Ekisoda 29:1-46
29 “Hezwi ndi zwine wa fanela u zwi ita u itela u vha khetha uri vha shume sa vhotshifhe vhanga: U dzhie mbohwana, thutha mbili dzo kunaho,+
2 vhurotho vhu si na mbiliso, ḽofo dza vhurotho* vhu si na mbiliso ho ṱanganyiswaho na mapfura na makokisi a si na mbiliso o ḓodzwaho mapfura.+ U zwi bake nga fuḽauru tsekene ya goroi,
3 u zwi vhee kha manngi, u zwi ṋekedze zwi kha manngi,+ khathihi na mboho na thutha mbili.
4 “U ḓise Aroni na vharwa vhawe muṋangoni wa dennde ḽa muṱangano,+ u vha vhudze uri vha ṱambe nga maḓi.+
5 U dzhie zwiambaro+ u ambadze Aroni, u mu ambadze tshiambaro, tshiambaro tshi si na zwanḓa tsha efodo,* efodo na tsha u vhea khanani, u mu vhofhe zwavhuḓi khundu nga bannda* ḽa efodo ḽo lukwaho.+
6 U mu vhofhe ṱhoho nga dugu, u vhee luswayo lukhethwa lwa u ḓiṋekedza* kha dugu;+
7 u dzhie mapfura a u ḓodza+ u a shele nṱha ha ṱhoho yawe u mu ḓodze.+
8 “U ḓise vharwa vhawe u vha ambadze zwiambaro+
9 u vhofhe Aroni na vharwa vhawe nga mabannda, u vha ambadze muṅadzi; vha ḓo vha vhotshifhe, wonoyu ndi mulayo wanga u ya nga hu sa fheli.+ Heyi ndi nḓila ine wa fanela u vhea ngayo Aroni na vharwa vhawe uri vha shume sa vhotshifhe.+
10 “U ḓise mboho phanḓa ha dennde ḽa muṱangano, Aroni na vharwa vhawe vha vhee zwanḓa kha ṱhoho ya yeneyo mboho.+
11 U ṱhavhe yeneyo mboho phanḓa ha Yehova, muṋangoni wa dennde ḽa muṱangano.+
12 U dzhie maṅwe malofha a yeneyo mboho nga munwe, u a rothisele kha ṋanga dza aḽeṱare,+ malofha oṱhe o salaho u a shululele fhasi phanḓa ha aḽeṱare.+
13 U dzhie mapfura+ oṱhe a re nga nnḓa ha mala, mapfura a re kha tshivhindi na tswio mbili na mapfura a re khadzo, u zwi fhise uri zwi dube kha aḽeṱare.+
14 Fhedzi ṋama ya mboho na mukumba wayo na muswane wayo u zwi fhise nga mulilo nnḓa ha dennde. Ndi tshifhiwa tsha u pfumelela tshivhi.
15 “U dzhie thutha nthihi, Aroni na vharwa vhawe vha fanela u vhea zwanḓa zwavho kha ṱhoho yayo.+
16 U ṱhavhe yeneyo thutha, u dzhie malofha ayo u a shashe kha aḽeṱare thungo dzoṱhe.+
17 U tumukanye yeneyo thutha, u ṱanzwe mala ayo+ na khwanḓa dzayo u vhee zwenezwo zwipiḓa u katela na ṱhoho yayo.
18 U tea u fhisa yeneyo thutha yoṱhe kha aḽeṱare. Ndi tshifhiwa tsha u fhiswa tsha Yehova, tshi nukhelelaho.+ Ndi tshifhiwa tsha Yehova tsha u fhiswa nga mulilo.
19 “U dovhe u dzhie iṅwe thutha, Aroni na vharwa vhawe vha fanela u vhea zwanḓa zwavho kha ṱhoho ya yeneyo thutha.+
20 U ṱhavhe yeneyo thutha, maṅwe malofha ayo u a ḓodze kha nḓevhe ya tsha u ḽa ya Aroni na kha nḓevhe dza tsha u ḽa dza vharwa vhawe na kha magunwe a zwanḓa zwavho zwa kha tshanḓa tsha u ḽa na kha magunwe a milenzhe yavho ya tsha u ḽa, u shashe malofha kha aḽeṱare thungo dzoṱhe.
