Levitiko 22:1-33
22 Yehova a dovha a amba na Mushe a ri:
2 “Vhudza Aroni na vharwa vhawe uri vha ṱhogomele nḓila ine vha fara ngayo zwithu zwikhethwa zwa Vhaisiraele na uri vha si nyadzise dzina ḽanga ḽikhethwa+ na zwithu zwe vha zwi ita zwikhethwa kha nṋe.+ Ndi nṋe Yehova.
3 U vha vhudze u ri: ‘Muṅwe wa vhana vhaṋu kha mirafho yaṋu yoṱhe ane a sendela tsini na zwithu zwikhethwa musi e na tshika, zwe Vhaisiraele vha zwi ita zwikhethwa kha Yehova, onoyo muthu u ḓo vhulawa a bviswa phanḓa hanga.+ Ndi nṋe Yehova.
4 Hu songo vha na muthu kha vhana vha Aroni ane a vha na mapele+ kana ane a khou rothisa luḓi+ ane a ḽa zwithu zwikhethwa u vhuya u swika a tshi kuna,+ na ane a kwama muthu o tshikafhadzwaho nga tshitumbu+ kana munna ane a rothisa mbeu,+
5 kana muthu ane a kwama tshivhumbiwa tshi tshatshamaho tshi re na tshika+ kana ane a kwama munna ane a vha na tshika nga tshiitisi naho tshi tshifhio, na ane a nga mu tshikafhadza.+
6 Muthu ane a kwama naho tshi tshini tsha zwenezwi u ḓo vha na tshika u swika ḽi tshi kovhela, a songo ḽa zwithu naho zwi zwifhio zwikhethwa, fhedzi a ṱambe nga maḓi.+
7 Musi ḽo no kovhela, u ḓo vha o kuna, a nga ḽa zwiṅwe zwa zwithu zwikhethwa, ngauri ndi zwiḽiwa zwawe.+
8 Zwiṅwe hafhu, a songo ḽa tshipuka tsho wanalaho tsho fa kana tsho ṱhukhukanywa nga zwipuka, a tshikafhadzwa ngatsho.+ Ndi nṋe Yehova.
9 “‘Vha tevhedze zwe nda vha laya, uri tshi si vha ite uri vha vhe na tshivhi, vha fa nga nṱhani hatsho ngauri vho vha vha tshi khou tshi tshikafhadza. Ndi nṋe Yehova ane a khou vha ita vhakhethwa.
10 “‘Hu songo vha na muthu ane a si fanelee* ane a ḽa tshithu naho tshi tshifhio tshine tsha vha tshikhethwa.+ Hu songo vha na mutsinda ane a vha mueni wa tshifhe kana mushumi o tholwaho ane a ḽa tshithu naho tshi tshifhio tshine tsha vha tshikhethwa.
11 Arali tshifhe a renga muṅwe muthu nga tshelede yawe, onoyo muthu a nga zwi ḽa. Vhalanda vho bebelwaho muṱani wawe vha nga ḽa zwiḽiwa zwawe.+
12 Arali ṅwananyana wa tshifhe a vhingwa nga muthu ane a si vhe tshifhe,* a songo ḽa mukovhe wa zwithu zwikhethwa.
13 Fhedzi arali ṅwananyana wa tshifhe a vha tshilikadzi kana a ṱalwa a si na vhana, a humela muṱani wa khotsi awe u fana na musi a tshee muswa, a nga ḽa zwiṅwe zwa zwiḽiwa zwa khotsi awe;+ fhedzi muthu ane a si fanelee* ho ngo fanela u zwi ḽa.
14 “‘Arali muthu a ḽa tshithu tshikhethwa a sa zwi ḓivhi, u ḓo engedza tshipiḓa tshithihi kha zwiṱanu tsha mutengo watsho, a ṋea tshifhe tshithu tshikhethwa.+
15 Vha songo tshikafhadza zwithu zwikhethwa zwa Vhaisiraele, zwe vha zwi ṋeela Yehova,+
16 vha pfiswa vhuṱungu nga nṱhani ha mulandu wavho nge vha ḽa zwithu zwavho zwikhethwa; ngauri ndi nṋe Yehova ane a khou vha ita vhakhethwa.’”
