Evangeli Ya Mateo 17:1-27
17 Nga murahu ha maḓuvha a rathi, Yesu a ṱuwa na Petro, Yakobo na murathu wawe Yohane, a gonya navho thavha ndapfu.+
2 A shanduka vha tshi zwi vhona; tshifhaṱuwo tshawe tsha penya sa ḓuvha, zwiambaro zwawe zwa tshena sa tshedza.+
3 Vha vhona Mushe na Elia vha tshi khou amba na Yesu.
4 Petro a amba na Yesu a ri: “Murena, ndi zwavhuḓi ri fhano. Arali u tshi funa, ndi nga atha madennde mararu, ḽiṅwe ḽi ḓo vha ḽau, ḽiṅwe ḽa vha ḽa Mushe, ḽiṅwe ḽa vha ḽa Elia.”
5 Musi a tshi kha ḓi amba, gole ḽi penyaho ḽa vha tiba, ha pfala ipfi ḽi tshi bva kha gole, ḽa ri: “Hoyu ndi Murwa wanga a funwaho, ane nda mu takalela.+ Ni mu thetshelese.”+
6 Musi vhafunziwa vha tshi pfa zwenezwo, vha wela fhasi vha ofha zwihulu.
7 Yesu a ya khavho, a vha kwama, a ri: “Takuwani, ni songo ofha.”
8 Musi vha tshi lavhelesa, vha vhona Yesu fhedzi.
9 Musi vha tshi khou tsa thavhani, Yesu a ri: “Heḽi bono ni songo vhuya na ḽi vhudza muthu u swikela Murwa muthu a tshi vuswa vhafuni.”+
10 Vhafunziwa vha mu vhudzisa vha ri: “Ndi ngani vhamaṅwalo vha tshi ri hu fanela u ḓa Elia u thoma?”+
11 A vha fhindula a ri: “Ndi ngoho uri Elia u khou ḓa, a vusulusa zwithu zwoṱhe.+
12 Naho zwo ralo, ndi a ni vhudza uri Elia o ḓa, fhedzi vha si mu ḓivhe, vha mu ita zwine vha funa.+ Na Murwa muthu vha ḓo mu tambudza.”+
13 Vhafunziwa vhawe vha zwi ṱhogomela uri u khou amba nga ha Yohane Mulovhedzi.
14 Musi vha tshi sendela tsini na gogo,+ muṅwe munna a ḓa kha Yesu, a gwadama phanḓa hawe a ri:
15 “Murena, pfela vhuṱungu murwa wanga ngauri u na tshifakhole, u dzula a tshi wela muliloni na maḓini.+
16 Ndo mu isa kha vhafunziwa vhau, fhedzi a vho ngo kona u mu fhodza.”
17 Yesu a ri: “Inwi vha murafho u si na lutendo na wo tshinyalaho,+ ndi ḓo dzula na inwi u swika lini? Ndi ḓo ni konḓelela u swika lini? Mu ḓiseni ngeno kha nṋe.”
18 Yesu a kaidza dimoni, ḽa bva khae, mutukana a fhola nga tshenetsho tshifhinga.+
19 Ndi hone vhafunziwa vha tshi vhidzela Yesu thungo vha ri: “Ndi ngani ri songo kona u ḽi pandela?”
20 Ene a ri: “Ndi ngauri ni na lutendo luṱuku. Ngoho ndi a ni vhudza uri, arali ni na lutendo lu linganaho na thoro ya luṋonya, no vha ni tshi nga amba na heyi thavha na ri, ‘Ibva hafha, u ye hafhaḽa,’ ya bva, ho vha hu nga si vhe na tshithu tshine tsha nga ni kunda.”+
21 * ——
22 Musi Yesu e na vhafunziwa vhawe ngei Galilea, o amba navho a ri: “Murwa muthu u ḓo kumedzelwa zwanḓani zwa vhathu,+
23 vha ḓo mu vhulaya, a vuswa nga ḓuvha ḽa vhuraru.”+ Zwenezwo zwa vha pfisa vhuṱungu nga maanḓa.
24 Musi vha tshi swika Kapernaume, vhathelisi vha muthelo wa thembele* vha ḓa kha Petro vha ri: “Naa mufunzi wau u a badela muthelo wa thembele?”+
25 A ri: “Ee.” Naho zwo ralo, musi Petro a tshi dzhena nḓuni, Yesu a amba nae a ri: “Simoni, iwe uri mini? Mahosi a ḽifhasi a thelisa vhafhio? Vharwa vhavho kana vhatsinda?”
26 Musi a tshi ri: “Vhatsinda,” Yesu a ri: “Zwi amba uri vharwa a vha theli.
27 Fhedzi uri ri si vha khukhulise,+ iya lwanzheni, u pose tshihuka, khovhe ine wa ḓo thoma u i fasha u i dzhie, musi u tshi vula mulomo wayo, u ḓo wana tshelede ya siḽiva.* U i dzhie uri i vhe muthelo wanga na wau.”
Ṱhaluso dzi re magumoni a siaṱari
^ Thevhedz., “tshelede ya dirakima mbili.” Sedzani Ṱhume. B14.
^ Tshelede ya tetradirakima i lingana na dirakima nṋa. Sedzani Ṱhume. B14.
