Bugu Ya Vhuvhili Ya Dzikhosi 9:1-37
9 Muporofita Elisha a vhidza muṅwe wa vharwa vha vhaporofita a amba nae a ri: “Kanyela zwiambaro zwau kha khundu, u ṱavhanye u dzhie hoyu mudzio wa mapfura u ṱuwe nawo ngei Ramothe-giḽiada.+
2 Musi u tshi swika henengei, u ṱoḓe Yehu+ murwa wa Yehoshafati murwa wa Nimisi; u ye khae u mu vhidze a bve vhukati ha vhahawe u mu ise kamarani ya nga ngomu-ngomu.
3 U dzhie mudzio wa mapfura u mu shele kha ṱhoho yawe u ambe nae uri, ‘Yehova u ri: “Ndi khou u ḓodza uri u vhe khosi kha ḽa Isiraele.”’+ U tshi fhedza u vule vothi u shavhe, u songo vhuya wa lenga.”
4 Onoyo muḓinḓa wa muporofita a ya Ramothe-giḽiada.
5 Musi a tshi swika, a wana vhalangammbi vho dzula henefho. A ri: “Mulangammbi, ndi na mulaedza wau.” Yehu a vhudzisa a ri: “Ndi wa nnyi kha riṋe?” A ri: “Ndi wau, iwe mulangammbi.”
6 Yehu a takuwa a dzhena nḓuni; muḓinḓa a mu shela mapfura kha ṱhoho a ri, “Yehova Mudzimu wa Isiraele o ri: ‘Ndi khou u ḓodza uri u vhe khosi ya vhathu vha Yehova kha ḽa Isiraele.+
7 U vhulaye vha nnḓu ya Ahaba muṋe wau, ndi ḓo lifhedza malofha a vhashumeli vhanga vha vhaporofita na a vhashumeli vhoṱhe vha Yehova vhe vha vhulawa nga Isabele.+
8 Nnḓu yoṱhe ya Ahaba i ḓo fheliswa; ndi ḓo fhelisa vhanna vhoṱhe* vha nnḓu ya Ahaba, u katela na vhane vha si kone u ḓitsireledza na vha si na nungo kha ḽa Isiraele.+
9 Vha nnḓu ya Ahaba ndi ḓo vha ita zwe nda ita vha nnḓu ya Yerobeamu+ murwa wa Nebatha na zwe nda ita Baasha+ murwa wa Ahia.
10 Isabele ene u ḓo ḽiwa nga dzimmbwa ngei tsimuni ya Yeseriele,+ a hu na ane a ḓo mu vhulunga.’” A vula vothi a shavha.+
11 Musi Yehu a tshi humela kha vhashumeli vha muṋe wawe, vha mu vhudzisa vha ri: “Ho tshinyala mini? Ndi ngani uḽa mpengo o ḓa kha iwe?” A vha fhindula a ri: “Ni a mu ḓivha uri ndi muthu-ḓe na zwine a amba a zwi ḓivhalei.”
12 Fhedzi vha ri: “A si zwone, ri vhudze ngoho.” Ene a ri: “Hezwi ndi zwe a mmbudza, a dovha a ri, ‘Yehova u ri: “Ndi khou u ḓodza uri u vhe khosi kha ḽa Isiraele.”’”+
13 Muṅwe na muṅwe wavho a ṱavhanya a dzhia tshiambaro tshawe a tshi adza he Yehu a vha a tshi ḓo kanda hone kha zwiṱepisi,+ vha lidza ṋanga vha ri: “Yehu ndi khosi!”+
14 Yehu+ murwa wa Yehoshafati murwa wa Nimisi a itela Yehoramu tshimbevha.
Yehoramu o vha a tshi khou linda ngei Ramothe-giḽiada+ na Vhaisiraele vhoṱhe, ngauri vho vha vha tshi khou lwa na Hasaele+ khosi ya Siria.
15 Nga murahu Khosi Yehoramu a vhuyelela Yeseriele+ uri a fhole e henefho nge a vha o huvhadzwa nga Vhasiria musi a tshi khou lwa na Khosi Hasaele wa Siria.+
Yehu a ri: “Arali u tshi tendelana na nṋe, hu songo ponyoka muthu na muthihi muḓini, a ya a vhiga enea mafhungo ngei Yeseriele.”
16 Yehu a ṋamela gariki yawe a ya Yeseriele, ngauri Yehoramu o vha o eḓela henengei o huvhala, Ahasia khosi ya Yuda o vha o tsela henefho uri a vhone Yehoramu.
17 Musi mulindi o ima kha mutsheṱo ngei Yeseriele, a vhona tshigwada tsha vhanna vha Yehu tshi tshi khou ḓa. A amba nga u ṱavhanya a ri: “Ndi khou vhona tshigwada tsha vhanna.” Yehoramu a ri: “Ruma muṋameli wa bere a ye u ṱangana navho, a vha vhudzise a ri: ‘Naa wo ḓa nga mulalo?’”
18 Muṋameli wa bere a ya a mu ṱanganedza, a ri: “Khosi yo ri ndi vhudzise uri: ‘Naa wo ḓa nga mulalo?’” Fhedzi Yehu a ri: “U ḓivha mini nga ha ‘mulalo’? Ntevhele!”
Mulindi a vhiga a ri: “Muḓinḓa o swika khavho, fhedzi ho ngo vhuya.”
