Ekisoda 38:1-31
38 Betsaliele a ita aḽeṱare ya tshifhiwa tsha u fhiswa nga thanda dza muunga. Yo vha i tshi lingana thungo dzoṱhe, i vhulapfu ha khubithi* ṱhanu, vhuphara ha khubithi ṱhanu, u ya nṱha hu khubithi tharu.+
2 A ita maṋanga kha thungo dzayo nṋa. Maṋanga ayo o vha a tshi vhonala kha thungo dzayo. A dovha a i ḓodza koporo.+
3 A ita thundu dzoṱhe dza aḽeṱare, zwa u kumbela miḽora, fosholo, zwigoḓelo, forogo na zwithu zwa u oka mulilo. Thundu dzayo dzoṱhe dzo vha dzo itwa nga koporo.
4 A dovha a itela yeneyo aḽeṱare sefo ya koporo, a i dzhenisa fhasi ha lumeme lwayo, hune ha ṱoḓa u vha vhukati hayo.
5 A ita na rinngi nṋa kha thungo nṋa tsini na sefo ya koporo uri thanda dzi kone u dzheniswa kha dzenedzo rinngi.
6 A vhaḓa thanda dza muunga a dzi ḓodza koporo.
7 A dzhenisa thanda kha rinngi dze dza vha dzi nga thungo ha aḽeṱare u itela u i hwala. A ita na bogisi ḽa mabulannga ḽi si na tshithu.
8 A ita sambelo nga koporo+ na milenzhe yaḽo ya koporo; o shumisa zwivhoni* zwa vhafumakadzi vho dzudzanyelwaho u shuma muṋangoni wa dennde ḽa muṱangano.
9 A ita na muṱa.+ Nga thungo ya tshipembe, yo lavhelesaho tshipembe, a nembeledza makhetheni a muṱani o lukwaho a ḽinene yavhuḓi, a khubithi dza 100.+
10 Ho vha hu na phuphu dza 20 na milenzhe ya 20 ya koporo, zwihovhi zwa phuphu na mikungelo yadzo zwi zwa siḽiva.
11 Zwiṅwe hafhu, thungo ya devhula ho nembeledzwa makhetheni a khubithi dza 100. Phuphu dzao dza 20 na milenzhe yadzo yo vha i ya koporo. Zwihovhi zwa phuphu na mikungelo yadzo zwo vha zwi zwa siḽiva.
12 Fhedzi thungo ya vhukovhela ho vha ho nembeledzwa makhetheni a khubithi dza 50. Ho vha hu na phuphu dza fumi na milenzhe ya fumi, zwihovhi zwa phuphu na mikungelo yadzo zwo vha zwi zwa siḽiva.
13 Vhuphara ha thungo ya vhubvaḓuvha ho vha hu khubithi dza 50.
14 Kha iṅwe thungo hu na makhetheni o nembelelaho a khubithi dza 15, hu na phuphu tharu na milenzhe miraru.
15 Kha iṅwe thungo i re muṋangoni wa muṱa, ho vha ho nembeledzwa makhetheni a khubithi dza 15, hu na phuphu tharu na milenzhe miraru.
16 Makhetheni oṱhe o nembeledzwaho u mona na muṱa o vha o itwa nga labi ḽavhuḓi ḽa ḽinene ḽo lukwaho.
17 Milenzhe ya phuphu yo vha yo itwa nga koporo, zwihovhi zwa phuphu na mikungelo yadzo zwi zwa siḽiva, ṱhodzi dzadzo dzo ḓodziwa siḽiva, mikungelo ya phuphu dzoṱhe dza muṱani+ yo itwa nga siḽiva.
18 Labi* ḽa u vala muṋango wa muṱa ḽo vha ḽo lukwa nga harane ya muvhala wa lutombo, wuḽu ya phephulu, labi ḽitswuku na labi ḽavhuḓi ḽa ḽinene ḽo lukwaho. Vhulapfu haḽo ho vha hu khubithi dza 20, u ya nṱha ḽi khubithi dza 5, u ya nṱha ḽi tshi lingana na makhetheni o nembeledzwaho muṱani.+
19 Phuphu dzaḽo nṋa na milenzhe yaḽo miṋa yo vha yo itwa nga koporo. Zwihovhi zwaḽo na mikungelo zwo vha zwi zwa siḽiva, ṱhodzi dzadzo dzo vha dzo ḓodziwa siḽiva.
