Genesi 45:1-28
45 Yosefa a si tsha kona u ḓifara phanḓa ha vhaḓinḓa vhawe vhoṱhe.+ A vhidzelela a ri: “Bvelani nnḓa noṱhe!” Musi o sala na vhakomana vhawe fhedzi, Yosefa a ḓi ḓivhadza khavho.+
2 A vusa tshililo tshihulu lwe na Vhaegipita vha vhuya vha zwi pfa, zwa dovha zwa swika na nḓuni ya Farao.
3 Yosefa a amba na vhakomana vhawe a ri: “Ndi nṋe Yosefa. Naa khotsi anga u kha ḓi tshila?” Fhedzi vhakomana vhawe vha kundwa u mu fhindula, ngauri vho vha vho mangala vhukuma musi vha tshi mu vhona.
4 Yosefa a amba na vhakomana vhawe a ri: “Ndi khou humbela uri ni sendele tsini hanga.” Vha sendela tsini nae.
A ri: “Ndi nṋe Yosefa murathu waṋu, we na mu rengisa a iswa Egipita.+
5 Fhedzi ni songo vhilaela na ḓivhona mulandu nge na nthengisela fhano; Mudzimu o nthuma uri ndi ni range phanḓa uri ni tshidzwe.+
6 Hoyu ndi ṅwaha wa vhuvhili wa nḓala shangoni,+ hu kha ḓi ḓo vha na miṅwe miṅwaha miṱanu hu si na u lima kana u kaṋa.
7 Fhedzi Mudzimu o nthuma uri ndi ni range phanḓa uri hu tshidzwe mutevhe wa lushaka*+ kha ḽifhasi* na u ita uri ni tshidzwe nga nḓila khulwane vhukuma.
8 A si inwi vhe na nthumela fhano, fhedzi ho vha hu Mudzimu wa ngoho, uri a nnyite mueletshedzi muhulwane* kha Farao na mulangi wa vhoṱhe vha nḓuni yawe na muvhusi kha shango ḽoṱhe ḽa Egipita.+
9 “Ṱavhanyani ni humele kha khotsi anga, ni mu vhudze uri: ‘Yosefa murwa wau u ri: “Mudzimu o nnyita mulangi wa shango ḽoṱhe ḽa Egipita.+ Pfulutshela ngeno hune nda vha hone. U songo lenga.+
10 U ḓe u dzule shangoni ḽa Gosheni,+ hune wa ḓo vha u tsini hanga, iwe na vharwa vhau, vhaḓuhulu vhau, nngu dzau, kholomo dzau na zwoṱhe zwine wa vha nazwo.
11 Ndi ḓo u ḓisela zwiḽiwa henefho, ngauri hu kha ḓi vha na miṅwe miṅwaha miṱanu ya nḓala.+ Zwa sa ralo, iwe na vha muṱa wau na zwoṱhe zwine wa vha nazwo ni ḓo fa nga nḓala.”’
12 Inwi na murathu wanga Benyamini ni khou zwi vhona uri ndi nṋe ane nda khou amba na inwi.+
13 Ni tea u vhudza khotsi anga nga ha vhugala hoṱhe vhune nda vha naho Egipita na zwoṱhe zwe na zwi vhona; ṱavhanyani ni ye u dzhia khotsi anga ni mu ḓise fhano.”
14 A kuvhatedza Benyamini murathu wawe a lila, Benyamini na ene a lila o kuvhatedzana nae.+
15 A khisa vhakomana vhawe vhoṱhe a lila o vha kuvhatedza, nga murahu ha zwenezwo vhakomana vhawe vha thoma u amba nae.
16 Muṱani wa Farao ha pfala mafhungo a uri: “Vhakomana vha Yosefa vho ḓa!” Farao na vhashumeli vhawe vha zwi takalela.
17 Ngauralo, Farao a amba na Yosefa a ri: “Vhudza vhakomana vhau uri vha hwese donngi dzavho mihwalo vha ṱuwe vha ye shangoni ḽa Kanana,
18 vha ye u dzhia khotsi avho na miṱa yavho vha pfulutshele ngeno. Ndi ḓo vha ṋea zwithu zwavhuḓi zwa shango ḽa Egipita, vha ḓo ḽa zwibveledzwa zwo nonaho zwa ḽeneḽi shango.+
19 U vha vhudze+ uri vha dzhie gariki+ dza shangoni ḽa Egipita u itela u ṋamedza vhana vhavho na vhafumakadzi vhavho, kha iṅwe yadzo vha ṋamedze khotsi avho vha ḓe ngeno.+
20 Vha songo vhilaela nga thundu dzavho,+ ngauri zwoṱhe zwavhuḓi zwa shango ḽa Egipita ndi zwavho.”
21 Vharwa vha Isiraele vha ita nga u ralo, Yosefa a vha ṋea gariki u ya nga he Farao a laedza ngaho, a vha ṋea na zwine vha ḓo zwi shumisa nḓilani.
22 Muṅwe na muṅwe wavho a mu ṋea zwiambaro zwiswa, fhedzi Benyamini a mu ṋea shekele* dza 300 dza siḽiva na zwiambaro zwiṱanu zwiswa.+
23 Khotsi awe a vha rumela zwi tevhelaho: donngi dza fumi dzo hwala zwithu zwavhuḓi zwa Egipita na donngi dza tsadzi dza fumi dzo hwala goroi na vhurotho na zwiṅwe zwiḽiwa zwa khotsi awe zwine a ḓo zwi ḽa nḓilani.
24 A litsha vhakomana vhawe vha tshi ṱuwa. Naho zwo ralo, a amba navho a ri: “Ni songo tshimbila ni tshi lwa nḓilani.”+
25 Vha ṱuwa shangoni ḽa Egipita, nga murahu vha swika shangoni ḽa Kanana ha khotsi avho Yakobo.
26 Vha mu vhudza vha ri: “Yosefa u kha ḓi tshila, ndi ene ane a khou vhusa shango ḽoṱhe ḽa Egipita!”+ Fhedzi Yakobo a si dzhiele nṱha zwe vha zwi amba ngauri o vha a sa kholwi zwine vha zwi amba.+
27 Musi vha tshi bvela phanḓa vha tshi mu vhudza zwoṱhe zwe Yosefa a vha vhudza zwone, a tshi vhona na gariki ye Yosefa a i rumela uri i mu hwale, Yakobo khotsi avho a dzivhuluwa.
28 Isiraele a ri: “Zwino ndi vho ni kholwa! Yosefa murwa wanga u kha ḓi tshila! Ndi tea u ya nda mu vhona ndi sa athu u fa!”+
Ṱhaluso dzi re magumoni a siaṱari
^ Thevhedz., “u itela u ni tshidzela masalela.”
^ Kana “shango.”
^ Thevhedz., “a nnyite khotsi.”
^ Shekele nthihi i lemela gramu dza 11,4. Sedzani Ṱhume. B14.
