Levitiko 8:1-36
-
U vhewa ha vha nnḓu ya Aroni uri vha vhe vhotshifhe (1-36)
8 Yehova a bvela phanḓa a tshi amba na Mushe a ri:
2 “Vhidza Aroni na vharwa vhawe,+ u dzhie na zwiambaro,+ mapfura a u ḓodza,+ mboho ya tshifhiwa tsha u pfumelela tshivhi, thutha mbili, manngi u re na vhurotho vhu si na mbiliso,+
3 u kuvhanganye tshitshavha tshoṱhe muṋangoni wa dennde ḽa muṱangano.”
4 Mushe a ita zwe Yehova a mu laya, tshitshavha tsha kuvhangana muṋangoni wa dennde ḽa muṱangano.
5 Mushe a amba na tshitshavha a ri: “Zwenezwi ndi zwe Yehova a laya uri ri zwi ite.”
6 Mushe a ḓisa Aroni na vharwa vhawe a vha ṱanzwa nga maḓi.+
7 Nga murahu ha zwenezwo, a ambadza Aroni tshiambaro,+ a mu vhofha nga bannda,+ a mu ambadza tshiambaro tshi si na zwanḓa,+ a mu ambadza efodo,*+ a i vhofha nga bannda* ḽo lukwaho+ ḽa efodo, a mu vhofha ngaḽo a khwaṱhisa.
8 A dovha a mu ambadza tsha u vhea khanani,+ a dzhenisa Urimi na Thumimi+ kha tsha u vhea khanani.
9 A mu vhofhelela dugu+ kha ṱhoho, a dovha a mu vhofhelela kuzennge kwa musuku ku penyaho kha dugu kha phanḓa yawe, kune kwa vha luswayo lukhethwa lwa u ḓiṋekedza,*+ sa zwe Yehova a laya Mushe.
10 Mushe a dzhia mapfura a u ḓodza, a ḓodza dennde ḽikhethwa* na zwoṱhe zwi re khaḽo,+ a ita uri zwi vhe zwikhethwa.
11 Nga murahu ha zwenezwo, a hasha maṅwe a eneo mapfura kha aḽeṱare lwa sumbe, a ḓodza aḽeṱare, thundu dzayo dzoṱhe, sambelo na milenzhe yaḽo u itela u zwi ita zwikhethwa.
12 Mafheleloni a shululela maṅwe a mapfura a u ḓodza kha ṱhoho ya Aroni, a mu ḓodza uri a vhe mukhethwa.+
13 Mushe a amba na vharwa vha Aroni uri vha sendele tsini a vha ambadze zwiambaro na u vha vhofha nga mabannda na u vha ambadza miṅadzi,+ sa zwe Yehova a laya Mushe.
14 A ḓisa mboho ya tshifhiwa tsha u pfumelela tshivhi, Aroni na vharwa vhawe vha vhea zwanḓa zwavho kha ṱhoho ya mboho ya tshifhiwa tsha u pfumelela tshivhi.+
15 Nga zwenezwo, Mushe a i ṱhavha a dzhia malofha+ nga munwe wawe a a rothisela kha ṋanga dza aḽeṱare thungo dzoṱhe, a kunakisa aḽeṱare,* fhedzi maṅwe malofha a a shululela fhasi phanḓa ha aḽeṱare, u itela u i khetha uri a ite tshipfumelelo khayo.
16 Nga murahu ha zwenezwo, a dzhia mapfura oṱhe a re kha mala, mapfura a re kha tshivhindi, tswio mbili na mapfura a re khadzo, Mushe a zwi dubisa kha aḽeṱare.+
17 A ita uri mboho, mukumba wayo, ṋama yayo na muswane wayo, zwi fhiswe nga mulilo nnḓa ha madennde,+ sa zwe Yehova a laya Mushe.
18 A ḓisa thutha ya tshifhiwa tsha u fhiswa, Aroni na vharwa vhawe vha vhea zwanḓa zwavho kha ṱhoho ya thutha.+
19 Nga murahu ha zwenezwo, Mushe a i ṱhavha a shasha malofha thungo dzoṱhe dza aḽeṱare.
20 A tumukanya thutha ya vha zwipiḓa, Mushe a fhisa ṱhoho yayo, zwenezwo zwipiḓa na mapfura.*
21 A ṱanzwa mala na khwanḓa nga maḓi, Mushe a dubisa thutha yoṱhe kha aḽeṱare. Tsho vha tshi tshifhiwa tsha u fhiswa tshine tsha nukhelela. Tsho vha tshi tshifhiwa tshi fhiselwaho Yehova, sa zwe Yehova a laya Mushe.
