Ekisoda 27:1-21
27 “U fhaṱe aḽeṱare nga thanda dza muunga;+ vhulapfu hayo vhu vhe khubithi* ṱhanu, vhuphara hayo vhu vhe khubithi ṱhanu. Yeneyo aḽeṱare i fanela u vha i tshi lingana thungo dzoṱhe, u ya nṱha i khubithi tharu.+
2 Kha thungo nṋa dza aḽeṱare u ite maṋanga;+ eneo maṋanga a fanela u vhewa uri a vhonale e kha dzenedzo thungo nṋa, u ḓodze aḽeṱare nga koporo.+
3 U ite khali dza u kumbela miḽora,* u ite fosholo, zwigoḓelo, forogo na zwa u oka mulilo; u ite thundu dzoṱhe nga koporo.+
4 Aḽeṱare u i itele sefo yo itwaho nga koporo, kha sefo yeneyo u ite rinngi nṋa dza koporo kha thungo dzayo nṋa.
5 U i vhee nga fhasi ha lumeme lwa aḽeṱare, sefo i vhe fhasinyana ha aḽeṱare.
6 U vhaḓe thanda dza muunga dza u hwala aḽeṱare, u dzi ḓodze koporo.
7 Thanda dzi fanela u dzheniswa kha rinngi uri dzi vhe nga thungo mbili dza aḽeṱare musi i tshi hwaliwa.+
8 U ite aḽeṱare ine ya fana na bogisi ḽa mabulannga ḽi si na tshithu. U ite nga nḓila ye nda u sumbedza ngayo thavhani.+
9 “U ite muṱa+ wa dennde ḽikhethwa.* Thungo ya tshipembe, ho lavhelesaho tshipembe, muṱa u fanela u vha na makhetheni o lukwaho a ḽinene yavhuḓi, a vhulapfu ha khubithi dza 100 thungo nthihi.+
10 I ḓo vha na phuphu dza 20 dzine dza vha na milenzhe ya 20 ya koporo. Zwihovhi zwa phuphu na mikungelo yadzo zwi fanela u itwa nga siḽiva.
11 Makhetheni o nembelelaho a re thungo ya devhula na one a fanela u vha a vhulapfu ha khubithi dza 100, khathihi na phuphu dzao dza 20 na milenzhe yadzo ya 20 ya koporo, zwihovhi zwa siḽiva na rinngi dza dziphuphu.
12 Kha thungo ya vhukovhela hu fanela u vha na makhetheni o nembelelaho a khubithi dza 50 u buḓekanya vhuphara ha muṱa, na phuphu dza fumi na milenzhe ya fumi.
13 Vhuphara ha muṱa nga thungo ya vhubvaḓuvha vhu vhe khubithi dza 50.
14 Kha iṅwe thungo hu vhe na makhetheni o nembelelaho a 15 na phuphu tharu na milenzhe miraru.+
15 Kha iṅwe thungo hu vhe na makhetheni o nembelelaho a khubithi dza 15, phuphu tharu na milenzhe miraru.
16 “Muṋango wa muṱa u fanela u vha na labi* ḽa u vala ḽa vhulapfu ha khubithi dza 20, ḽo lukwaho nga harane ya muvhala wa lutombo, wuḽu ya phephulu, labi ḽavhuḓi ḽa ḽinene,+ u na phuphu nṋa na milenzhe yadzo miṋa.+
17 Phuphu dzoṱhe dzo tangaho muṱa dzi fanela u vha na mikungelo ya siḽiva na zwihovhi zwa siḽiva, fhedzi milenzhe yadzo i fanela u vha ya koporo.+
18 Muṱa u fanela u vha wa vhulapfu ha khubithi dza 100,+ vhuphara ha khubithi dza 50, u ya nṱha u vhe khubithi dza 5, wo itwa nga labi ḽavhuḓi ḽa ḽinene, u vhe na milenzhe yo itwaho nga koporo.
19 Thundu dzoṱhe na zwithu zwine zwa shumiswa kha dennde ḽikhethwa na tsimbi dza u ṱoma dennde na tsimbi dzoṱhe dza muṱani dzi fanela u vha dza koporo.+
20 “U laye Vhaisiraele uri vha ḓise mapfura o kunaho a muṱwari a mbone uri mbone dzi dzule dzi tshi duga.+
21 Denndeni ḽa muṱangano, nnḓa ha khetheni tsini na Vhuṱanzi,+ Aroni na vharwa vhawe vha dzudzanye uri hu fungwe mbone u bva nga madekwana u swika nga matsheloni phanḓa ha Yehova.+ Ndaela yeneyi i fanela u tevhedzwa nga Vhaisiraele na nga mirafho yavho yoṱhe u swika lini na lini.+
Ṱhaluso dzi re magumoni a siaṱari
^ Khubithi nthihi i lingana na senthimithara dza 44,5. Sedzani Ṱhume. B14.
^ Kana “miḽora i re na mapfura,” zwine zwa vha miḽora yo lovhewaho kha mapfura a zwiṱhavhelo.
^ “Ndi dennde ḽa vhurabeli ḽine ḽa hwalea ḽe ḽa vha ḽi tshi shumiswa nga Vhaisiraele; nga zwiṅwe zwifhinga ḽo vha ḽi tshi vhidzwa ‘dennde ḽa muṱangano.’”
^ Kana “khetheni.”
