Levitiko 9:1-24
-
Aroni u ṋekedza zwifhiwa (1-24)
9 Nga ḓuvha ḽa vhumalo+ Mushe a vhidza Aroni na vharwa vhawe na vhahulwane vha Isiraele.
2 A amba na Aroni a ri: “Dzhia ṋamana ya tshifhiwa tsha u pfumelela tshivhi+ na thutha ya tshifhiwa tsha u fhiswa, zwi sa lwali u zwi ṋekedze phanḓa ha Yehova.
3 Fhedzi u ambe na Vhaisiraele u ri: ‘Dzhiani tshibokoṱo tsha tshifhiwa tsha u pfumelela tshivhi, ṋamana na thutha, zwoṱhe zwi vhe zwi na ṅwaha muthihi, zwi sa lwali uri zwi vhe tshifhiwa tsha u fhiswa,
4 na mboho na thutha zwa zwiṱhavhelo zwa u pfumedzana+ uri zwi vhe zwiṱhavhelo phanḓa ha Yehova na tshifhiwa tsha thoro+ tsho ṱanganyiswaho na mapfura, ngauri ṋamusi Yehova u ḓo ḓivhonadza kha inwi.’”+
5 Vha ḓisa zwe Mushe a vha laya phanḓa ha dennde ḽa muṱangano. Nga zwenezwo, tshitshavha tshoṱhe tsha sendela tsha ima phanḓa ha Yehova.
6 Mushe a ri: “Hezwi ndi zwe Yehova a laya uri zwi itwe, uri Yehova a ni sumbedze vhugala.”+
7 Mushe a amba na Aroni a ri: “Sendela tsini na aḽeṱare, u ṋekedze tshifhiwa tshau tsha u pfumelela tshivhi+ na tshifhiwa tsha u fhiswa, u ḓipfumelele+ na u pfumelela vha nnḓu yau; u ṋekedze tshifhiwa tsha vhathu+ uri u vha pfumelele,+ sa zwe Yehova a laya.”
8 Nga u ṱavhanya Aroni a ya aḽeṱareni, a ṱhavha ṋamana ya tshifhiwa tsha u pfumelela tshivhi tshawe.+
9 Vharwa vha Aroni vha mu ḓisela malofha,+ a dzhenisa munwe wawe kha eneo malofha a a ḓodza kha ṋanga dza aḽeṱare, o salaho a a shululele fhasi phanḓa ha aḽeṱare.+
10 A fhisa mapfura, tswio na mapfura a re kha tshivhindi a bvaho kha tshifhiwa tsha u pfumelela tshivhi kha aḽeṱare, sa zwe Yehova a laya Mushe.+
11 A fhisa ṋama na mukumba nga mulilo nnḓa ha madennde.+
12 A ṱhavha tshifhiwa tsha u fhiswa, vharwa vha Aroni vha mu ṋekedza malofha a a shasha thungo dzoṱhe kha aḽeṱare.+
13 Vha mu ṋekedza zwipiḓa zwa tshifhiwa tsha u fhiswa khathihi na ṱhoho, a zwi dubisa kha aḽeṱare.
14 A ṱanzwa mala na khwanḓa, a zwi dubisa kha tshifhiwa tsha u fhiswa kha aḽeṱare.
15 A ṋekedza tshifhiwa tsha vhathu, a dzhia mbudzi ya tshifhiwa tsha u pfumelela tshivhi tshe tsha vha tshi tsha vhathu, a i ṱhavha a ṋekedza tshifhiwa tsha u pfumelela tshivhi tshine tsha fana na tsha u thoma.
16 A ṋekedza tshifhiwa tsha u fhiswa a tshi tevhedza maitele a nga misi.+
17 A dovha a ṋekedza tshifhiwa tsha thoro,+ a dzhia tshiṅwe tshatsho nga tshanḓa tsho ḓala a tshi dubisa kha aḽeṱare, u itela u engedza kha tshifhiwa tsha u fhiswa tsha nga matsheloni.+
18 Nga murahu ha zwenezwo, a ṱhavha mboho na thutha ya tshiṱhavhelo tsha u pfumedzana tsha vhathu. Vharwa vha Aroni vha mu ḓisela malofha, a a shasha thungo dzoṱhe dza aḽeṱare.+
19 Vha dzhia zwipiḓa zwa mapfura a mboho,+ mutshila wo nonaho wa thutha, mapfura o putelaho miraḓo ya nga ngomu, tswio na mapfura a re kha tshivhindi,+
20 vha vhea zwenezwo zwipiḓa zwoṱhe zwa mapfura kha zwiakha, nga murahu vha dubisa zwenezwo zwipiḓa zwa mapfura kha aḽeṱare.+
21 Fhedzi Aroni a dzhia zwiakha na mulenzhe wa tsha u ḽa a zwi dzungudzela phanḓa na murahu sa tshifhiwa tsha u dzungudzwa phanḓa ha Yehova, sa zwe Mushe a laya.+
22 Musi Aroni o fhedza u ṋekedza tshifhiwa tsha u pfumelela tshivhi, tshifhiwa tsha u fhiswa na zwiṱhavhelo zwa u pfumedzana, a imisa zwanḓa zwawe o livhana na vhathu, a vha fhaṱutshedza+ a kona u tsela fhasi.
23 Mafheleloni Mushe na Aroni vha dzhena denndeni ḽa muṱangano, vha bva vha fhaṱutshedza vhathu.+
Vhathu vhoṱhe vha vhona vhugala ha Yehova,+
24 ha vha na mulilo u bvaho ha Yehova,+ wa thoma u fhisa tshifhiwa tsha u fhiswa na zwipiḓa zwa mapfura zwi re kha aḽeṱare. Musi vhathu vhoṱhe vha tshi zwi vhona, vha fhululedza vha losha vho kwatamisa zwifhaṱuwo.+
