Levitiko 24:1-23
24 Yehova a bvela phanḓa a tshi amba na Mushe a ri:
2 “Laya Vhaisiraele uri vha ḓise mapfura o kunaho a muṱwari a mbone, uri dzi dzule dzi tshi duga.+
3 Vhusiku vhuṅwe na vhuṅwe, Aroni u ḓo funga dzenedzo mbone dza duga phanḓa ha Yehova u swika ḽi tshi tsha. Dzi phanḓa ha khetheni ḽi re tsini na mbulungelo ya mulanga nga ngomu denndeni ḽa muṱangano. Ndi mulayo wa lini na lini kha mirafho yaṋu yoṱhe.
4 A ṱome mbone tshifhinga tshoṱhe kha tshiṱomambone+ tsha musuku vhukuma tshi re phanḓa ha Yehova.
5 “U dzhie fuḽauru tsekene, u bake ḽofo* dza 12. Ḽofo nthihi i bakwe nga zwipiḓa zwivhili kha zwa fumi zwa tshikalo tsha efa.*
6 U zwi vhee zwi ite zwiṱhopho zwivhili, tshiṱhopho tshithihi tshi vhe na zwa rathi,+ nṱha ha ṱafula ḽa musuku vhukuma phanḓa ha Yehova.+
7 U vhee zwioro zwavhuḓi zwitshena nṱha ha tshiṱhopho tshiṅwe na tshiṅwe, zwi ḓo vha vhurotho ha tshifhiwa+ tsha tshihumbudzi tshi fhiselwaho Yehova.
8 A zwi vhee phanḓa ha Yehova Savhatha iṅwe na iṅwe.+ Ndi mulanga wa lini na lini na Vhaisiraele.
9 Zwi ḓo vha zwa Aroni na vharwa vhawe,+ vha ḓo zwi ḽa vhe fhethu hukhethwa,+ ngauri ndi zwithu zwikhethwa-khethwa khae zwi bvaho kha zwifhiwa zwa Yehova zwo fhiswaho nga mulilo sa mulayo wa lini na lini.”
10 Kha Vhaisiraele ho vha hu na muṅwe murwa wa mufumakadzi wa Muisiraele, khotsi awe o vha e Muegipita,+ a lwa na muṅwe munna wa Muisiraele henefho madenndeni.
11 Murwa wa onoyo mufumakadzi wa Muisiraele a thoma u sema Dzina* ḽa Mudzimu.+ Ngauralo, vha mu ḓisa ha Mushe.+ Mme awe o vha a tshi pfi Selomithi, ṅwananyana wa Dibri wa lushaka lwa Dani.
12 Vha mu valela u swika Yehova a tshi vha vhudza zwine vha fanela u mu ita.+
13 Ngauralo, Yehova a amba na Mushe a ri:
14 “Bviselani onoyo muthu nnḓa ha madennde, vhoṱhe vhe vha mu pfa vha tea u vhea zwanḓa zwavho kha ṱhoho yawe, tshitshavha tshoṱhe tshi mu kanḓe nga matombo.+
15 U vhudze Vhaisiraele u ri: ‘Arali muthu naho e ufhio a sema Mudzimu wawe, u ḓo ḓifhindulela kha tshivhi tshawe.
16 Ngauralo, we a sema dzina ḽa Yehova a vhulawe.+ Tshitshavha tshoṱhe tshi mu kanḓe nga matombo. Mutsinda na mudzulapo vhane vha sema dzina ḽa Mudzimu vha vhulawe.
17 “‘Arali muthu a vhulaya muṅwe a vhulawe.+
18 Muthu ane a vhulaya tshifuwo tsha muṅwe muthu a tshi lifhe, vhutshilo nga vhutshilo.
19 Arali muthu a huvhadza muṅwe muthu, zwe a ita zwi ḓo itwa na khae.+
20 Rambo ḽi ḓo lifhiwa nga rambo, ḽiṱo nga ḽiṱo, ḽiṋo nga ḽiṋo, nḓila ye a huvhadza ngayo muṅwe na ene u ḓo huvhadzwa nga yeneyo nḓila.+
21 Muthu ane a vhulaya tshifuwo a tshi lifhe,+ fhedzi muthu ane a vhulaya muṅwe a vhulawe.+
22 “‘Mulayo wonoyu muthihi u shuma kha inwi hu sa londwi uri ni mutsinda+ kana ni mudzulapo, ngauri ndi nṋe Yehova Mudzimu waṋu.’”
23 Nga murahu ha zwenezwo, Mushe a amba na Vhaisiraele, vha bvisela nnḓa ha madennde muthu we a semana, vha mu kanḓa nga matombo.+ Vhaisiraele vha ita zwe Yehova a laya Mushe.
Ṱhaluso dzi re magumoni a siaṱari
^ Dzenedzi ḽofo dzo vha dzi na buli vhukati.
^ Zwipiḓa zwivhili kha zwa fumi zwa efa zwi lingana na ḽithara dza 4,4. Sedzani Ṱhume. B14.
^ Ndi dzina Yehova, samusi zwo sumbedzwa kha ndimana 15 na 16.