20 Tsimbi dzoṱhe dza u ṱoma dennde ḽikhethwa* na dza u mona na muṱa dzo vha dzo itwa nga koporo.+
21 Mushe o amba uri hu ṅwaliwe fhasi zwine zwa ḓo shumiswa u fhaṱa dennde ḽikhethwa ḽi re na mbulungelo ya mulanga,+ Vhalevi+ vho ita zwenezwi vha tshi livhiswa nga Ithamara+ murwa wa tshifhe Aroni.
22 Betsaliele+ murwa wa Uri ane a vha murwa wa Huri wa lushaka lwa Yuda o ita zwoṱhe zwe Yehova a laya Mushe.
23 O vha e na Oholiaba+ murwa wa Ahisama wa lushaka lwa Dani, mutsila wa mishumo ya zwanḓa, mukhavhisi na muluki wa harane ya muvhala wa lutombo, wuḽu ya phephulu, labi ḽitswuku na labi ḽavhuḓi ḽa ḽinene.
24 Musuku woṱhe we wa shumiswa kha mushumo woṱhe wa fhethu hukhethwa wo vha u musuku we wa ṋekedzwa sa tshifhiwa tsha u dzungudzwa.+ Wo vha u tshi lingana talente* dza 29 na shekele* dza 730 u ya nga nḓila ye ha vha hu tshi kalwa ngayo tshileme tsha shekele fhethu hukhethwa.
25 Siḽiva ya vho ṅwaliswaho tshitshavhani yo vha i talente dza 100 na shekele dza 1 775 u ya nga nḓila ye ha vha hu tshi kalwa ngayo tshileme tsha shekele fhethu hukhethwa.
26 Hafu ya shekele ya muthu muṅwe na muṅwe yo vha i hafu u ya nga nḓila ye ha vha hu tshi kalwa ngayo tshileme tsha shekele fhethu hukhethwa, kha munna muṅwe na muṅwe o ṅwalisaho u bva kha miṅwaha ya 20 u ya nṱha,+ dzo vha dzi 603 550.+
27 Musi hu tshi fulwa milenzhe ya fureme dza dennde ḽikhethwa* na milenzhe ya phuphu dzi re tsini na makhetheni oṱhe o nembeledzwaho ho shumiswa talente dza 100; milenzhe ya 100 i tshi lingana na talente dza 100, talente nthihi yo vha i tshi lingana na mulenzhe muthihi.+
28 A ita zwihovhi zwa kha dziphuphu nga shekele dza 1 775, a ḓodza ṱhodzi dzazwo, a dzi ṱanganya.
29 Koporo ye ya ṋekedzwa* yo vha i ya talente dza 70 na shekele* dza 2 400.
30 A ita ngayo milenzhe ya phuphu dza muṋango wa dennde ḽa muṱangano, aḽeṱare ya koporo na sefo yayo ya koporo, thundu dza aḽeṱareni,
31 milenzhe ya phuphu dza muṱani, milenzhe ya phuphu dza muṋango wa muṱa na tsimbi dzoṱhe dza u ṱoma dennde na tsimbi+ dzoṱhe dza u ṱoma dennde u mona na muṱa.
Ṱhaluso dzi re magumoni a siaṱari
^ Khubithi nthihi i lingana na senthimithara dza 44,5. Sedzani Ṱhume. B14.
^ Ndi zwivhoni zwo itwaho nga tsimbi zwo penyiswaho vhukuma.
^ Kana “Khetheni.”
^ “Ndi dennde ḽa vhurabeli ḽine ḽa hwalea ḽe ḽa vha ḽi tshi shumiswa nga Vhaisiraele; nga zwiṅwe zwifhinga ḽo vha ḽi tshi vhidzwa ‘dennde ḽa muṱangano.’”
^ Talente nthihi i lingana na khilogramu dza 34,2. Sedzani Ṱhume. B14.
^ Shekele nthihi i lemela gramu dza 11,4. Sedzani Ṱhume. B14.
^ Kana “fhethu hukhethwa.”
^ Kana “Tshifhiwa tsha u dzungudzwa.”
^ Shekele nthihi i lemela gramu dza 11,4. Sedzani Ṱhume. B14.
