Hagai 1:1-15
1 Nga ṅwaha wa vhuvhili hu tshi khou vhusa Khosi Dario, nga ḓuvha ḽa u thoma ḽa ṅwedzi wa vhurathi, Yehova a tshi shumisa muporofita Hagai,*+ o amba na Serubabele+ muvhusi wa Yuda, ane a vha murwa wa Shelathiele na Yoshua tshifhe muhulu, ane a vha murwa wa Yehotsadaka, a ri:
2 “Yehova wa mavhuthu u ri, ‘Havha vhathu vha ri, “Tshifhinga tsha u fhaṱa* nnḓu* ya Yehova a tshi athu u swika.”’”+
3 Yehova o dovha a amba a tshi shumisa muporofita Hagai,+ a ri:
4 “Naa itshi ndi tshifhinga tsha u dzula nḓuni dzaṋu dzavhuḓi, ngeno nnḓu yanga i shubi?+
5 Yehova wa mavhuthu u ri, ‘Ṱhogomelani* zwine na zwi ita.
6 No zwala mbeu nnzhi, fhedzi ni kaṋa zwiṱuku.+ Ni a ḽa, fhedzi a ni furi. Ni a nwa, fhedzi a ni pfeledzi.* Ni ambara zwiambaro, fhedzi a ni dudelwi. Ane a hola u dzhenisa muholo wawe kha mukhwama u re na mabuli.’”
7 “Yehova wa mavhuthu u ri, ‘Ṱhogomelani* zwine na zwi ita.’
8 “‘Gonyani thavhani ni vhuye na matanda.+ Ni fhaṱe nnḓu yanga+ uri ndi i takalele, ndi huliswe,’+ u ralo Yehova.”
9 “‘No vha no lavhelela zwinzhi na wana zwiṱuku; musi ni tshi zwi ḓisa nḓuni, ndo zwi vhudzulela kule.+ Ndi ngani?’ u ralo Yehova wa mavhuthu. ‘Ndi ngauri nnḓu yanga ndi shubi, ngeno inwi no farekanea nga u ṱhogomela nnḓu dzaṋu.+
10 Ndi ngazwo ḽiṱaḓulu ḽi songo wisa ṅwando na ḽifhasi ḽi songo medza tshithu.
11 Ndo ita uri shango ḽaṋu na dzithavha zwi vhe na gomelelo, zwe zwa ita uri hu vhe na ṱhahelelo ya thoro, waini, mapfura na zwimela. Inwi na zwifuwo zwaṋu ni khou tambula, zwoṱhe zwine na zwi ita ndi mahandana.’”
12 Serubabele+ murwa wa Shelathiele+ na Yoshua tshifhe muhulu, ane a vha murwa wa Yehotsadaka+ na vhaṅwe vhathu vhoṱhe vho thetshelesa zwe Yehova Mudzimu wavho a zwi amba na zwe zwa ambiwa nga muporofita Hagai, ngauri o vha o rumiwa nga Yehova Mudzimu wavho; vhathu vhoṱhe vha thoma u ofha Yehova.
13 Ndi hone Hagai muḓinḓa wa Yehova a tshi vhudza vhathu hoyu mulaedza, u tendelana na zwe a vhudzwa nga Yehova, a ri: “‘Ndi na inwi,’+ u ralo Yehova.”
14 Yehova o ṱuṱuwedza+ Serubabele muvhusi wa Yuda,+ ane a vha murwa wa Shelathiele na Yoshua+ tshifhe muhulu, ane a vha murwa wa Yehotsadaka na vhaṅwe vhathu vhoṱhe; vha ḓa vha fhaṱulula nnḓu ya Yehova Mudzimu wavho wa mavhuthu.+
15 Zwenezwo zwo thoma nga ḓuvha ḽa vhu 24 nga ṅwedzi wa vhurathi, nga ṅwaha wa vhuvhili hu tshi khou vhusa Khosi Dario.+
Ṱhaluso dzi re magumoni a siaṱari
^ Zwine zwa amba uri “O Bebwaho Nga Tshifhinga Tsha Vhuṱambo.”
^ Kana “fhaṱulula.”
^ Kana “thembele.”
^ Kana “Humbulani zwavhuḓi nga ha.”
^ Kana “kholwi.”
^ Kana “Humbulani zwavhuḓi nga ha.”
