Vhahaṱuli 16:1-31
16 Musi Simisoni o ya Gaza a vhona muthu ane a rengisa muvhili henefho, a ya nḓuni yawe.
2 Vhagaza vha vhudzwa uri: “Simisoni o ḓa fhano.” Vha tanga henefho fhethu, vha mu lalela vhusiku hoṱhe khoroni ya muḓi. Vha tou tshete vhusiku hoṱhe, vha tshi ri: “Musi ḽi tshi tsha ri ḓo mu vhulaya.”
3 Naho zwo ralo, Simisoni a eḓela henefho u swika vhukati ha vhusiku. A vuwa vhukati ha vhusiku a fara miṋango ya khoro, a tupula mihangambwa khathihi na thanda ya u khia. A zwi hwala nga mashaḓa, a gonya nazwo ṱhodzini ya thavha yo livhanaho na Heburoni.
4 Nga murahu ha zwenezwo, a funana na muṅwe musidzana ngei Govhani* ḽa Soreka we a vha a tshi pfi Delila.+
5 Vhavhusi vha Vhafilisita vha ḓa vha amba na Delila vha ri: “Mu fhure+ u wane uri ndi mini tshine tsha mu ṋea enea maanḓa mahulu na nḓila ine ra nga mu kunda ngayo ra mu vhofha. Nga zwenezwo, muṅwe na muṅwe washu u ḓo u ṋea shekele* dza 1 100 dza siḽiva.”
6 Nga murahu Delila a amba na Simisoni a ri: “Ndi khou humbela uri u mmbudze hune maanḓa au mahulu a bva hone na uri hu nga shumiswa mini u itela u u vhofha uri u kundwe?”
7 Simisoni a amba nae a ri: “Arali vha mmbofha nga tsinga dza vhura dza sumbe dzi songo omiswaho, ndi ḓo fhelelwa nga maanḓa, nda fana na muthu muṅwe na muṅwe.”
8 Vhavhusi vha Vhafilisita vha mu ḓisela tsinga dza vhura dza sumbe dzi songo omiswaho. Nga murahu Delila a mu vhofha ngadzo.
9 Vhavhusi vha lalela Simisoni nga ngomu kamarani, Delila a vhidzelela a ri: “Simisoni, Vhafilisita khevho!” Nga zwenezwo, a ṱhukhukanya tsinga dza vhura nga hu leluwaho u fana na harane i tshi ṱhukhukana musi yo fhiswa nga mulilo.+ Hu si ḓivhiwe tshiphiri tsha hune maanḓa awe a bva hone.
10 Delila a amba na Simisoni a ri: “Wo mphura wa mmbudza mazwifhi. Zwino ndi khou humbela uri u mmbudze tshine tsha nga shumiswa u itela u u vhofha.”
11 A amba nae a ri: “Arali vha mmbofha nga thambo ntswa dzine dza sa athu u shumiswa, ndi ḓo fhelelwa nga maanḓa, nda fana na muthu muṅwe na muṅwe.”
12 Ngauralo, Delila a dzhia thambo ntswa a mu vhofha ngadzo, a vhidzelela a ri: “Simisoni, Vhafilisita khevho!” (Nga tshenetsho tshifhinga vho vha vho mu lalela nga ngomu kamarani.) A ṱhukhula thambo dze dza vha dzo mu vhofha u fana na musi a tshi ṱhukhula harane.+
13 Nga murahu ha zwenezwo, Delila a amba na Simisoni a ri: “U kha ḓi mphura na u mmbudza mazwifhi.+ Mmbudze tshine tsha nga shumiswa u itela u u vhofha.” Simisoni a amba nae a ri: “Arali wa luka miluko ya sumbe kha ṱhoho yanga nga harane.”
14 Nga zwenezwo, a luka mavhudzi awe a a vhofhelela nga tshitanda, a mu vhidzelela a ri: “Simisoni, Vhafilisita khevho!” Simisoni a karuwa, a ṱomola tshitanda na harane dze dza vha dzo luka mavhudzi awe.
15 Delila a amba nae a ri: “Ndi ngani u tshi amba uri u a mpfuna,+ ngeno mbilu yau i siho kha nṋe? Wo mphura luraru, a wo ngo mmbudza hune maanḓa au mahulu a bva hone.”+
16 Delila o vha a tshi dzulela u dina Simisoni ḓuvha ḽiṅwe na ḽiṅwe, a vhuya a dinalea tshoṱhe.+
17 Mafheleloni a mu vhudza zwoṱhe zwa mbiluni yawe a ri: “A thi athu u vheulwa ṱhoho, ngauri ndi Munazari wa Mudzimu u bva tshee nda bebwa.+ Arali nda vheulwa, maanḓa anga a ḓo ṱuwa, ndi ḓo fhelelwa nga nungo nda fana na muthu muṅwe na muṅwe.”
