Hesekiele 36:1-38
36 “Iwe murwa muthu, porofita nga ha thavha dza Isiraele u ri, ‘Inwi thavha dza Isiraele, ipfani zwine Yehova a amba.
2 Yehova Murena Muvhusahoṱhe u ri: “Swina ḽo amba nga ha inwi ḽa ri, ‘Koṱo! Na zwikwara zwa kale zwo no vha zwashu!’”’+
3 “Porofita u ambe u ri, ‘Yehova Murena Muvhusahoṱhe u ri: “Ngauri vho ni sia ni si na tshithu vha ni ṱhasela thungo dzoṱhe, uri ni dzhiiwe nga vho ponyokaho* vha dzitshaka, vhathu vha bvela phanḓa vha tshi amba nga ha inwi na u ni tshinya dzina,+
4 nga zwenezwo, inwi thavha dza Isiraele, ipfani zwine Yehova Murena Muvhusahoṱhe a amba! Hezwi ndi zwe Yehova Murena Muvhusahoṱhe a zwi vhudza dzithavha na zwikwara, milambwana na magovha, mashubi+ na miḓi i sa dzuli vhathu, ye ya dzhiiwa na u goḓiwa nga vho ponyokaho vha tshaka dzo vha tangaho;+
5 Yehova Murena Muvhusahoṱhe u amba na vhenevho a ri: ‘Ndi ḓo sinyuwa+ nda kaidza vho ponyokaho vha dzitshaka na vhoṱhe vha Edomo, vhe vha takalesa vha ntsema+ vha dzhia shango ḽanga na mafulo aḽo.’”’+
6 “Nga zwenezwo, porofita nga ha shango ḽa Isiraele, u ambe na dzithavha, zwikwara, milambo na magovha, u ri, ‘Zwe Yehova Murena Muvhusahoṱhe a zwi amba ndi hezwi: “Ndi ḓo amba nga u fhisea ndo sinyuwa, ngauri no nyadziwa nga tshaka.”’+
7 “Nga zwenezwo, Yehova Murena Muvhusahoṱhe u ri: ‘Ndi imisa tshanḓa tshanga nda ana uri tshaka dzo ni tangaho na dzone dzi ḓo farwa nga ṱhoni.+
8 Fhedzi inwi thavha dza Isiraele, ni ḓo bva matavhi na aṋwa mitshelo ni tshi itela vhathu vhanga,+ ngauri vha ḓo vhuya hu si kale.
9 Ngauri ndi na inwi, ndi ḓo livhisa ṱhogomelo kha inwi, ni ḓo limiwa na zwalwa mbeu.
10 Ndi ḓo andisa vhathu vhaṋu, vha nnḓu yoṱhe ya Isiraele, miḓi i ḓo dovha ya dzula vhathu+ na he ha vha hu mashubi ha fhaṱululwa.+
11 Ndi ḓo andisa vhathu vhaṋu na zwifuwo zwaṋu;+ ni ḓo engedzea na vha vhanzhi. Ndi ḓo ita uri ni dzulwe nga nḓila i fanaho na ya zwiḽa kale,+ ndi ḓo ita uri zwi ni nakele u fhira zwiḽa kale;+ ndi hone ni tshi ḓo ḓivha uri ndi nṋe Yehova.+
12 Ndi ḓo ita uri vhathu vhanga vha Isiraele vha tshimbile kha inwi, vha dzule kha inwi.+ Ni ḓo vha ifa ḽavho, a ni tsha ḓo dovha na ita uri vha si vhe na vhana.’”+
13 “Yehova Murena Muvhusahoṱhe u ri: ‘Ngauri vha khou amba na inwi vha ri, “Ni shango ḽi ḽaho vhathu na ḽine ḽa sia tshaka dzi si na vhana,”’
14 ‘a ni tsha ḓo ḽa vhathu kana u ita uri tshaka dzi sale dzi si na vhana,’ u ralo Yehova Murena Muvhusahoṱhe.
15 ‘A thi tsha ḓo ita uri ni semiwe nga dzitshaka kana u goḓiwa nga vhathu,+ a ni tsha ḓo khukhulisa tshaka dzaṋu,’ u ralo Yehova Murena Muvhusahoṱhe.”
16 Yehova a dovha a amba na nṋe a ri:
17 “Murwa muthu, musi vha nnḓu ya Isiraele vha tshi kha ḓi dzula shangoni ḽavho, vho ḽi tshikafhadza nga nḓila dzavho na nga mishumo yavho.+ Kha nṋe nḓila dzavho dzo vha dzi tshi nga tshika ya musi mufumakadzi e maḓuvhani.+
18 Nda vha sinyutshela nga nṱhani ha malofha e vha a shulula kha shango+ na nga nṱhani ha uri vho tshikafhadza shango nga midzimu yavho ya zwifanyiso i nengisaho.*+
19 Nda vha balanganya vhukati ha dzitshaka nda vha pandelela kha maṅwe mashango.+ Nda vha haṱula u ya nga nḓila dzavho na nga mishumo yavho.
20 Fhedzi musi vha tshi swika kha dzenedzo tshaka, vhathu vha tshikafhadza dzina ḽanga ḽikhethwa+ nga u amba nga havho vha ri, ‘Havha ndi vhathu vha Yehova, fhedzi vho thathiwa shangoni ḽawe.’
