Evangeli Ya Mateo 2:1-23
2 Musi Yesu o no bebiwa ngei Betlehema+ shangoni ḽa Yudea, hu tshi khou vhusa Khosi Herode,*+ vhaḓivhi vha ṋaledzi* vha bvaho Vhubvaḓuvha vho ḓa Yerusalema,
2 vha ri: “Khosi yo bebiwaho ya Vhayuda i ngafhi?+ Ngauri ro vhona ṋaledzi yayo ri Vhubvaḓuvha, zwino ro ḓa u i losha.”*
3 Musi Khosi Herode na vhoṱhe vha re Yerusalema vha tshi pfa zwenezwi vha tshuwa.
4 Musi Herode o no kuvhanganya vhahulwane vhoṱhe vha vhotshifhe na vhamaṅwalo, a vha vhudzisa he Kristo* a vha a tshi ḓo bebelwa hone.
5 Vha mu fhindula vha ri: “Betlehema+ kha ḽa Yudea, ngauri muporofita o ṅwala a ri:
6 ‘Iwe Betlehema shango ḽa Yuda, vhavhusi vhoṱhe vha Yuda vha songo u dzhiela fhasi, ngauri kha iwe hu ḓo bebiwa muvhusi ane a ḓo lisa vhathu vhanga vha Isiraele.’”+
7 Herode a vhidzela tshiphirini vhaḓivhi vha ṋaledzi, a vha vhudzisa nga ha tshifhinga tshee ṋaledzi ya thoma u vhonala ngatsho.
8 Musi a tshi vha ruma Betlehema o ri: “Tshimbilani ni ṱoḓe hune ṅwana a vha hone, musi no no mu wana ni mmbudze, uri na nṋe ndi ye ndi mu loshe.”
9 Vha ṱuwa musi vho no pfa zwe khosi ya amba, ṋaledzi ye vha i vhona musi vhe Vhubvaḓuvha+ ya vha ranga phanḓa u swika i tshi ima hune ṅwana a vha hone.
10 Vha takala zwihulu musi vha tshi vhona ṋaledzi yo ima.
11 Musi vha tshi dzhena nḓuni, vha vhona ṅwana e na Maria mme awe, vha wa nga magona vha mu losha. Vha bvisa na madzanga avho, vha mu ṋea zwifhiwa zwa musuku na zwioro zwitshena na mira.
12 Vha vhuyelela shangoni ḽa havho nga iṅwe nḓila, ngauri Mudzimu o vha sevha muḽoroni+ uri vha songo vhuyelela kha Herode.
13 Musi vho no ṱuwa, Yosefa a vhona muruṅwa wa Yehova* muḽoroni,+ a tshi ri: “Takuwa u dzhie ṅwana na mme awe u shavhele Egipita, u dzule henengei u swika ndi tshi u vhudza uri u vhuye, ngauri hu si kale Herode u ḓo ṱoḓa ṅwana uri a mu vhulaye.”
14 Yosefa a vuwa vhusiku a dzhia ṅwana na mme awe, vha ya Egipita.
15 A dzula henengei u swika Herode a tshi fa. Ha itea zwe zwa ambiwa nga Yehova* a tshi shumisa muporofita wawe, we a ri: “Ndo vhidza murwa wanga e ngei Egipita.”+
16 Musi Herode a tshi vhona uri vhaḓivhi vha ṋaledzi vho mu fhura, a sinyuwa zwihulu, a ruma vhaḓinḓa uri vha vhulaye vhatukana vhoṱhe vha re na miṅwaha mivhili u ya fhasi vha ngei Betlehema na zwiṱirikini zwawo zwoṱhe, u tendelana na tshifhinga tshee tsha ambiwa nga vhaḓivhi vha ṋaledzi.+
17 Ha itea zwo ambiwaho nga muporofita Yeremia, we a ri:
18 “Ho pfala mukosi ngei Rama, mukosi wa tshililo tshihulu. Ho vha hu Rahele+ a tshi khou lilela vhana vhawe ngauri a vha tsheeho, o vha a sa ṱoḓi u fhumudzwa.”+
19 Musi Herode o no fa, Yosefa a vhona muruṅwa wa Yehova* muḽoroni+ musi e ngei Egipita,
20 a tshi ri: “Vuwa u dzhie ṅwana na mme awe u ye shangoni ḽa Isiraele, ngauri vhane vha ṱoḓa u vhulaya ṅwana vho fa.”
21 A vuwa a dzhia ṅwana na mme awe, a ya shangoni ḽa Isiraele.
22 A ofha u ya Yudea musi a tshi pfa uri Arikelao u khou vhusa henefho vhudzuloni ha khotsi awe Herode. A ya shangoni ḽa Galilea+ ngauri Mudzimu o vha o mu sevha.+
23 A dzula muḓini wa Nazaretha+ uri hu itee zwo ambiwaho nga vhaporofita vha tshi ri: “U ḓo pfi Munazaretha.”*+
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Kana “vhaṱali.”
^ Kana “gwadamela.”
^ Kana “Messia; Muḓodzwa.”
^ Khamusi ḽi bva kha mubulo wa Tshihevheru “lutavhi.”
