Levitiko 18:1-30
18 Yehova a bvela phanḓa a tshi amba na Mushe a ri:
2 “Vhudza Vhaisiraele u ri: ‘Ndi nṋe Yehova Mudzimu waṋu.+
3 Ni songo ḓifara nga nḓila ine vhathu vha ḓifara ngayo shangoni ḽa Egipita, he na vha ni tshi dzula hone,+ ni songo ita zwine vha zwi ita shangoni ḽa Kanana, hune nda khou ni isa hone. Ni songo tevhedza mikhuvha yavho.
4 Ni tevhedze mahaṱulele anga na maitele anga, ni tshile ngazwo.+ Ndi nṋe Yehova Mudzimu waṋu.
5 Ni tevhedze maitele anga na mahaṱulele anga; ane a ita nga u ralo u ḓo tshila.+ Ndi nṋe Yehova.
6 “‘Hu songo vha na muthu ane a ita zwa vhudzekani na muṅwe wa shaka ḽawe ḽa tsini.+ Ndi nṋe Yehova.
7 U songo ita zwa vhudzekani na khotsi au kana na mme au. Ndi mme au, u songo ita zwa vhudzekani nae.
8 “‘U songo ita zwa vhudzekani na mufumakadzi wa khotsi au.+ Zwi ḓo nyadzisa khotsi au.
9 “‘U songo ita zwa vhudzekani na khaladzi au, naho e ṅwananyana wa khotsi au kana ṅwananyana wa mme au, hu sa londwi uri o bebelwa muṱani muthihi na iwe kana ndi we a tou ḓiwa nae.+
10 “‘U songo ita zwa vhudzekani na ṅwananyana wa murwa wau kana e wa ṅwananyana wau, ngauri u ḓo ḓinyadzisa.
11 “‘U songo ita zwa vhudzekani na ṅwananyana wa mufumakadzi wa khotsi au, ndi ṅwananyana wa khotsi au, ngauri ndi khaladzi au.
12 “‘U songo ita zwa vhudzekani na makhadzi wau.+ Ndi shaka ḽa khotsi au ḽa malofhani.
13 “‘U songo ita zwa vhudzekani na mmane wau kana mme-muhulu wau, ngauri ndi shaka ḽa mme au ḽa malofhani.
14 “‘U songo nyadzisa khotsimunene wau kana khotsimuhulu wau nga u ita zwa vhudzekani na mufumakadzi wawe. Ndi shaka ḽau.+
15 “‘U songo ita zwa vhudzekani na mazwale wau.+ Ndi mufumakadzi wa ṅwana wau, a wo ngo tea u ita zwa vhudzekani nae.
16 “‘U songo ita zwa vhudzekani na mufumakadzi wa mukomana kana wa murathu wau,+ ngauri u ḓo nyadzisa mukomana wau kana murathu wau.
17 “‘U songo ita zwa vhudzekani na mufumakadzi na ṅwananyana wawe.+ U songo ita zwa vhudzekani na ṅwananyana wa murwa wawe kana wa ṅwananyana wawe. Ndi mashaka awe a tsini; ndi vhuḓifari vhu shonisaho.
18 “‘U songo vhinga murathu kana mukomana wa mufumakadzi wau wa mu ita muhadzinga wa mufumakadzi wau,+ wa ita zwa vhudzekani nae musi murathu kana mukomana wawe a tshi kha ḓi tshila.
19 “‘U songo ita zwa vhudzekani na mufumakadzi musi e maḓuvhani e na tshika.+
20 “‘U songo ita zwa vhudzekani na mufumakadzi wa muṅwe muthu,* u khou ḓishata tshika.+
21 “‘U songo tenda muṅwe wa vhana vhau a tshi ṋekedzwa* Molexo.+ U songo nyadzisa dzina ḽa Mudzimu wau nga yeneyo nḓila.+ Ndi nṋe Yehova.
22 “‘U songo lala na munna wa mu ita mufumakadzi.+ Ndi zwithu zwi nengisaho.
23 “‘Munna a songo ita zwa vhudzekani na tshipuka, a ḓishata tshika ngatsho. Na mufumakadzi a songo ita zwa vhudzekani na tshipuka.+ Ndi vhuṱudzi.
24 “‘Ni songo ḓishata tshika nga zwiṅwe zwa zwenezwi zwithu, ngauri tshaka dzine nda khou dzi pandela phanḓa haṋu dzo ḓitshikafhadza nga zwenezwi zwithu zwoṱhe.+
25 Nga zwenezwo, shango ḽeneḽo ḽi na tshika, ndi ḓo ḽi pfisa vhuṱungu nga nṱhani ha vhukhakhi haḽo, ḽeneḽo shango ḽi ḓo ṱanza vhadzulapo vhaḽo.+
26 Fhedzi inwi ni tea u tevhedza maitele anga na mahaṱulele anga,+ a no ngo tea u ita zwiṅwe zwa zwenezwo zwithu zwi nengisaho, hu sa londwi uri ndi mudzulapo kana ndi mutsinda ane a dzula na inwi.+
27 Ngauri zwenezwi zwithu zwoṱhe zwi nengisaho zwo vha zwi tshi itwa nga vhathu vha dzulaho kha ḽeneḽo shango inwi ni sa athu u swika,+ zwino shango ḽi na tshika.
28 Shango a ḽi nga ḓo ni ṱanza nge na ḽi tshikafhadza nga nḓila i fanaho na ye ḽa ṱanza ngayo tshaka dze dza vha dzi tshi dzula henefho.
29 Arali muthu a ita zwiṅwe zwa zwenezwo zwithu zwi nengisaho, vhoṱhe vhane vha zwi ita vha tea u vhulawa.
30 Ni tea u tevhedza zwe nda ni laya nga u sa tevhedza mikhuvha naho i ifhio i nengisaho ye ya vha i tshi itwa ni sa athu u swika,+ uri ni sa ḓitshikafhadze ngayo. Ndi nṋe Yehova Mudzimu waṋu.’”
Ṱhaluso dzi re magumoni a siaṱari
^ Kana “muhura wau; khonani yau.”
^ Kana “kumedzwa; itwa tshiṱhavhelo.”