21 U dzhie maṅwe malofha a re kha aḽeṱare na maṅwe mapfura a u ḓodza+ u zwi hashe Aroni na kha zwiambaro zwawe na kha vharwa vhawe na kha zwiambaro zwa vharwa vhawe, uri ene na zwiambaro zwawe na vharwa vhawe na zwiambaro zwavho zwi vhe zwikhethwa.+
22 “Ngauralo, u dzhie mapfura a yeneyo thutha, mutshila wo nonaho, mapfura a re nga nnḓa ha mala, mapfura a re kha tshivhindi, tswio mbili na mapfura a re khadzo+ na mulenzhe wa tsha u ḽa, ngauri ndi thutha ya u vhea vhotshifhe.+
23 U dovhe u dzhie na ḽofo ya vhurotho na ḽofo yo ṱanganyiswaho na mapfura i re na buli vhukati na makokisi kha manngi u re na vhurotho vhu si na mbiliso vhu re phanḓa ha Yehova.
24 Zwoṱhe u fanela u zwi vhea kha zwanḓa zwa Aroni na kha zwanḓa zwa vharwa vhawe, u zwi dzungudze u tshi zwi isa phanḓa na murahu sa tshifhiwa tsha u dzungudzwa tsha Yehova.
25 U zwi dzhie kha zwanḓa zwavho, u zwi vhee nṱha ha aḽeṱare nṱha ha tshifhiwa tsha u fhiswa tshi nukhelelaho phanḓa ha Yehova. Ndi tshifhiwa tsha Yehova tsha u fhiswa nga mulilo.
26 “U dzhie tshiakha tsha thutha ya u vhea Aroni,+ u tshi dzungudze u tshi tshi isa phanḓa na murahu sa tshifhiwa tsha u dzungudzwa tsha Yehova, tshi ḓo vha mukovhe wau.
27 U ite uri tshiakha tsha tshifhiwa tsha u dzungudzwa tshi vhe tshikhethwa na mulenzhe wa tshipiḓa tshikhethwa tshe tsha dzungudzwa tsha thutha ya u vhea vhotshifhe,+ zwe zwa vha zwi tshi khou ṋekedzelwa Aroni na vharwa vhawe.
28 Zwi fanela u vha zwa Aroni na vharwa vhawe u ya nga mulayo wa lini na lini une wa fanela u tevhedzwa nga Vhaisiraele, ngauri ndi mukovhe mukhethwa, u ḓo vha mukovhe mukhethwa une wa ḓo bva kha Vhaisiraele.+ Ndi mukovhe wavho mukhethwa wa Yehova u bvaho kha zwiṱhavhelo zwavho zwa u pfumedzana.+
29 “Musi Aroni a tshi fa, zwiambaro zwawe zwikhethwa+ zwi ḓo ambarwa nga vharwa vhawe+ musi vho no ḓodzwa na u vhewa sa vhotshifhe.
30 Tshifhe a bvaho kha vharwa vhawe ane a mu tevhela na ane a ḓa denndeni ḽa muṱangano uri a shume fhethu hukhethwa u ḓo zwi ambara maḓuvha a sumbe.+
31 “U dzhie thutha ya u vhea vhotshifhe, u vholomise ṋama yayo fhethu hukhethwa.+
32 Aroni na vharwa vhawe vha ḓo ḽa+ ṋama ya thutha na vhurotho vhu re kha manngi vhu re muṋangoni wa dennde ḽa muṱangano.
33 Vha fanela u ḽa zwipiḓa zwe zwa shumiswa kha tshipfumelelo tsha u vha vhea sa vhotshifhe* na uri zwi vhe zwikhethwa. Fhedzi a zwo ngo tea u ḽiwa nga muthu ane a si fanelee,* ngauri ndi zwikhethwa.+
34 Arali vhurotho na ṋama naho i ifhio ya tshiṱhavhelo tsha u vhewa ha muthu uri a vhe tshifhe ya sala u swika nga matsheloni, u zwi fhise.+ A zwo ngo fanela u ḽiwa ngauri ndi zwikhethwa.
