Evangeli Ya Marko 4:1-41
4 Yesu a dovha a funza e tsini na lwanzhe, gogo ḽa mu kuvhanganela. A ṋamela tshikepe tshe tsha vha tshi maḓini, a dzula khatsho, gogo ḽone ḽa ima tsini na lwanzhe.+
2 A vha funza zwithu zwinzhi nga zwifanyiso+ a ri:+
3 “Ipfani hezwi! Muzwali o bva a ya a zwala mbeu.+
4 Musi a tshi khou zwala, iṅwe mbeu ya wela thungo ha nḓila, zwiṋoni zwa ḓa zwa i ḽa.
5 Iṅwe ya wela matomboni, ya mela nga u ṱavhanya ngauri mavu o vha e si manzhi.+
6 Musi ḓuvha ḽi tshi ṱavha, ya puta, ya oma ngauri midzi yo vha i songo tsesa.
7 Iṅwe ya wela mipfani, mipfa ya hula ya ita uri i si tsha hula zwavhuḓi na u aṋwa mitshelo.+
8 Iṅwe ya wela mavuni avhuḓi, ya mela ya aluwa, ya aṋwa mitshelo, iṅwe ya aṋwa 30, iṅwe 60, iṅwe 100.”+
9 A dovha a ri: “A re na nḓevhe nga a pfe.”+
10 Musi vhe nga tshavho, vhaapostola vha 12 na vhaṅwe vhe vha sala vha mu vhudzisa nga ha zwine zwenezwo zwifanyiso zwa amba zwone.+
11 A vha fhindula a ri: “Inwi no dzumbululelwa uri ni pfesese tshiphiri tshikhethwa+ tsha Muvhuso wa Mudzimu, fhedzi vhaṅwe ndi vha vhudza zwithu zwoṱhe nga zwifanyiso,+
12 uri naho vha tshi lavhelesa vha si vhone, naho vha tshi pfa vha si pfesese, vha si zwi ṱalukanye; uri vha si vhuye vha rembuluwa vha hangwelwa.”+
13 A ri: “Arali ni sa pfesesi itshi tshifanyiso, zwiṅwe zwifanyiso ni ḓo zwi pfesesa hani?
14 “Muzwali u zwala mulaedza wa Muvhuso.+
15 Mbeu yo welaho thungo ha nḓila i fanyisela vhane musi vha tshi tou pfa mulaedza wa muvhuso, Saṱhane a ḓa+ a dzhia mulaedza we wa zwalwa khavho.+
16 Yo zwaliwaho matomboni i fanyisela vhane vha ri u pfa mulaedza, vha u ṱanganedza nga dakalo.+
17 Ngauri midzi a yo ngo tsesa, a vha bveli phanḓa lwa tshifhinga tshilapfu; musi vha tshi ṱangana na maṱungu kana vha tshi tovholwa nga nṱhani ha mulaedza wa Muvhuso, vha a khukhulisea.
18 Yo zwaliwaho mipfani i fanyisela vhathu vhane vha ri u pfa mulaedza wa Muvhuso,+
19 fhedzi mbilaelo dza shango*+ na vhufhura ha lupfumo+ na u tama+ zwithu zwoṱhe zwa kwanyeledza mulaedza, vha si aṋwe tshithu.
20 Yo zwaliwaho mavuni avhuḓi i fanyisela vhathu vhane vha ri u pfa mulaedza wa Muvhuso vha u ṱanganedza vha aṋwa mitshelo. Vhaṅwe vha aṋwa 30, vhaṅwe 60, vhaṅwe 100.”+
21 A dovha a amba navho a ri: “A hu na ane a nga tiba luvhone nga manngi kana u lu dzumba fhasi ha mmbete. Luvhone lu vhewa khagala.+
22 Ngauri zwoṱhe zwo dzumbiwaho zwi ḓo dzumbululwa; zwiphiri zwoṱhe zwi ḓo bvela khagala.+
23 A re na nḓevhe nga a pfe.”+
24 A dovha a vha vhudza a ri: “Thetshelesani zwavhuḓi!+ Muelo une na kala ngawo na inwi ni ḓo kalelwa ngawo, wa fhira we inwi na kala ngawo.
25 Ngauri ane a vha nazwo, u ḓo ṋewa zwo engedzeaho,+ fhedzi ane a si vhe nazwo, u ḓo dzhielwa na zwine a vha nazwo.”+
26 A dovha a ri: “Muvhuso wa Mudzimu u nga fanyiswa na muthu o zwalaho mbeu tsimuni yawe.
27 Vhusiku u a eḓela, nga matsheloni a vuwa, mbeu yone i tshi khou mela na u aluwa, ene a sa ḓivhi zwine zwa ita uri i mele.
28 Ngauri mavu a ita uri mbeu i mele nga zwiṱuku nga zwiṱuku, hu thoma u bvelela tsinde, goroi ya kona u rumbuwa, ya fheleledza yo vhibva.
29 A kona u kaṋa yeneyo goroi, ngauri tshifhinga tsha khaṋo tsho swika.”
30 A dovha a ri: “Muvhuso wa Mudzimu u fana na mini kana ri nga u ṱalutshedza hani?
31 U fana na thoro ya luṋonya ine ya vha mbeu ṱhukhusa kha ḽifhasi.+
32 Musi yo no zwalwa, i hula ya fhira zwimela zwoṱhe, ya vha na matavhi mahulu, zwiṋoni zwa kona u dzula murunzini wawo.”
33 O vha funza mulaedza wa Muvhuso nga zwifanyiso+ zwinzhi zwo raloho, uri vha kone u pfesesa.
34 O vha a tshi amba navho nga zwifanyiso fhedzi, vhafunziwa vhawe a tshi vha ṱalutshedza zwithu zwoṱhe musi hu si na vhaṅwe vhathu.+
35 Nga ḽeneḽo ḓuvha, musi ḽo no kovhela, Yesu a amba navho a ri: “Kha ri wele seli ha lwanzhe.”+
36 Musi vhathu vho no ṱuwa, vha mu ṋamedza tshikepe, tsha ṱuwa na zwiṅwe zwikepe zwe zwa vha zwi henefho.+
37 Ha vuwa ḓumbu ḽihulu lwanzheni, magabelo a kuḓa tshikepe, lwe tsha ṱoḓou ṋupela.+
38 Fhedzi Yesu o vha o eḓela nga murahu o siamela musiamelo.* Vha mu vusa vha ri: “Mufunzi, naa a u vhoni uri ri khou fa?”
39 A vuwa a kaidza ḓumbu, a amba na lwanzhe a ri: “Fhumula u ri tshete!”+ Ḓumbu ḽa fhumula, ha dzika.
40 A amba navho a ri: “Ni khou ofha mini? Naa a ni athu u vha na lutendo?”
41 Vha tshuwa, vha amba nga tshavho vha ri: “Ndi muthu-ḓe onoyu? Ḓumbu na lwanzhe zwi a mu thetshelesa.”+
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Kana “tshisiamelo.”