18 Musi Delila a tshi vhona uri o mu vhudza zwoṱhe zwi re mbiluni yawe a ṱavhanya a vhidza vhavhusi vha Vhafilisita+ a ri: “Iḓani zwino ngauri o mmbudza zwoṱhe zwi re mbiluni yawe.” Ngauralo, vhavhusi vha Vhafilisita vha ḓa khae vho mu farela tshelede.
19 A mu eḓedza kha zwirumbi zwawe; a vhidza muṅwe munna uri a vheule miluko i re ṱhohoni yawe. Delila a thoma u mu langa, ngauri maanḓa awe o vha a tshi khou fhela.
20 Delila a vhidzelela a ri: “Simisoni, Vhafilisita khevho!” A karuwa a ri: “Ndi ḓo ponyoka sa nga misi.”+ Fhedzi o vha a sa zwi ḓivhi uri Yehova o mu ṱutshela.
21 Vhafilisita vha mu fara, vha mu rumbula maṱo. Vha mu isa Gaza vha mu vhofha nga ngeḓane mbili dza koporo, a vha mukuyi wa thoro dzhele.
22 Fhedzi mavhudzi awe e a vha o vheulwa a dovha a mela.+
23 Vhavhusi vha Vhafilisita vha kuvhangana u itela u ṋekedza Dagoni+ mudzimu wavho tshiṱhavhelo tshihulu na u pembela, ngauri vho vha vha tshi ri: “Mudzimu washu o kumedzela Simisoni swina ḽashu zwanḓani zwashu!”
24 Musi vhathu vha tshi mu vhona, vha renda mudzimu wavho vha ri: “Mudzimu washu o kumedzela swina ḽashu zwanḓani zwashu, ḽe ḽa tshinyadza shango ḽashu+ na ḽe ḽa vhulaya vhathu vhanzhi.”+
25 Nge vha vha vho takala, vha ri: “Vhidzani Simisoni uri a ḓe a ri mvumvuse.” Ngauralo, vha vhidza Simisoni dzhele uri a ḓe a vha mvumvuse; vha mu imisa vhukati ha dziphuphu.
26 Simisoni a amba na mutukana we a vha o mu fara nga tshanḓa a ri: “Nnditshe ndi phuphuledze phuphu dzo tikaho nnḓu uri ndi kone u ḓitika ngadzo.”
27 (Nnḓu yo vha yo ḓala nga vhanna na vhafumakadzi. Vhavhusi vhoṱhe vha Vhafilisita vho vha vhe henefho, kha ṱhanga ho vha hu na vhanna na vhafumakadzi vha ṱoḓaho u vha 3 000 vho ṱalelaho musi Simisoni a tshi khou vha mvumvusa.)
28 Simisoni+ a vhidzelela Yehova a ri: “Yehova Murena Muvhusahoṱhe, ndi khou humbela uri u nṋee maanḓa+ lwa u fhedzisela. Iwe Mudzimu, ntendele ndi lifhedze Vhafilisita naho ndi tshi itela lito langa lithihi fedzi.”+
29 Ndi hone Simisoni a tshi farelela phuphu mbili dza vhukati dzo tikaho nnḓu, iṅwe nga tshanḓa tsha u ḽa, iṅwe nga tshanḓa tsha monde.
30 Simisoni a vhidzelela a ri: “Kha ndi fe na Vhafilisita!” A sukumedza nga maanḓa awe oṱhe, nnḓu ya wela marena na vhathu vhoṱhe vha re khayo.+ A vhulaya vhathu vhanzhi musi a tshi fa u fhira vhe a vha vhulaya a tshi kha ḓi tshila.+
31 Nga murahu vharathu vhawe na vha muṱa wa khotsi awe vha ḓa vha dzhia tshitumbu tshawe. Vha ṱuwa natsho vha ya vha tshi vhulunga vhukati ha Tsora+ na Esitaoli vhiḓani ḽa Manoa+ khotsi awe. O haṱula Vhaisiraele miṅwaha ya 20.+
Ṱhaluso dzi re magumoni a siaṱari
^ Kana “Muedzini.”
^ Shekele nthihi i lemela gramu dza 11,4. Sedzani Ṱhume. B14.
