Vhurifhi Ha Vhuvhili Vhu Yaho Kha Vhakorinta 8:1-24
8 Vhahashu, ri ṱoḓa ni tshi ḓivha nga ha vhuthu vhuhulu ha Mudzimu he a vhu sumbedza zwivhidzo zwa Makedonia.+
2 Musi vha tshi lingwa zwihulu vhe maṱunguni, vho vha vho takala zwihulu, vha sumbedza na mafunda naho vho vha tshi khou shaya zwihulu.
3 Vho ṋea zwoṱhe zwine vha nga kona,+ vha ita na u fhirisa. Ndi khwaṱhisedza zwenezwo.+
4 Vho vha vha tshi ri humbela lunzhi uri ri vha tendele vha tshi kovhela na u thusa vhakhethwa.+
5 Vho ita zwi fhiraho zwe ra vha ro zwi lavhelela, vho shumela Murena nga mbilu yoṱhe na u ri thusa u ya nga zwine Mudzimu a zwi funa.
6 Zwenezwo zwo ita uri ri ṱuṱuwedze Tito+ uri a fhedzise mushumo we a u thoma vhukati haṋu, wa u kuvhanganya zwe na ṋea nga u ḓifunela.
7 Zwoṱhe ni khou zwi ita zwavhuḓi. Ni na lutendo lwo khwaṱhaho, vhukoni ha u amba, nḓivho yaṋu yo engedzea, no ḓiimisela zwihulu kha zwoṱhe zwine na zwi ita na u funa vhaṅwe nga nḓila ine ra ni funa ngayo. Bvelani phanḓa ni tshi ṋea nga u ḓifunela.+
8 A thi khou ni vhetshela mulayo, fhedzi ndi ṱoḓa ni tshi ḓivha uri vhaṅwe vha khou shuma vhukuma, vho ḓiimisela. Ndi ṱoḓa u vhona arali lufuno lwaṋu lu lwa vhukuma.
9 Ngauri ni a ḓivha vhuthu vhuhulu ha Murena washu Yesu Kristo, uri naho o vha o pfuma, o vha mushai a tshi itela inwi+ uri ni pfume nga vhushai hawe.
10 Ndi khou ni eletshedza hezwi:+ Zwi ḓo ni vhuyedza u ita wonoyu mushumo, ngauri no u thoma ṅwaha wo fhelaho na dovha na sumbedza uri ni a takalela u u ita.
11 Zwino fhedzisani mushumo we na u thoma nga zwine na vha nazwo, no ḓiimisela u fana na u thomani.
12 Mudzimu u takalela tshifhiwa tshi bvaho mbiluni, ngauri u lavhelela uri muthu a ṋee zwine a nga kona,+ hu si zwine a si zwi kone.
13 Ngauri a thi ṱoḓi u ita uri vhutshilo ha vhaṅwe vhu leluwe, fhedzi haṋu vhu konḓe;
14 ndi ṱoḓa ni tshi thusa nga zwinzhi zwine na vha nazwo hune vha khou ṱahelelwa hone, uri na vhone vha ni thuse nga zwinzhi zwine vha vha nazwo hune na khou ṱahelelwa hone, uri hu vhe na u linganyisela.
15 Vhunga ho ṅwaliwa u pfi: “A re na zwinzhi ho ngo vha na zwinzhi-zwinzhi, na a re na zwiṱuku ho ngo vha na zwiṱuku-ṱuku.”+
16 Ri livhuwa Mudzimu we a ita uri Tito+ a vhilaele nga ha inwi u fana na riṋe,
17 ngauri o tenda u ṱuṱuwedzwa, a ḓiimisela u ḓa kha inwi nga u ḓifunela.
18 Fhedzi ri khou mu ruma na wahashu ane a khoḓiwa zwivhidzoni zwoṱhe ngauri u huwelela mafhungo maḓifha.
19 A si zwenezwo fhedzi. O nangiwa nga zwivhidzo uri a tshimbile na riṋe, a ri thuse u ṋea zwe zwa kuvhanganyiwa. Ri khou zwi ṋea vhathu uri Murena a rendiwe na u sumbedza uri ro ḓiimisela u thusa vhaṅwe.
20 Ndi ngazwo ri sa ṱoḓi hu tshi vha na ane a ri vhona mulandu kha zwe na zwi bvisa nga u ḓifunela uri zwi ṋewe vhakhethwa.+
21 Ngauri ri ‘lwela u ita zwithu zwoṱhe nga u fhulufhedzea, ri tshi vhonwa nga Yehova* na nga vhathu.’+
22 Ri khou vha ruma na wahashu we a ita vhuḓidini vhuhulu kha zwithu zwoṱhe, fhedzi zwino u ḓo ita vhuḓidini vhuhulu vhu fhiraho he a vhu ita u thomani, ngauri u a ni fhulufhela vhukuma.
23 Ane a vhudzisa nga ha Tito, ni mu vhudze uri ndi khonani yanga na mushumisani na nṋe uri ri ni vhuyedze; ane a vhudzisa nga vhahashu, ni mu vhudze uri vho rumiwa nga tshivhidzo, vha rendisa Kristo.
24 Vha sumbedzeni uri ni a vha funa,+ ni sumbedze na zwivhidzo uri ndi ngani ri tshi zuwa nga inwi.
