Genesi 19:1-38
19 Vhaḽa vharuṅwa vhavhili vha swika Sodoma nga madekwana, Loto o vha o dzula khoroni ya Sodoma. Musi Loto a tshi vha vhona, a takuwa uri a vha ṱanganedze, a losha o kwatamisa tshifhaṱuwo.+
2 A ri: “Vhaṋe vhanga, ndi khou humbela uri ni ḓe nḓuni ya mushumeli waṋu ni eḓele hone, ni ṱanzwiwe milenzhe. Ni ḓo vuwa nga matsheloni-tsheloni na ṱuwa.” Vharuṅwa vha ri: “Ri ḓo eḓela khoroni ya muḓi.”
3 Fhedzi a vha kombetshedza lwe vha ṱuwa nae nḓuni yawe. A vha itela tshimima, a vha bakela vhurotho vhu si na mbiliso, vha ḽa.
4 Musi vha sa athu u eḓela, ha ḓa vhanna vha muḓi wonoyo wa Sodoma vha tanga yeneyo nnḓu, u bva kha mutukana u swika kha mukalaha, ha ḓa vhathu vhoṱhe.
5 Vha vhidzelela Loto vha ri: “Vha ngafhi vhaḽa vhanna vhe vha ḓa ha iwe ṋamusi nga madekwana? Vha ḓise ngeno uri ri ite zwa vhudzekani navho.”+
6 Mafheleloni Loto a ya khavho muṋangoni, a ima phanḓa havho a vala vothi.
7 A ri: “Ndi khou tou ni humbela vhahashu, ni songo ita vhuvhi.
8 Ndi khou tou ni humbela, ndi na vhananyana vhavhili vha sa athu u itaho zwa vhudzekani na munna. Ndi khou humbela uri ndi ni ḓisele vhone uri ni vha ite zwine na funa. Fhedzi havha vhanna vho ḓa nḓuni yanga, ni songo vha ita tshithu.”+
9 Vha ri: “Bvela kule!” Vha dovha vha ri: “Hoyu munna o ḓa fhano e mutsinda fhedzi u ṱoḓa u ri haṱula. Zwino ri ḓo u ita zwi fhiraho zwine ra ḓo ita avho vhanna.” Vha kwanyeledza* Loto, vha sendela uri vha kwashe vothi.
10 Vhenevho vhanna vha bvisa zwanḓa vha kokodzela Loto nga ngomu nḓuni he vha vha vhe hone, vha vala vothi.
11 Fhedzi vha ita uri vhenevho vhanna vha re muṋangoni wa nnḓu vha si tsha vhona, u bva kha muṱuku u swika kha muhulwane, vha vhuya vha neta vha tshi khou lingedza u wana muṋango.
12 Vhenevho vhanna vha amba na Loto vha ri: “Naa u na shaka fhano? Dzhia vhakwasha vhau, vharwa vhau na vhananyana vhau na vhoṱhe vhahau vha re kha uno muḓi, ni bve!
13 Ri ḓo fhelisa wonoyu muḓi, ngauri mukosi wa u lila nga hawo ndi muhulu phanḓa ha Yehova,+ ndi ngazwo Yehova o ri ruma uri ri fhelise wonoyu muḓi.”
14 Loto a bvela nnḓa a thoma u amba na vhakwasha vhawe vhane vha ḓo vhinga vhananyana vhawe, a ri: “Ibvani fhano! Ngauri Yehova u ḓo fhelisa wonoyu muḓi!” Fhedzi kha vhakwasha vhawe, zwo vha zwi tshi vhonala u nga u khou swaswa.+
15 Naho zwo ralo, musi ḽi tshi vho vha maḓautsha, vharuṅwa vha ṱavhanyisa Loto vha ri: “Takuwa u dzhie mufumakadzi wau na vhananyana vhau vhavhili vhane wa vha navho, uri ni sa ḓo fheliswa nga mulandu wa vhukhakhi ha uno muḓi!”+
16 Musi a tshi kha ḓi mona-mona, Yehova a mu pfela vhuṱungu,+ vhenevho vhanna vha fara tshanḓa tshawe na tsha mufumakadzi wawe na zwa vhananyana vhawe vha vha bvisela nnḓa ha muḓi.+
17 Musi vha tshi tou bvela nnḓa ha muḓi, muṅwe wavho a ri: “Shavhani uri ni ponyoke! Ni songo sedza murahu,+ ni songo ima tshiṱirikini naho tshi tshifhio!+ Shavhelani dzinguni ḽa dzithavhani uri ni si fheliswe!”
