Levitiko 21:1-24
21 Yehova a amba na Mushe a ri: “Amba na vhotshifhe, vharwa vha Aroni u ri: ‘Hu songo vha na ane a ḓishata tshika nga u kwama tshitumbu kha lushaka lwa hawe.+
2 Fhedzi a nga kwama tsha shaka ḽawe ḽa tsini, tsha mme awe, tsha khotsi awe, tsha murwa wawe, tsha ṅwananyana wawe, tsha murathu wawe kana tsha mukomana wawe,
3 a nga ḓishata tshika nga u kwama tsha khaladzi awe ane a kha ḓi vha musidzana,* a songo vhingwaho ane a dzula nae.
4 A songo ḓishata tshika, a ḓinyadzisa nga nṱhani ha mufumakadzi a re na munna wa lushaka lwa hawe.
5 Vha songo vheula+ ṱhoho dzavho kana ndebvu dzavho kana vha ḓitshea mivhili.+
6 Vha vhe vhakhethwa kha Mudzimu wavho,+ vha songo nyadzisa dzina ḽa Mudzimu wavho,+ ngauri vha khou ṋekedza Yehova zwifhiwa zwo fhiswaho nga mulilo, vhurotho* ha Mudzimu wavho, vha tea u vha vhakhethwa.+
7 Vha songo vhinga muthu ane a rengisa muvhili,+ mufumakadzi o tshikafhadzwaho kana mufumakadzi o ṱalwaho nga munna,+ ngauri tshifhe ndi mukhethwa kha Mudzimu wawe.
8 U mu ite mukhethwa,+ ngauri ndi ene ane a khou ṋekedza vhurotho ha Mudzimu wau. A vhe mukhethwa kha iwe, ngauri nṋe Yehova ane a khou ni ita vhakhethwa, ndi mukhethwa.+
9 “‘Arali ṅwananyana wa tshifhe a ḓinyadzisa nga u rengisa muvhili, u vha a tshi khou nyadzisa khotsi awe. Nga a fhiswe muliloni.+
10 “‘Tshifhe muhulu ane a vha muhulwane kha vharathu na vhakomana vhawe vhane vha vha vhotshifhe, we a ḓodzwa mapfura kha ṱhoho+ na we a vhewa uri a ambare zwiambaro zwa vhotshifhe,+ a songo litsha u gama mavhudzi kana a kherukanya zwiambaro zwawe.+
11 A songo kwama tshitumbu+ naho tshi tshifhio; a songo ḓishata tshika nga tshitumbu naho tshi tsha khotsi awe kana tshi tsha mme awe.
12 A songo bva nḓuni khethwa, a songo nyadzisa nnḓu khethwa ya Mudzimu wawe,+ ngauri u na luswayo lwa u ḓiṋekedza, o ḓodzwa mapfura a Mudzimu wawe.+ Ndi nṋe Yehova.
13 “‘A vhinge mufumakadzi a sa athu u itaho zwa vhudzekani.+
14 Ho ngo tea u vhinga tshilikadzi, mufumakadzi o ṱalwaho kana ane a rengisa muvhili; fhedzi u tea u vhinga mufumakadzi a sa athu u itaho zwa vhudzekani wa lushaka lwa hawe.
15 A songo nyadzisa vhana* vhawe kha lushaka lwa hawe,+ ngauri ndi nṋe Yehova ane a khou mu ita mukhethwa.’”
16 Yehova a bvela phanḓa a tshi amba na Mushe a ri:
17 “Vhudza Aroni u ri: ‘Hu songo vha na muṅwe wa vhana* vhau kha mirafho yau yoṱhe o holefhalaho ane a nga ṋekedza vhurotho ha Mudzimu wawe.
18 Arali hu na muthu o holefhalaho, a songo sendela: muthu a sa vhoni kana a ṱudzaho kana o holefhalaho tshifhaṱuwo kana e na muṅwe muraḓo wo lapfesaho,
19 kana muthu o vunḓeaho mulenzhe kana o vunḓeaho tshanḓa,
20 kana a re na thunda kana o pfufhifhalesaho* kana a lwalaho maṱo kana a re na vhulwadze ha lukanda kana o fhahulwaho.*+
21 Ṅwana* wa tshifhe Aroni o holefhalaho a songo sendela u itela u ṋekedza Yehova zwifhiwa zwi fhiswaho nga mulilo. Ngauri o holefhala, a songo sendela uri a ṋekedze vhurotho ha Mudzimu wawe.
22 A nga ḽa vhurotho ha Mudzimu wawe vhu bvaho kha zwithu zwikhethwa-khethwa+ na kha zwithu zwikhethwa.+
23 Naho zwo ralo, a songo sendela tsini na khetheni,+ a songo ḓa kha aḽeṱare,+ ngauri o holefhala; a songo nyadzisa nnḓu khethwa yanga,+ ngauri ndi nṋe Yehova ane a khou vha ita vhakhethwa.’”+
24 Mushe a vhudza Aroni na vharwa vhawe na Vhaisiraele vhoṱhe.
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Kana “zwiḽiwa,” zwine zwa ambela kha zwiṱhavhelo.
^ Thevhedz., “mbeu.”
^ Thevhedz., “mbeu.”
^ Kana khamusi, “o ondaho.”
^ Kana “o theniwaho.”
^ Thevhedz., “Mbeu.”