19 A ruma muṋameli wa bere wa vhuvhili, musi a tshi swika khavho a ri: “Khosi yo ri ndi vhudzise uri: ‘Naa wo ḓa nga mulalo?’” Fhedzi Yehu a ri: “U ḓivha mini nga ha ‘mulalo’? Ntevhele!”
20 Mulindi a vhiga a ri: “Muḓinḓa o swika khavho, fhedzi ho ngo vhuya. Fhedzi kutshimbidzele kwa gariki ku tou nga kwa Yehu muḓuhulu* wa Nimisi, ngauri u tshimbidza gariki sa mpengo.”
21 Yehoramu a ri: “Haka gariki yanga!” Ha hakwa gariki yawe ya mmbi, Yehoramu khosi ya Isiraele na Ahasia+ khosi ya Yuda vha ṱuwa, muṅwe na muṅwe o ṋamela gariki yawe ya nndwa uri a ṱangane na Yehu. Vha ṱangana nae tsimuni ya Nabothe+ wa Muyeseriele.
22 Musi Yehoramu a tshi tou vhona Yehu, a ri: “Naa wo ḓa nga mulalo?” Fhedzi ene a ri: “Hu nga vha hani na mulalo hu tshi kha ḓi vha na vhupombwe ha Isabele+ mme au na vhuloi hawe vhunzhi?”+
23 Nga u ṱavhanya Yehoramu a rembulusa gariki yawe a shavha, a amba na Ahasia a ri: “Ro fhurwa!”
24 Yehu a dzhia vhura hawe a pfula Yehoramu vhukati ha mahaḓa, musevhe wa phuletshedza kha mbilu, a wela garikini yawe ya nndwa.
25 Yehu a amba na Bidikara mulangammbi wawe a ri: “Mu hwale u mu laṱe tsimuni ya Nabothe wa Muyeseriele.+ U humbule uri nṋe na iwe ro vha ro ṋamela roṱhe gariki ri murahu ha Ahaba musi Yehova a tshi mu haṱula a tshi ri:+
26 ‘“Mulovha ndo vhona malofha a Nabothe+ na vharwa vhawe,” u ralo Yehova, “ndi ḓo u lifhedza tsimuni yeneyi,”+ u ralo Yehova.’ Mu hwale u mu laṱe tsimuni, sa zwe Yehova a amba.”+
27 Musi Ahasia+ khosi ya Yuda a tshi vhona zwe zwa vha zwi tshi khou itea, a shavha nga nḓila i fhiraho nga nḓuni ya tsimuni. (Nga murahu Yehu a mu pandamedza, a ri: “Na ene mu vhulayeni!” Vha mu pfula e garikini yawe musi e nḓilani ya u gonya Guru, ine ya vha tsini na Yibiliamu.+ Fhedzi a shavha a swika Megido, a fela henefho.
28 Vhashumeli vhawe vha mu hwala nga gariki vha mu isa Yerusalema, vha mu vhulunga vhiḓani ḽawe na vhomakhulukuku wawe ngei Muḓini wa Davida.+
29 Ahasia+ o vha khosi kha ḽa Yuda nga ṅwaha wa vhu 11 hu tshi khou vhusa Yehoramu murwa wa Ahaba.)
30 Musi Yehu a tshi swika Yeseriele,+ Isabele+ a zwi pfa. Ngauralo, a ḓiḓodza maṱo nga zwithu zwitswu, a nakisa mavhudzi awe a ṱodzimela nnḓa nga fasiṱere.
31 Musi Yehu a tshi dzhena nga khoro, Isabele a ri: “Ho itea mini kha Simiri we a vhulaya muṋe wawe?”+
32 A lavhelesa fasiṱereni a ri: “Ndi nnyi ane a ima na nṋe? Ndi nnyi?”+ Nga u ṱavhanya vhaḓinḓa vhavhili kana vhararu vha mu ṱodzimela.
33 A ri: “Mu poseleni fhasi!” Vha mu posela fhasi, maṅwe malofha awe a hasha kha luvhondo na kha bere, ene a mu kandekanya.
34 Yehu a dzhena a ḽa, a nwa. A ri: “Ndi khou humbela uri ni dzhie hoyu mufumakadzi o semiwaho ni mu vhulunge. Ngauri ndi mukololo.”+
35 Fhedzi musi vha tshi ya u mu dzhia uri vha mu vhulunge, vha wana ho sala dethele, milenzhe na zwanḓa zwawe.+
36 Musi vha tshi huma vha mu vhudza, ene a ri: “Hu khou itea zwe Yehova a amba+ a tshi shumisa mushumeli wawe Elia wa Mutisibe a tshi ri: ‘Tsimuni ya Yeseriele, mmbwa dzi ḓo ḽa ṋama ya Isabele.+
37 Tshitumbu tsha Isabele tshi ḓo vha manyoro tsimuni ya Yeseriele, uri vha si ambe vha ri: “Hoyu ndi Isabele.”’”
Ṱhaluso dzi re magumoni a siaṱari
^ Thevhedz., “vhoṱhe vhane vha rundela luvhondo.” Ndi ḽiambele ḽa Tshihevheru ḽa u sumbedza u nyadza, ḽine kha haya mafhungo ḽa ambela kha vhanna na vhatukana.
^ Thevhedz., “mutukana.”
