Esera 3:1-13
3 Nga ṅwedzi wa vhusumbe+ musi Vhaisiraele* vho no vha miḓini yavho, vha kuvhangana vha vha vhathihi ngei Yerusalema.
2 Yeshua+ murwa wa Yehotsadaka na vhaṅwe vhotshifhe na Serubabele+ murwa wa Shelathiele+ na vhahawe vha fhaṱa aḽeṱare ya Mudzimu wa Isiraele, uri vha ṋekedze zwiṱhavhelo zwa u fhiswa khayo, sa zwe zwa ṅwaliwa kha Mulayo wa Mushe+ mushumeli wa Mudzimu wa ngoho.
3 Vha fhaṱa aḽeṱare fhethu he ya vha i hone, naho vho vha vha tshi ofha vhathu vha mashango o vha tangaho,+ vha thoma u ṋekedza Yehova zwiṱhavhelo zwa u fhiswa khayo, zwiṱhavhelo zwa u fhiswa zwa nga matsheloni na zwa nga madekwana.+
4 Vha ita Vhuṱambo ha Mishasha* vha tshi tevhedza zwo ṅwaliwaho,+ ḓuvha ḽiṅwe na ḽiṅwe vha ṋekedza tshivhalo tsho vhewaho tsha zwiṱhavhelo zwa u fhiswa tshe tsha vha tshi tshi ṱoḓea u ya nga mulayo.+
5 Nga murahu ha zwenezwo, vha ṋekedza tshifhiwa tsha u fhiswa tsha nga misi+ na zwifhiwa zwa ṅwedzi muswa+ na zwifhiwa zwoṱhe zwa vhuṱambo ho khetheaho+ ha Yehova, u katela na zwa muṅwe na muṅwe we a ṋekedza Yehova tshifhiwa nga u ḓifunela.+
6 Nga ḓuvha ḽa u thoma ḽa ṅwedzi wa vhusumbe+ vha thoma u ṋekedza Yehova zwiṱhavhelo zwa u fhiswa, naho mutheo wa thembele ya Yehova wo vha u sa athu u thomiwa.
7 Vha bvisa tshelede vha ṋea vhavhaḓi vha matombo+ na vhanna vha re na vhutsila,+ vha bvisa zwiḽiwa na zwinwiwa na mapfura vha ṋea Vhasidoni na Vhatiro nge vha vha ḓisela matanda a miṱaululo nga lwanzheni a tshi bva Libanoni a tshi ya Yope,+ u ya nga thendelo ye vha ṋewa nga Korese khosi ya Peresia.+
8 Musi ho no fhela miṅwaha mivhili u bva tshee vha swika nḓuni ya Mudzimu wa ngoho ngei Yerusalema nga ṅwedzi wa vhuvhili, Serubabele murwa wa Shelathiele, Yeshua murwa wa Yehotsadaka na vhaṅwe vhahawe vhoṱhe, vhotshifhe na Vhalevi na vhoṱhe vhe vha vhuya Yerusalema vha tshi bva vhuthubwani+ vha thoma mushumo; vha vhea Vhalevi vha re na miṅwaha ya 20 u ya nṱha uri vha lavhelese mushumo wa nḓuni ya Yehova.
9 Ngauralo, Yeshua, vharwa vhawe, vhahawe na Kadamiele na vharwa vhawe, vharwa vha Yuda, vha ṱangana vhoṱhe uri vha lavhelese vhane vha khou ita mushumo nḓuni ya Mudzimu wa ngoho, khathihi na vharwa vha Henadada,+ vharwa vhavho na vhahavho vhane vha vha Vhalevi.
10 Musi vhafhaṱi vha tshi thea mutheo wa thembele ya Yehova,+ vhotshifhe vha ima vho ambara zwiambaro zwa u shuma, vho fara phalaphala,+ na Vhalevi vharwa vha Asafu vho fara simbala, vha renda Yehova vha tshi tevhedza vhulivhisi ha Davida khosi ya Isiraele.+
11 Vha thoma u imba+ vha tshi renda na u livhuwa Yehova, “ngauri ndi wavhuḓi; nahone lufuno lwawe lu sa shanduki lwe a lu sumbedza Isiraele ndi lwa lini na lini.”+ Vhathu vhoṱhe vha huwelela vha renda Yehova nga ipfi ḽihulu nge mutheo wa nnḓu ya Yehova wa vha wo thewa.
12 Vhotshifhe vhanzhi, Vhalevi na vharangaphanḓa vha miṱa ya vhokhotsi avho, vhakalaha vhe vha vhona nnḓu ya kale,+ vha vusa tshililo tshihulu musi vha tshi vhona mutheo wa yeneyi nnḓu u tshi khou thewa, ngeno vhaṅwe vhanzhi vha tshi khou huwelela vho takala.+
13 Ngauralo, vhathu vha si kone u fhambanyisa phosho ya vhathu vho takalaho na phosho ya vhane vha khou lila, ngauri vhathu vho vha vha tshi khou ita phosho khulu ye ya pfala kule nga maanḓa.
Ṱhaluso dzi re magumoni a siaṱari
^ Thevhedz., “vharwa vha Isiraele.”
^ Kana “Vhudzulo ha Tshifhinganyana.”