21 Ndi ḓo sumbedza uri ndi dzhiela nṱha dzina ḽanga ḽikhethwa, ḽe ḽa tshikafhadzwa nga vha nnḓu ya Isiraele vhukati ha tshaka dze vha ya khadzo.”+
22 “Ngauralo, u ambe na vha nnḓu ya Isiraele u ri, ‘Yehova Murena Muvhusahoṱhe u ri: “A thi khou zwi itela inwi vha nnḓu ya Isiraele, fhedzi ndi khou zwi itela dzina ḽanga ḽikhethwa ḽe na ḽi tshikafhadza vhukati ha tshaka dze na ya khadzo.”’+
23 ‘Ndi ḓo ita uri dzina ḽanga ḽihulu+ ḽe ḽa tshikafhadzwa vhukati ha dzitshaka, ḽe inwi na ḽi tshikafhadza vhukati hadzo ḽi vhe ḽikhethwa; uri tshaka dzi ḓivhe uri ndi nṋe Yehova,+ musi ndi tshi ḓo itwa mukhethwa vhukati haṋu dzi tshi zwi vhona,’ u ralo Yehova Murena Muvhusahoṱhe.
24 ‘Ndi ḓo ni dzhia kha dziṅwe tshaka nda ni kuvhanganya ni tshi bva kha maṅwe mashango nda ni vhuisa shangoni ḽaṋu.+
25 Ndi ḓo ni shasha nga maḓi o kunaho, uri ni vhe vho kunaho;+ ndi ḓo ni kunakisa kha tshika dzaṋu+ dzoṱhe na kha midzimu yaṋu yoṱhe ya zwifanyiso i nengisaho.+
26 Ndi ḓo ni ṋea mbilu ntswa+ na muhumbulo* muswa.+ Ndi ḓo ni bvisa mbilu ya tombo+ nda ni ṋea mbilu ya ṋama.*
27 Ndi ḓo ni dzhenisa muya wanga, ndi ḓo ita uri ni tevhedze maitele anga,+ ni ḓo tevhedza milayo yanga.
28 Ndi hone ni tshi ḓo dzula shangoni ḽe nda ḽi ṋea vhomakhulukuku waṋu, na vha vhathu vhanga nṋe nda vha Mudzimu waṋu.’+
29 “‘Ndi ḓo ni tshidza kha tshika dzaṋu dzoṱhe, ndi ḓo amba na thoro uri dzi vhe nnzhi, a thi nga ni ḓiseli nḓala.+
30 Ndi ḓo ita uri mitshelo na zwibveledzwa zwa masimu zwi vhe zwinzhi, uri tshaka dzi si tsha dovha dza ni nyadza nga nṱhani ha nḓala.+
31 Ndi hone ni tshi ḓo humbula nḓila dzaṋu mmbi na mishumo yaṋu ye ya vha i si yavhuḓi, ni ḓo ḓinengwa nga nṱhani ha mulandu waṋu na mishumo yaṋu i nengisaho.+
32 Fhedzi ḓivhani hezwi: A thi khou zwi itela inwi,’+ u ralo Yehova Murena Muvhusahoṱhe. ‘Nṱhani hazwo, farwani nga ṱhoni ni ḓipfe no nyadziwa nga nṱhani ha nḓila dzaṋu, inwi vha nnḓu ya Isiraele.’
33 “Yehova Murena Muvhusahoṱhe u ri: ‘Ndi ḓo ita uri miḓi i dzulwe nga vhathu,+ na he ha vha hu shubi hu fhaṱululwe,+ musi ndi tshi ni kunakisa kha milandu yaṋu yoṱhe.
34 Shango ḽe ḽa vha ḽi sa dzulwi nga muthu ḽe vhathu vha vha vha tshi fhira khaḽo ḽi ḓo limiwa.
35 Vha ḓo ri: “Shango ḽe ḽa vha ḽi shubi ḽi vho fana na tsimu ya Edeni,+ miḓi ye ya vha i mashubi yo thuthwa zwino yo no vha miḓi yo tsireledzwaho nga mbondo na ine ya dzulwa nga vhathu.”+
36 Tshaka dzo salaho dzine dza dzula tsini na inwi, dzi ḓo ḓivha uri nṋe Yehova ndo fhaṱulula zwe zwa vha zwo thuthwa, ndo ṱavha he ha vha hu sa dzuli muthu. Ho amba nṋe Yehova, ndo zwi ita.’+
37 “Yehova Murena Muvhusahoṱhe u ri: ‘Ndi ḓo tenda vha nnḓu ya Isiraele vha tshi nkhumbela uri ndi vha itele zwenezwi: Ndi ḓo andisa vhathu vhavho vha nga sambi.
38 Miḓi ye ya vha i mashubi i ḓo ḓala vhathu vhunga masambi,+ u fana na sambi ḽa vhakhethwa, u fana na sambi ḽa Yerusalema* nga tshifhinga tsha vhuṱambo;+ vha ḓo ḓivha uri ndi nṋe Yehova.’”
Ṱhaluso dzi re magumoni a siaṱari
^ Thevhedz., “masalela.”
^ Ipfi ḽine ḽa amba zwenezwi ḽa Tshihevheru ḽi tshimbidzana na ipfi “vhutoko” nahone ḽi shumiswa sa mubulo wa u goḓa.
^ Kana “maanḓa.”
^ Ndi ine ya tevhedza nyeletshedzo dza Mudzimu.
^ Kana khamusi, “u fana na masambi a nngu dza zwiṱhavhelo ngei Yerusalema.”