35 “U ite zwenezwi kha Aroni na vharwa vhawe u tshi tevhedza zwoṱhe zwe nda u laya. U ḓo dzhia maḓuvha a sumbe u itela u vha vhea sa vhotshifhe.*+
36 Ḓuvha ḽiṅwe na ḽiṅwe u ṋekedze mboho ya tshifhiwa tsha u pfumelela tshivhi, u kunakise aḽeṱare nga u i itela tshipfumelelo, u tea u i ḓodza uri i vhe khethwa.+
37 U fhedze maḓuvha a sumbe u tshi khou itela aḽeṱare tshipfumelelo, u tea u i khetha uri i vhe aḽeṱare khethwa-khethwa.+ Ane a kwama yeneyo aḽeṱare u ḓo vha mukhethwa.
38 “Hezwi ndi zwine wa ḓo zwi ṋekedza kha aḽeṱare: thutha mbili dzi re na ṅwaha muthihi ḓuvha ḽiṅwe na ḽiṅwe, tshifhinga tshoṱhe.+
39 Nga matsheloni u ṋekedze thutha nthihi, iṅwe thutha u i ṋekedze nga madekwana.*+
40 U dzhie tshafumi tsha tshikalo tsha efa* tsha fuḽauru tsekene yo ṱanganyiswaho na tshipiḓa tshithihi kha zwiṋa tsha hini* tsha mapfura o kunaho na tshipiḓa tshithihi kha zwiṋa tsha hini tsha waini ya tshifhiwa tsha u nwiwa, zwenezwi zwi ḓo ṋekedzwa na thutha ya u thoma.
41 Nga madekwana u ṋekedze thutha ya vhuvhili khathihi na zwiṱhavhelo zwi fanaho zwa fuḽauru na zwifhiwa zwa u nwiwa u fana na zwa nga matsheloni. U zwi ṋekedze uri zwi vhe tshifhiwa tsha u fhiswa tsha Yehova tshi nukhelelaho.
42 Tshenetsho tshifhiwa tsha u fhiswa tshi ṋekedzwe tshifhinga tshoṱhe kha mirafho yaṋu yoṱhe muṋangoni wa dennde ḽa muṱangano phanḓa ha Yehova, hune nda ḓo ḓivhonadza kha inwi na u amba na inwi henefho.+
43 “Ndi ḓo ḓivhonadza henefho kha Vhaisiraele, hu ḓo vha hukhethwa nga vhugala hanga.+
44 Ndi ḓo ita uri dennde ḽa muṱangano na aḽeṱare zwi vhe zwikhethwa, ndi ḓo ita uri Aroni na vharwa vhawe+ vha vhe vhakhethwa uri vha shume sa vhotshifhe vhanga.
45 Ndi ḓo dzula* vhukati ha vhathu vha Isiraele, nda vha Mudzimu wavho.+
46 Vha ḓo ḓivha uri ndi nṋe Yehova Mudzimu wavho we a vha bvisa shangoni ḽa Egipita uri ndi dzule vhukati havho.+ Ndi nṋe Yehova Mudzimu wavho.
Ṱhaluso dzi re magumoni a siaṱari
^ Dzenedzi ḽofo dzo vha dzi na buli vhukati.
^ Sedzani Mutevhe Wa Ṱhalutshedzo Ya Maipfi.
^ Kana “bannda ḽa khunduni.”
^ Kana “khare ṱhukhu khethwa i re na matombo a ndeme.”
^ Thevhedz., “tsha u ḓadza tshanḓa tshavho.”
^ Thevhedz., “nga mutsinda,” zwine zwa amba muthu ane a si vhe wa muṱa wa Aroni.
^ Thevhedz., “u ḓadza tshanḓa tshavho.”
^ Thevhedz., “vhukati ha madekwana mavhili.”
^ Efa i lingana na ḽithara dza 22. Sedzani Ṱhume. B14.
^ Hini i lingana na ḽithara dza 3,67. Sedzani Ṱhume. B14.
^ Kana “atha dennde ḽikhethwa.”