17 Yehova a bvela phanḓa a tshi amba na Mushe a ri:
18 “Amba na Aroni na vharwa vhawe na Vhaisiraele vhoṱhe u ri: ‘Musi Muisiraele kana mutsinda wa Isiraele a tshi ṋekedza Yehova tshifhiwa tsha u fhiswa+ uri a ite zwe a ana kana u ṋekedza tshifhiwa tsha u ḓifunela,+
19 a ṋekedze mboho i sa lwaliho,+ ngwana dza nduna kana mbudzi, u itela u takalelwa.
20 Ni songo ṋekedza tshithu naho tshi tshifhio tsho holefhalaho,+ ngauri a tshi nga iti uri ni takalelwe.
21 “‘Arali muthu a ṋekedza Yehova tshiṱhavhelo tsha u pfumedzana+ uri a ite zwe a ana kana sa tshifhiwa tsha u ḓifunela, tshi vhe kholomo i sa lwaliho kana nngu i sa lwaliho uri a takalelwe. A tsho ngo fanela u vha tsho holefhalaho.
22 Zwi sa vhoni, zwo vunḓeaho, zwo huvhalaho, zwi re na gwembe, zwi re na vhulwadze ha lukanda kana zwi re na vhadzi; ni songo ṋekedza Yehova zwenezwo zwithu kana na zwi ṋekedza Yehova kha aḽeṱare.
23 Ni nga ṋekedza mboho kana nngu i re na muraḓo wo lapfesaho kana wo pfufhifhalesaho sa tshifhiwa tsha u ḓifunela, fhedzi tshi nga si takalelwe sa tshifhiwa tsha muano.
24 Fhedzi ni songo ṋekedza Yehova tsho fhahulwaho,* ni songo ṋekedza zwifuwo zwo raloho shangoni ḽaṋu.
25 Ni songo ṋekedza zwenezwo zwifuwo zwoṱhe zwi bvaho kha mutsinda sa vhurotho ha Mudzimu waṋu, ngauri zwo holefhala. A zwi nga takalelwi.’”
26 Yehova a dovha a amba na Mushe a ri:
27 “Musi mboho kana thutha kana tshibudzana tshi tshi dzwalwa, tshi ḓo dzula na mme atsho maḓuvha a sumbe,+ fhedzi u bva nga ḓuvha ḽa vhumalo u ya phanḓa tshi ḓo ṱanganedzwa sa tshifhiwa tshi fhiselwaho Yehova nga mulilo.
28 Ni songo ṱhavha mboho na ṋamana yayo kana nngu na ngwana yayo nga ḓuvha ḽithihi.+
29 “Musi ni tshi ṋekedza Yehova tshiṱhavhelo tsha u livhuwa,+ ni tshi ṋekedze uri ni takalelwe.
30 Tshi ḽiwe nga ḽeneḽo ḓuvha. Ni songo tshi siela matshelo.+ Ndi nṋe Yehova.
31 “Ni vhulunge ndaela dzanga ni dzi tevhele.+ Ndi nṋe Yehova.
32 Ni songo tshikafhadza dzina ḽanga ḽikhethwa,+ ndi tea u itwa mukhethwa kha Vhaisiraele.+ Ndi nṋe Yehova ane a khou ni ita vhakhethwa,+
33 we a ni bvisa shangoni ḽa Egipita u itela u ḓisumbedza uri ndi Mudzimu waṋu.+ Ndi nṋe Yehova.”
Ṱhaluso dzi re magumoni a siaṱari
^ Thevhedz., “mutsinda,” zwine zwa amba muthu ane a si vhe wa muṱa wa Aroni.
^ Kana “vhingwa nga mutsinda.”
^ Thevhedz., “mutsinda,” zwine zwa amba muthu ane a si vhe wa muṱa wa Aroni.
^ Kana “tsho theniwaho.”
