davida ṅwana wa Isai.+
Ṱhaluso dzi re magumoni a siaṱari
^ Kana “thembeleni.”
