Ekisoda 22:1-31
22 “Arali muthu a tswa mboho kana nngu a i vhulaya kana a i rengisa, a lifhe mboho nthihi nga mboho ṱhanu na nngu nthihi nga nngu nṋa.+
2 (“Arali mbava+ ya wanwa i tshi khou kwasha muḓini, ya rwiwa ya fa, onoyo o i rwaho ha na mulandu wa malofha.
3 Fhedzi arali zwa itea ḽo no tsha, murwi u ḓo vha na mulandu wa malofha.)
“Mbava i tea u lifha. Arali i si na tshithu, i tea u rengiswa u itela u lifha zwithu zwe ya tswa.
4 Arali ya wanwa i na tshe ya tswa tshi tshi kha ḓi tshila, hu sa londwi uri ndi mboho kana donngi kana nngu, i tea u lifha kavhili.
5 “Arali muthu a fulisa zwifuwo zwawe pfuloni kana tsimuni ya minḓirivhe, a zwi tendela zwi tshi fula pfuloni ya muṅwe muthu, u fanela u lifha nga pfulo yawe yavhuḓi kana nga tsimu yawe ya minḓirivhe ya khwine-khwine.
6 “Arali muthu a funga mulilo wa fhisa ḓaka ḽa mipfa, wa fhisa khuḽane dza goroi kana goroi i sa athu u kaṋwaho, we a funga wonoyo mulilo u tea u lifha zwe zwa swa.
7 “Arali muthu a ṋea muṅwe muthu tshelede kana thundu uri a mu farele, zwenezwo zwithu zwa tswiwa nḓuni ya onoyo muthu, arali mbava ya wanwa i tea u lifha kavhili.+
8 Arali mbava ya sa wanala, muṋe wa nnḓu u fanela u iswa phanḓa ha Mudzimu wa ngoho+ u itela u vhona arali a songo tswa thundu ya onoyo muthu.
9 Kha milandu yoṱhe ya thundu dzo tswiwaho, mboho, donngi, nngu, tshiambaro kana tshiṅwe tshithu tsho xelaho tshine muthu a nga ri: ‘Hetshi ndi tshanga!’ Vhuvhili havho vha fanela u isa mulandu phanḓa ha Mudzimu wa ngoho.+ Muthu ane Mudzimu a ri u na mulandu, u fanela u lifhela muṅwe muthu kavhili.+
10 “Arali muthu a ṋea muṅwe muthu donngi kana mboho kana nngu kana tshifuwo naho tshi tshifhio uri a mu farele tshone, arali tsha fa kana tsha huvhala kana tsha xela hu si na we a zwi vhona,
11 vha fanela u ana nga tshavho phanḓa ha Yehova, uri ho ngo tswa thundu dza muṅwe; muṋe wa thundu u tea u zwi ṱanganedza. Muṅwe ho ngo tea u lifha.+
12 Fhedzi arali tshifuwo tsho tswiwa e natsho, u tea u lifhela muṋe watsho.
13 Arali tsho ḽiwa nga tshivhanda, a ḓise zwo salaho uri zwi vhe vhuṱanzi. Ho ngo fanela u lifha tshe tsha ḽiwa nga tshivhanda.
14 “Arali muthu a hadzima tshifuwo kha muṅwe muthu, tsha huvhala kana tsha fa tshi si na muṋe watsho, muthu we a tshi hadzima u tea u lifha.
15 Arali tshi na muṋe watsho, ho ngo fanela u lifha. Arali tsho tou hirwa, tshelede ye ya badelwa i ḓo vha ya u lifha.
16 “Arali munna a kunga musidzana* a sa athu u fhulufhedziswa mbingano, a lala nae, u tea u bvisa tshelede ya lumalo uri a vhe mufumakadzi wawe.+
17 Arali khotsi awe a hana uri a vhe mufumakadzi wawe, a badele tshelede ine ya lingana na ya lumalo.
18 “Ni songo litsha muloi wa mufumakadzi a tshi tshila.+
19 “Ane a lala na tshifuwo u tea u vhulawa.+
20 “Ane a ṋekedza miṅwe midzimu zwiṱhavhelo nga nnḓa ha Yehova u tea u vhulawa.+
21 “Ni songo tambudza mutsinda kana u mu tsikeledza+ ngauri na inwi no vha ni vhatsinda shangoni ḽa Egipita.+
22 “Ni songo tambudza tshilikadzi kana ṅwana a si na khotsi.*+
23 Arali wa mu tambudza a nndilela, ndi ḓo pfa tshililo tshawe;+
24 ndi ḓo sinyuwa, nda ni vhulaya nga banga, vhafumakadzi vhaṋu vha sala vhe dzitshilikadzi, vhana vhaṋu vha sala vhe dzitsiwana.
25 “Arali wa hadzimisa tshelede muṅwe wa vhathu vhanga a re mushai,* ane a dzula na inwi, u songo fana na muhadzimisi wa tshelede. U songo mu lifhisa i na nzwalelo.+
26 “Arali wa dzhia nguvho ya muṅwe muthu u itela u i fara u swika a tshi lifha tshe a hadzima,+ u mu humisele yone ḽi tshi kovhela.
27 Ngauri ndi yone nguvho yawe i yoṱhe, ine a fukedza muvhili wawe ngayo; u ḓo eḓela o fuka mini?+ Musi a tshi nndilela ndi ḓo mu pfa, ngauri ndi a pfela vhuṱungu.*+
28 “U songo sema Mudzimu+ kana u sema murangaphanḓa* vhukati ha vhathu vha hau.+
29 “U songo timatima u ṋekedza zwi bvaho kha zwibveledzwa zwau zwinzhi na muḓalo wa waini na mapfura au.+ U nṋee tanzhe kha vharwa vhau.+
30 Zwine wa fanela u zwi ita nga mboho yau na nga nngu yau ndi hezwi:+ Zwi fanela u dzula na mme azwo lwa maḓuvha a sumbe. Nga ḓuvha ḽa vhumalo u nṋee zwone.+
31 “Ni fanela u vha vhakhethwa kha nṋe,+ a no ngo tea u ḽa ṋama ya tshithu naho tshi tshifhio tshe tsha vhulawa pfuloni nga tshivhanda.+ Yeneyo ṋama ni tea u i ṋea dzimmbwa.
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Kana “tshisiwana.”
^ Kana “ane a khou tambula.”
^ Kana “ndi na vhuthu.”
^ Kana “muvhusi.”
