Evangeli Ya Mateo 3:1-17
3 Misini yeneyo Yohane+ Mulovhedzi a ḓa a huwelela+ sogani ḽa Yudea,
2 a ri: “Rembuluwani, ngauri Muvhuso wa ṱaḓulu u tsini.”+
3 Hoyu ndi we muporofita Yesaya+ a amba nga hae a ri: “Hu na muthu ane a khou vhidzelela e sogani, u ri: ‘Lugisani nḓila ya Yehova!* Kunakisani nḓila dzawe.’”+
4 Yohane o vha o ambara zwiambaro zwo itwaho nga mamvele a gamela, o vhofha khundu nga bannda ḽa mukumba.+ O vha a tshi ḽa nzie na mutoli.+
5 Vhathu vha Yerusalema na vhoṱhe vha Yudea na vha thungo dzoṱhe dza Yorodane vho vha vha tshi khou ya khae,+
6 vha tshi ḓibula zwivhi, a tshi vha lovhedza* Mulamboni wa Yorodane.+
7 Musi a tshi vhona Vhafarisei na Vhasadukei+ vhanzhi vha tshi khou ḓa ndovhedzoni, a amba navho a ri: “Inwi vhana vha mavuluvulu,+ ndi nnyi o ni vhudzaho uri ni ḓo ponyoka khaṱhulo yo ni lindelaho?+
8 Aṋwani mitshelo i sumbedzaho uri no rembuluwa.
9 Ni songo ḓifhura na amba uri: ‘Khotsi ashu ndi Abrahamu.’+ Ngauri ndi a ni vhudza uri, Mudzimu u a kona u itela Abrahamu vhana nga haya matombo.
10 Mbaḓo yo no vhewa tsindeni ḽa muri. Miri yoṱhe i sa aṋwiho mitshelo yavhuḓi i ḓo remiwa ya poswa muliloni.+
11 Nṋe ndi khou ni lovhedza maḓini ngauri no rembuluwa,+ fhedzi ane a khou ḓa murahu hanga u na maanḓa u mphira, a thi fanelei u bvula thovho* dzawe.+ Onoyo u ḓo ni lovhedza nga muya mukhethwa+ na nga mulilo.+
12 O fara tsha u fhefhera, u ḓo kunakisa fhethu hune ha fhefherelwa hone, goroi a i kuvhanganyela ḓuluni, fhedzi mungu u ḓo u fhisa nga mulilo+ u sa dzimi.”
13 Yesu a bva Galilea a ya Yorodane uri a lovhedzwe nga Yohane.+
14 Fhedzi Yohane a lingedza u mu thivhela, a ri: “Naa wo ḓa u lovhedzwa nga nṋe? Ndi nṋe ane a fanela u lovhedzwa nga iwe.”
15 Yesu a mu fhindula a ri: “U songo nthivhela, ngauri nga yeneyi nḓila ri vha ri tshi khou ita zwoṱhe zwo lugaho.” A kona u tenda.
16 Musi Yesu o no lovhedzwa, a bva maḓini; ḽiṱaḓulu ḽa vulea,+ a vhona muya wa Mudzimu u tshi tsa u tshi ḓa khae u tshi nga ḽiivha.+
17 Ha pfala na ipfi ḽi bvaho ṱaḓulu+ ḽi tshi ri: “Hoyu ndi Murwa wanga,+ ane nda mu funa, ane nda mu takalela.”+
