Daniele 12:1-13
12 “Misini yeneyo, Mikaele*+ u ḓo ima, ane a vha mukololo+ muhulwane a imelelaho vhathu vhau. Hu ḓo vha na tshifhinga tshi konḓaho tshi sa athu u vhuya tsha vha hone u bva tshee ha vha na lushaka u swika nga tshenetsho tshifhinga. Misini yeneyo, vhathu vhau vha ḓo ponyoka,+ vhoṱhe vho ṅwaliwaho kha bugu.+
2 Vhathu vhanzhi vho faho* vha ḓo vuwa, vhaṅwe vha ḓo vuselwa u tshila tshoṱhe, ngeno vhaṅwe vha tshi ḓo vuselwa u shoniswa na u nyadziwa lwa tshoṱhe.
3 “Vha re na ṱhalukanyo vha ḓo penya sa lutombo lwa ṱaḓulu, vhane vha ḓisa vhanzhi kha zwivhuya vha ḓo penya sa ṋaledzi lini na lini.
4 “Iwe Daniele, ita uri enea mafhungo a vhe tshiphiri, u vale bugu u i swaye u swika tshifhingani tsha vhufhelo.+ Vhanzhi vha ḓo ya ngei na ngei,* nḓivho ya ngoho ya ḓala.”+
5 Nṋe Daniele nda lavhelesa nda vhona vharuṅwa vhavhili vho ima, muṅwe o ima kha thungo iṅwe ya philiphili ya mulambo, ngeno muṅwe o ima kha iṅwe thungo.+
6 Muṅwe wavho a amba na munna o ambaraho zwiambaro zwa ḽinene,+ we a vha o ima kha maḓi a mulambo a ri: “Zwenezwi zwithu zwi mangadzaho zwi ḓo fhela lini?”
7 Nda pfa munna o ambaraho zwiambaro zwa ḽinene, we a vha o ima kha maḓi a mulambo, a tshi imisela tshanḓa tshawe tsha u ḽa na tsha monde ṱaḓulu a ana nga A tshilaho lini na lini,+ a ri: “Ndi zwa tshifhinga, zwifhinga na hafu* zwo vhewaho. U swikela u fheliswa ha maanḓa a vhathu vhakhethwa hu tshi fhela,+ ndi hone zwenezwi zwithu zwoṱhe zwi tshi ḓo fhela.”
8 Nṋe ndo zwi pfa, fhedzi a tho ngo zwi pfesesa,+ nda ri: “Murena wanga, zwenezwi zwithu zwi ḓo fhelisa hani?”
9 A amba a ri: “Tshimbila iwe Daniele, ngauri enea maipfi a fanela u itwa tshiphiri na u swaiwa u swikela tshifhingani tsha vhufhelo.+
10 Vhanzhi vha ḓo ṱamba vha tshena, vha kunakiswa.+ Vhavhi vha ḓo ita vhuvhi, a hu na na muthihi wavho ane a ḓo pfesesa; fhedzi zwi ḓo pfeseswa nga vha re na ṱhalukanyo.+
11 “Hu ḓo fhela maḓuvha a 1 290 ho bviswa tshiṱhavhelo tsha ḓuvha ḽiṅwe na ḽiṅwe,+ ho vhewa tshithu tshi nengisaho tshine tsha tshinyadza.+
12 “Hu takala ane a dzula o lavhelela* u swikela hu tshi fhela maḓuvha a 1 335!
13 “A vha iwe, fhulufhedzea u swika u tshi fa. U ḓo awela, fhedzi u ḓo ima maḓuvhani a vhufhelo wa wana mukovhe wau.”+
Ṱhaluso dzi re magumoni a siaṱari
^ Zwine zwa amba uri “Ndi Nnyi A Fanaho Na Mudzimu?”
^ Thevhedz., “vho eḓelaho mavuni.”
^ Kana “ṱolisisa [yeneyo bugu] nga vhuronwane.”
^ Zwenezwi zwi pfeseswa nga heyi nḓila: ṅwaha muthihi, miṅwaha mivhili na hafu, zwine zwa amba uri ndi miṅwaha miraru na hafu.
^ Kana “lindela.”
