Ekisoda 17:1-16
17 Tshitshavha tshoṱhe tsha Vhaisiraele tsha ṱuwa sogani ḽa Sini+ tsha tshimbila tshi tshi atha madennde, u ya nga he Yehova a vha laya ngaho,+ vha atha madennde Rafidima.+ Fhedzi ho vha hu si na maḓi ane vhathu vha nga a nwa.
2 Vhathu vha lwa na Mushe+ vha ri: “Ri ṋee maḓi a u nwa.” Fhedzi Mushe a amba navho a ri: “Ndi ngani ni tshi khou lwa na nṋe? Ndi ngani ni tshi linga Yehova?”+
3 Fhedzi vhathu vho vha vho farwa nga ḓora ḽihulu henefho, vha gungulela Mushe+ vha ri: “Ndi ngani wo ri bvisa Egipita wa ri ḓisa fhano uri ri fe nga ḓora, riṋe na vhana vhashu na zwifuwo zwashu?”
4 Mafheleloni Mushe a vhidzelela Yehova a ri: “Ndi ite mini nga avha vhathu? Hu si kale vha ḓo nkanḓa nga matombo!”
5 Yehova a amba na Mushe a ri: “Ṱuwa na vhaṅwe vhahulwane vha Isiraele, u dzhie na thonga yau ye wa rwa ngayo Mulambo wa Nili,+ u range vhathu phanḓa. U i fare nga tshanḓa u tshimbile.
6 Ndi ḓo vha ndo ima phanḓa hau henefho tomboni ḽa Horebe. U tea u rwa ḽeneḽo tombo, maḓi a ḓo bva khaḽo, vhathu vha nwa.”+ Mushe a ita zwenezwo vhahulwane vha Isiraele vha tshi zwi vhona.
7 Fhethu henefho a ri hu pfi Masaha*+ na Meriba,*+ ngauri Vhaisiraele vho lwa nae vha linga+ Yehova nga u amba uri: “Naa Yehova u na riṋe kana ha na riṋe?”
8 Vhaamaleke+ vha ḓa vha lwa na Vhaisiraele ngei Rafidima.+
9 Mushe a amba na Yoshua+ a ri: “Ri nangele vhanna vhane vha ḓo ya vha lwa na Vhaamaleke. Matshelo ndi ḓo ima ṱhodzini ya tshikwara ndo fara thonga ya Mudzimu wa ngoho.”
10 Yoshua a ita zwe Mushe a mu vhudza,+ a lwa na Vhaamaleke. Mushe, Aroni na Huri+ vha gonya ṱhodzini ya tshikwara.
11 Musi Mushe a tshi imisela zwanḓa zwawe nṱha, Vhaisiraele vho vha vha tshi kunda; fhedzi musi a tshi tsitsela zwanḓa zwawe fhasi, Vhaamaleke vho vha vha tshi kunda.
12 Musi zwanḓa zwa Mushe zwi tshi neta, vha mu ḓisela tombo uri a dzule khaḽo, a dzula khaḽo. Aroni na Huri vha tika zwanḓa zwawe, muṅwe a fara tshiṅwe tshanḓa, muṅwe a fara tshiṅwe uri zwanḓa zwawe zwi si dzinginyee u swika ḽi tshi kovhela.
13 Yoshua a kunda Vhaamaleke na vhathu vhavho nga banga.+
14 Yehova a amba na Mushe a ri: “Ṅwala zwenezwi buguni uri zwi humbulwe, u zwi vhudze Yoshua u ri: ‘Ndi ḓo fhelisa tshoṱhe Vhaamaleke kha ḽifhasi.’”+
15 Mushe a fhaṱa aḽeṱare a ri i pfi Yehova-nisi,
16 a ri: “Ngauri Vhaamaleke vho lwa na khuluṋoni ya Yehova.+ Yehova u ḓo lwa navho na mirafho yavho yoṱhe.”+
Ṱhaluso dzi re magumoni a siaṱari
^ Zwine zwa amba uri “U Lwa.”
^ Zwine zwa amba uri “U Linga; Mulingo.”