22 A ḓisa thutha ya vhuvhili, thutha ya u vhewa+ ha muthu uri a vhe tshifhe, Aroni na vharwa vhawe vha vhea zwanḓa zwavho kha ṱhoho ya thutha.+
23 Nga murahu ha zwenezwo, Mushe a i ṱhavha a dzhia maṅwe a malofha ayo a a ḓodza kha nḓevhe ya tsha u ḽa ya Aroni na kha gunwe ḽa tshanḓa tsha u ḽa na kha gunwe ḽa mulenzhe wawe wa tsha u ḽa.
24 Mushe a vhidza vharwa vha Aroni a vha ḓodza maṅwe a malofha kha nḓevhe dzavho dza tsha u ḽa na kha magunwe avho a tsha u ḽa na kha magunwe a milenzhe yavho ya tsha u ḽa; fhedzi Mushe a shasha maṅwe malofha oṱhe thungo dzoṱhe dza aḽeṱare.+
25 A dzhia mapfura na mutshila wo nonaho na mapfura oṱhe e a vha e kha mala, mapfura a re kha tshivhindi, tswio mbili na mapfura adzo na mulenzhe wa tsha u ḽa.+
26 A bvisa ḽofo* nthihi+ i si na mbiliso, ḽofo* nthihi ya vhurotho i re na mapfura+ na kokisi ḽithihi kha manngi u re na vhurotho vhu si na mbiliso we wa vha u phanḓa ha Yehova. A zwi vhea nṱha ha zwipiḓa zwa mapfura na mulenzhe wa tsha u ḽa.
27 A vhea zwoṱhe zwanḓani zwa Aroni na zwanḓani zwa vharwa vhawe, a thoma u zwi dzungudzela phanḓa na murahu sa tshifhiwa tsha u dzungudzwa phanḓa ha Yehova.
28 Mushe a zwi dzhia zwanḓani zwavho a zwi dubisa kha aḽeṱare nṱha ha tshifhiwa tsha u fhiswa. Zwo vha zwi tshiṱhavhelo tsha u vhewa ha muthu uri a vhe tshifhe uri zwi nukhelele. Tsho vha tshi tshifhiwa tshi fhiselwaho Yehova.
29 Mushe a dzhia tshiakha a tshi dzungudzela phanḓa na murahu sa tshifhiwa tsha u dzungudzwa phanḓa ha Yehova.+ Mukovhe wa Mushe wo bva kha thutha ya u vhewa ha muthu uri a vhe tshifhe, sa zwe Yehova a laya Mushe.+
30 Nga murahu ha zwenezwo, Mushe a dzhia maṅwe mapfura a u ḓodza+ na maṅwe malofha e a vha e kha aḽeṱare a hasha Aroni na zwiambaro zwawe na vharwa vhawe na zwiambaro zwavho. A ita uri Aroni na zwiambaro zwawe na vharwa+ vhawe na zwiambaro+ zwavho zwi vhe zwikhethwa.
31 Mushe a amba na Aroni na vharwa vhawe a ri: “Vholomisani+ ṋama muṋangoni wa dennde ḽa muṱangano, ni i ḽe henefho na vhurotho vhune ha vha kha manngi wa u vhewa ha muthu uri a vhe tshifhe, samusi ndo laedzwa uri: ‘Aroni na vharwa vhawe vha ḓo i ḽa.’+
32 Ṋama yo salaho na vhurotho ni fanela u zwi fhisa nga mulilo.+
33 A no ngo tea u bva nga muṋango wa dennde ḽa muṱangano lwa maḓuvha a sumbe, u swika maḓuvha a u vhewa uri ni vhe tshifhe a tshi fhela, ngauri zwi ḓo dzhia maḓuvha a sumbe uri ni vhewe sa vhotshifhe.*+
34 Yehova o laya uri ri ite zwe ra zwi ita ṋamusi uri ri ni pfumelele.+
35 Ni ḓo dzula muṋangoni wa dennde ḽa muṱangano maḓuvha+ a sumbe na vhusiku hao, ni dzule no fhaṱuwa u ya nga he Yehova a laya ngaho,+ uri ni si fe; ngauri ndo laedzwa zwenezwo.”
36 Aroni na vharwa vhawe vha ita zwoṱhe zwe Yehova a vha laya a tshi shumisa Mushe.
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Kana “bannda ḽa khunduni.”
^ Kana “khare ṱhukhu khethwa i re na matombo a ndeme.”
^ “Ndi dennde ḽa vhurabeli ḽine ḽa hwalea ḽe ḽa vha ḽi tshi shumiswa nga Vhaisiraele; nga zwiṅwe zwifhinga ḽo vha ḽi tshi vhidzwa ‘dennde ḽa muṱangano.’”
^ Thevhedz., “a kunakisa aḽeṱare kha tshivhi.”
^ Kana “mapfura a re kha tswio.”
^ Yeneyi ḽofo yo vha i na buli vhukati.
^ Yeneyi ḽofo yo vha i na buli vhukati.
^ Thevhedz., “ni ḓadze zwanḓa zwaṋu.”