18 Loto a amba navho a ri: “Hu si henefho, ndi khou tou humbela iwe Yehova!
19 Ndi khou tou humbela, wo takalela mushumeli wau, wa ntsumbedza vhuthu vhuhulu* nga u ntshidza,+ fhedzi a thi koni u shavhela dzinguni ḽa dzithavhani ngauri ndi shavha u ṱangana na khombo nda fa.+
20 Ndi khou tou humbela, hu na muḓana tsini une nda nga shavhela khawo; ndi muḓi muṱuku. Ndi khou humbela u shavhela henefho. Ndi muḓi muṱuku. Ndi hone ndi tshi ḓo ponyoka.”
21 A amba nae a ri: “Zwo luga. Ndi ḓo u humbulela+ nga u sa fhelisa muḓana une wa khou amba nga hawo.+
22 Shavhela henengei nga u ṱavhanya, ngauri ndi nga si ite tshithu na tshithihi u sa athu u swika henefho!”+ Ndi ngazwo o ri wonoyo muḓana u pfi Tsowari.*+
23 Ḓuvha ḽo vha ḽo no bva musi Loto a tshi swika Tsowari.
24 Nga zwenezwo, Yehova a ita uri Sodoma na Gomora hu ne tsevhela na mulilo, zwi tshi bva ṱaḓulu kha Yehova.+
25 A phusukanya yeneyo miḓi na tshiṱiriki tshoṱhe u katela na vhadzulapo vhoṱhe vha wonoyo muḓi na zwimela zwa mavuni.+
26 Fhedzi mufumakadzi wawe, we a vha e murahu hawe, a sedza murahu, a vha tshiulu tsha muṋo.+
27 Abrahamu a vuwa nga matsheloni-tsheloni a humela fhethu he a vha o ima hone musi a tshi khou amba na Yehova.+
28 A lavhelesa fhasi thungo ya Sodoma na Gomora na shango ḽoṱhe ḽa tshenetsho tshiṱiriki a vhona buluvhutsi ḽi tshi bva shangoni ḽi tshi nga vhutsi vhune ha bva ṋanḓoni!+
29 Musi Mudzimu a tshi fhelisa miḓi ya tshiṱirikini tshenetsho a humbula zwe Abrahamu a zwi amba nga u bvisa Loto miḓini ye a i phusukanya, he Loto a vha a tshi dzula hone.+
30 Nga murahu Loto a ṱuwa Tsowari na vhananyana vhawe vhavhili, a ya a dzula dzinguni ḽa dzithavhani,+ ngauri o vha a tshi khou ofha u dzula Tsowari.+ A dzula bakoni na vhananyana vhawe vhavhili.
31 Wa tanzhe a amba na murathu wawe a ri: “Khotsi ashu o no aluwa, a hu na munna kha ḽino shango ane a nga ita zwa vhudzekani na riṋe sa zwine zwa itwa ḽifhasini ḽoṱhe.
32 Kha ri ṋee khotsi ashu waini ri kone u lala nae uri ri vhulunge lushaka lwa khotsi ashu.”
33 Vha ṋea khotsi avho waini vhusiku honoho; wa tanzhe a ita zwa vhudzekani na khotsi awe, fhedzi khotsi awe a si zwi ḓivhe musi onoyo ṅwana a tshi lala na musi a tshi vuwa.
34 Nga ḓuvha ḽi tevhelaho wa tanzhe a amba na murathu wawe a ri: “Ndo lala na khotsi anga madekwe. Kha ri dovhe ri mu ṋee waini vhusiku vhuno. Iwe u lale nae, ri vhulunge lushaka lwa khotsi ashu.”
35 Vha dovha vha ṋea khotsi avho waini; murathu a ita zwa vhudzekani na khotsi awe, fhedzi khotsi awe a si zwi ḓivhe musi onoyo ṅwana a tshi lala na musi a tshi vuwa.
36 Ngauralo, vhenevho vhananyana vhavhili vha Loto vha vhifhiswa muvhilini nga khotsi avho.
37 Nga u ya ha tshifhinga wa tanzhe a beba murwa, a mu ira dzina ḽa Moaba.+ Ndi ene khotsi a Vhamoaba vha ṋamusi.+
38 Na murathu a beba murwa, a mu ira dzina ḽa Beni-ami. Ndi ene khotsi a Vhaamoni+ vha ṋamusi.
Ṱhaluso dzi re magumoni a siaṱari
^ Kana “sukumedza.”
^ Kana “lufuno luhulu lu sa shanduki.”
^ Zwine zwa amba uri “Muṱuku.”
