Ekisoda 35:1-35
35 Nga murahu Mushe a kuvhanganya tshitshavha tshoṱhe tsha Vhaisiraele a amba natsho a ri: “Zwe Yehova a laya uri zwi itwe ndi hezwi:+
2 Hu nga shumiwa maḓuvha a rathi, fhedzi ḓuvha ḽa vhusumbe ḽi fanela u vha ḽikhethwa kha inwi, kha Yehova savhatha ndi ya u awela tshoṱhe.+ Muthu ane a shuma nga savhatha u ḓo vhulawa.+
3 Ni songo vhasa mulilo fhethu naho hu ngafhi hune na dzula hone nga ḓuvha ḽa Savhatha.”
4 Mushe a amba na tshitshavha tshoṱhe tsha Vhaisiraele a ri: “Zwe Yehova a laya ndi hezwi:
5 ‘Ni kuvhanganyele Yehova muṋeelo.+ Muṅwe na muṅwe a ḓisele Yehova muṋeelo nga hune mbilu yawe+ ya funa ngaho: musuku, siḽiva, koporo,
6 harane ya muvhala wa lutombo, wuḽu ya phephulu, labi ḽitswuku, labi ḽavhuḓi ḽa ḽinene, mamvele a mbudzi,+
7 mikumba ya thutha yo daiwaho nga muvhala mutswuku, mikumba ya tshiphu, thanda dza muunga,
8 mapfura a mbone, mapfura a baḽisamu a u ḓodza na a zwioro zwi nukhelelaho,+
9 matombo a onikisi na matombo ane a ḓo vhewa kha efodo*+ na kha tsha u vhea khanani.+
10 “‘Vhoṱhe vha re na vhutsila*+ vhukati haṋu kha vha ḓe vha ite zwoṱhe zwe Yehova a laya,
11 dennde ḽikhethwa* na labi ḽaḽo na ṱhanga yaḽo, zwihovhi zwaḽo na fureme dzaḽo dza mabulannga, mbalelo dzaḽo, phuphu dzaḽo, milenzhe yaḽo;
12 Mbulungelo+ na thanda dzayo,+ mutibo+ na khetheni+ ḽa u vala;
13 ṱafula+ na thanda dzayo na thundu dzayo dzoṱhe na vhurotho ha ṱano;+
14 tshiṱomambone+ tsha u vhonetshela na thundu dzatsho na mbone dzatsho na mapfura a u dugisa mbone;+
15 aḽeṱare ya zwioro+ na thanda dzayo; mapfura a u ḓodza na zwioro zwi nukhelelaho;+ labi* ḽa u vala muṋangoni wa dennde ḽikhethwa;
16 aḽeṱare ya tshifhiwa tsha u fhiswa+ na sefo yayo ya koporo, thanda dzayo na thundu dzayo dzoṱhe; sambelo na milenzhe yaḽo;+
17 makhetheni ane a ḓo nembeledzwa muṱani,+ phuphu dzayo na milenzhe yayo; labi* ḽa u vala muṋango u yaho muṱani;
18 tsimbi dza u ṱoka dennde ḽikhethwa na tsimbi dza muṱani na thambo dzadzo;+
19 zwiambaro zwo lukwaho+ zwavhuḓi zwa u shuma nḓuni khethwa, zwiambaro zwikhethwa zwa tshifhe Aroni+ na zwiambaro zwa vharwa vhawe uri vha shume sa vhotshifhe.’”
20 Nga zwenezwo, tshitshavha tshoṱhe tsha Vhaisiraele tsha ṱuwa henefho phanḓa ha Mushe.
21 Vhoṱhe vhe mbilu dzavho na muya wavho wa vha ṱuṱuwedza+ vha ḓisa muṋeelo kha Yehova uri u shumiswe u itela dennde ḽa muṱangano na zwoṱhe zwine zwa ṱoḓea u itela u fhaṱa ḽeneḽo dennde na zwiambaro zwikhethwa.
