Evangeli Ya Mateo 18:1-35
18 Nga tshenetsho tshifhinga, vhafunziwa vha ḓa vha amba na Yesu vha ri: “Ndi nnyi ane a vha muhulwane Muvhusoni wa ṱaḓulu?”+
2 A vhidza ṅwana, a mu imisa vhukati havho
3 a ri: “Ngoho ndi a ni vhudza uri, arali na sa shanduka na nga vhana,+ ni nga si dzhene Muvhusoni wa ṱaḓulu.+
4 Ane a ḓiṱukufhadza u fana na hoyu ṅwana ndi ene muhulwane Muvhusoni wa ṱaḓulu;+
5 ane a ṱanganedza muṅwe wa avha vhana a tshi itela dzina ḽanga, u ṱanganedza na nṋe.
6 Fhedzi ane a khukhulisa muṅwe wa vhenevha vhana vhane vha vha na lutendo kha nṋe, ndi khwine a tshi vhofhelelwa guyo* mukuloni wawe a poswa lwanzheni.+
7 “Khombo shangoni nga nṱhani ha zwikhukhulisi! Naho zwo ralo, zwikhukhulisi zwi fanela u vha hone, fhedzi khombo kha muthu ane tshikhukhulisi tsha ḓiswa ngae!
8 Arali tshanḓa tshau kana mulenzhe wau u tshi u khakhisa, u tumule u u laṱe kule.+ Ndi khwine u wana vhutshilo u si na tshanḓa kana mulenzhe nṱhani ha u poswa muliloni u sa dzimiho u na zwanḓa zwivhili kana milenzhe mivhili.+
9 Zwiṅwe hafhu, arali ḽiṱo ḽau ḽi tshi u khakhisa, ḽi nongole u ḽi laṱe kule. Ndi khwine u wana vhutshilo u na ḽiṱo ḽithihi nṱhani ha u poswa muliloni wa Gehena* u na maṱo mavhili.+
10 Ni songo nyadza muṅwe wa vhenevha vhana, ngauri ndi a ni vhudza uri vharuṅwa vhavho vha re ṱaḓulu, vha dzula vha tshi vhona tshifhaṱuwo tsha Khotsi anga a re ṱaḓulu.+
11 * ——
12 “Ni zwi vhona hani? Arali muthu e na nngu dza 100, iṅwe yadzo ya xela,+ naa a nga si sie dza 99 thavhani, a ya a ṱoḓa yo xelaho?+
13 Arali a i wana, u ḓo i takalela u fhira dziḽa dza 99 dzi songo xelaho.
14 Na Khotsi anga* wa ṱaḓulu ha funi hu tshi lovha na muṅwe wa vhenevha vhana.+
15 “Zwiṅwe hafhu, arali wahau a khakha, iya u mu sumbedze vhukhakhi hawe* ni vhavhili fhedzi.+ Arali a u thetshelesa u ḓo vha wo thusa wahau.+
16 Arali a sa thetshelesa, u vhuyelele khae u na muthu muthihi kana vhavhili uri mafhungo oṱhe a khwaṱhiswe nga ṱhanzi mbili kana tharu.+
17 Arali a sa vha thetshelesa, u ambe na tshivhidzo. Arali a sa thetshelesa tshivhidzo, u mu fare sa muthu wa dzitshaka+ na muthelisi.+
18 “Ngoho ndi a ni vhudza uri, zwine na zwi vhofha kha ḽifhasi zwi ḓo vha zwo no vhofhiwa ngei ṱaḓulu, zwine na zwi vhofholola kha ḽifhasi zwi ḓo vha zwo no vhofhololwa ngei ṱaḓulu.
19 Zwiṅwe hafhu, ngoho ndi a ni vhudza uri, arali vhavhili fhano kha ḽifhasi vha tendelana kha tshithu naho tshi tshifhio tsha ndeme tshine vha fanela u tshi humbela, vha ḓo ṋewa hu u itela Khotsi anga a re ngei ṱaḓulu.+
20 Ngauri hune ha kuvhangana vhavhili kana vhararu nga dzina ḽanga,+ na nṋe ndi vhukati havho.”
21 Petro a ḓa a amba nae a ri: “Murena, musi wahashu a tshi nkhakhela ndi mu hangwele lungana? Naa ndi mu hangwele lwa sumbe?”
22 Yesu a mu fhindula a ri: “U songo mu hangwela lwa sumbe fhedzi, u mu hangwele lwa 77.+
23 “Ndi ngazwo ndi tshi ri Muvhuso wa ṱaḓulu u nga fanyiswa na khosi ye ya vha i tshi ṱoḓa u dzudzanya zwikolodo na vhalanda vhayo.
24 Musi i tshi thoma u zwi dzudzanya, ha ḓiswa we a vha a tshi khou i koloda talente dza 10 000.*
25 Nge a vha a si na tsha u lifha ngatsho, muṋe wawe a amba uri a rengiswe na mufumakadzi wawe na vhana vhawe na zwoṱhe zwe a vha e nazwo uri tshikolodo tshi lifhiwe.+
26 Onoyo mulanda a mu losha,* a ri, ‘U songo mphelela mbilu, ndi ḓo u lifhela zwoṱhe.’
27 Nge khosi ya mu pfela vhuṱungu, ya litsha uḽa mulanda, ya phumula mulandu wawe.+
28 Fhedzi onoyo mulanda a tshi bva henefho a ṱangana na muṅwe mulanda we a vha a tshi mu koloda dinari* dza 100, a mu fara, a mu tzhipa, a ri, ‘Nndifhele zwoṱhe zwine wa nkoloda.’
29 Onoyo mulanda a gwadama a mu luvhelela a ri, ‘U songo mphelela mbilu, ndi ḓo u badela.’
30 Ene a hana, fhedzi a laedza uri a valelwe dzhele u swikela a tshi mu lifhela tshikolodo tshawe.
31 Musi vhaṅwe vhalanda vha tshi vhona zwe zwa itea, vha ṱungufhala zwihulu, vha ya vha vhudza khosi zwe zwa itea.
32 Khosi ya mu vhidza ya amba nae ya ri: ‘Mulanda muvhi ndi iwe, ndo phumula zwikolodo zwau zwoṱhe musi u tshi nkhumbela.
33 Ndi ngani u songo khathutshela muṅwe mulanda samusi na nṋe ndo u khathutshela?’+
34 Khosi ya sinyuwa nga maanḓa, ya mu isa dzhele, uri a vhuye a lifhe tshikolodo tshawe.
35 Khotsi anga wa ṱaḓulu u ḓo ni ita zwi fanaho na zwenezwo+ arali ni sa hangweli wahaṋu zwi tshi bva mbiluni.”+
Ṱhaluso dzi re magumoni a siaṱari
^ Kana “guyo ḽine ḽa moniswa nga donngi.”
^ Sedzani Mutevhe Wa Ṱhalutshedzo Ya Maipfi.
^ Kana khamusi, “aṋu.”
^ Thevhedz., “iya u mu kaidze.”
^ Talente dza siḽiva dza 10 000 dzi lingana na dinari dza 60 000 000. Sedzani Ṱhume. B14.
^ Kana “gwadama.”
^ Sedzani Ṱhume. B14.
