Evangeli Ya Mateo 28:1-20
28 Nga murahu ha Savhatha, nga matsheloni nga ḓuvha ḽa u thoma ḽa vhege,* Maria Magdalena na muṅwe Maria vha ya u ṱolela vhiḓa.+
2 Musi vha tshi swika vha ṱhogomela uri ho vha hu na mudzinginyo muhulu ngauri muruṅwa wa Yehova* o tsa a tshi bva ṱaḓulu, a phigulusela kule tombo ḽo valaho vhiḓa, a dzula khaḽo.+
3 Onoyo muruṅwa o vha a tshi penya sa lupenyo, zwiambaro zwawe zwo vha zwo tshena sa mahaḓa.+
4 Musi vhalindi vha tshi mu vhona vha tetemela, vha dzidzivhala nga nyofho.
5 Muruṅwa a amba na vhaḽa vhafumakadzi a ri: “Ni songo ofha, ndi a zwi ḓivha uri ni khou ṱoḓa Yesu we a vha o ombelwa kha danda.+
6 Haho fhano, samusi o vha o amba, o vuswa.+ Iḓani ni vhone fhethu he a vha o vhulungwa hone.
7 Ṱavhanyani ni ye ni vhudze vhafunziwa vhawe uri o vuswa vhafuni, u khou ya Galilea.+ Ni ḓo mu vhona henengei. Ni songo hangwa zwe nda ni vhudza.”+
8 Vha ṱuwa henefho vhiḓani nga u ṱavhanya, vho tshuwa, vho takala vhukuma, vha gidima vha ya u vhudza vhafunziwa vhawe.+
9 Yesu a ṱangana navho a ri: “Ri a vusa!” Vha sendela tsini vha mu fara milenzhe vha mu losha.*
10 Yesu a amba navho a ri: “Ni songo ofha! Iyani ni vhudze vhafunziwa vhanga uri vha ye Galilea, ri ḓo ṱangana henengei.”
11 Musi vhe nḓilani, vhaṅwe vhalindi+ vha ya muḓini vha vhudza vhahulwane vha vhotshifhe zwithu zwoṱhe zwe zwa itea.
12 Vhotshifhe vha kuvhangana na vhahulwane vha langana, vha ṋea maswole tshelede* nnzhi,
13 vha ri: “Ni ri, ‘Vhafunziwa vhawe vho ḓa vha mu tswa vhusiku ro eḓela.’+
14 Ni songo vhilaela, arali muvhusi a zwi pfa, ri ḓo amba nae.”
15 Vhalindi vha dzhia yeneyo tshelede,* vha ita zwe vha vhudzwa. Enea mafhungo o phaḓaladzwa kha Vhayuda u swika na ṋamusi.
16 Naho zwo ralo, vhafunziwa vha 11 vha ya Galilea+ thavhani ye Yesu a vha o vha vhudza uri vha ḓo ṱangana nae khayo.+
17 Musi vha tshi mu vhona vha mu losha,* fhedzi vhaṅwe vha timatima.
18 Yesu a sendela a amba navho a ri: “Ndo ṋewa maanḓa oṱhe ngei ṱaḓulu na kha ḽifhasi.+
19 Nga zwenezwo, iyani ni ite vhathu vha tshaka dzoṱhe vhafunziwa,+ ni vha lovhedze+ dzinani ḽa Khotsi na ḽa Murwa na ḽa muya mukhethwa,
20 ni vha funze u ita zwoṱhe zwe nda ni vhudza.+ Ni songo hangwa uri ndi na inwi misi yoṱhe u swika vhufheloni ha shango.”*+
Ṱhaluso dzi re magumoni a siaṱari
^ Ndi Swondaha. Kha Vhayuda ḽo vha ḽi ḓuvha ḽa u thoma ḽa vhege.
^ Kana “vha gwadama.”
^ Thevhedz., “shekele dza siḽiva.”
^ Thevhedz., “shekele dza siḽiva.”
^ Kana “vha gwadama.”
^ Sedzani Mutevhe Wa Ṱhalutshedzo Ya Maipfi.