22 Ha ḓa vhanna na vhafumakadzi, muṅwe na muṅwe we mbilu yawe ya vha i tshi zwi funa, a ḓisa zwipereṱe, zwiṅiṋa, rinngi na dziṅwe dzhuweḽari na madzanga a musuku a mifuda yoṱhe. Vhoṱhe vha ḓisa tshifhiwa* tsha musuku kha Yehova.+
23 Vhoṱhe vha re na harane ya muvhala wa lutombo, wuḽu ya phephulu, labi ḽitswuku, labi ḽavhuḓi ḽa ḽinene, mamvele a mbudzi, mikumba ya thutha yo daiwaho nga muvhala mutswuku na mikumba ya tshiphu, vha zwi ḓisa.
24 Vhoṱhe vha ṋeelaho nga siḽiva na koporo vha ḓisa muṋeelo wa Yehova na vhoṱhe vha re na thanda dza muunga vha dzi ḓisa vha tshi itela u thusa kha mushumo wa u ita dennde.
25 Vhafumakadzi vhoṱhe vha re na vhutsila+ vha hoṱa nga zwanḓa zwavho, vha ḓisa zwe vha zwi hoṱa: harane ya muvhala wa lutombo, wuḽu ya phephulu, labi ḽitswuku na labi ḽavhuḓi ḽa ḽinene.
26 Vhafumakadzi vhoṱhe vha re na vhutsila vhe mbilu dzavho dza vha ṱuṱuwedza vha hoṱa mamvele a mbudzi.
27 Vharangaphanḓa vha ḓisa matombo a onikisi na maṅwe matombo ane a ḓo vhewa kha efodo na kha tsha u vhea khanani,+
28 mapfura a baḽisamu na mapfura a u dugisa mbone na a u ḓodza+ na a zwioro zwi nukhelelaho.+
29 Vhanna vhoṱhe na vhafumakadzi vhe mbilu dzavho dza vha ṱuṱuwedza vha ḓisa zwiṅwe zwithu u itela mushumo we Yehova a vha o laya Mushe uri u itwe; Vhaisiraele vho zwi ḓisela Yehova sa tshifhiwa tsha u ḓifunela.+
30 Mushe a amba na Vhaisiraele a ri: “Yehova o nanga Betsaliele murwa wa Uri ane a vha murwa wa Huri wa lushaka lwa Yuda.+
31 O mu ḓadza nga muya wawe, a mu ṋea vhuṱali, a ita uri a pfesese, a ita uri a ḓivhe mishumo yoṱhe ya zwanḓa,
32 uri a ite dzipulane, a shume nga musuku, siḽiva na koporo,
33 uri a vhaḓe matombo na u a tsheṱa na u vhaḓa thanda dzavhuḓi dza mifuda yoṱhe.
34 Mudzimu o dzhenisa vhukoni ha u funza mbiluni ya Betsaliele na Oholiaba+ murwa wa Ahisama wa lushaka lwa Dani.
35 O vha ṋea vhutsila*+ ha u ita mishumo yoṱhe ya zwanḓa, ha u khavhisa na u luka u tshi shumisa harane ya muvhala wa lutombo, wuḽu ya phephulu, labi ḽitswuku, labi ḽavhuḓi ḽa ḽinene na u vha muluki. Vhenevho vhanna vha ḓo ita mushumo muṅwe na muṅwe na u ola pulane iṅwe na iṅwe.
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Thevhedz., “vha re na mbilu ya vhuṱali.”
^ “Ndi dennde ḽa vhurabeli ḽine ḽa hwalea ḽe ḽa vha ḽi tshi shumiswa nga Vhaisiraele; nga zwiṅwe zwifhinga ḽo vha ḽi tshi vhidzwa ‘dennde ḽa muṱangano.’”
^ Kana “khetheni.”
^ Kana “khetheni.”
^ Kana “zwifhiwa zwa u dzungudzwa.”
^ Thevhedz., “mbilu ya vhuṱali.”
