Evangeli Ya Mateo 4:1-25
4 Ndi hone muya mukhethwa u tshi isa Yesu sogani uri a lingwe+ nga Diabolo.+
2 Musi o no ḓidzima zwiḽiwa lwa maḓuvha a 40 na vhusiku hao, a farwa nga nḓala.
3 Diabolo+ a ḓa a mu linga a ri: “Arali u murwa wa Mudzimu, amba na haya matombo a shanduke a vhe zwiḽiwa.”*
4 A fhindula a ri: “Ho ṅwaliwa u pfi: ‘Muthu ha tshili nga zwiḽiwa* fhedzi, u tshila na nga maipfi oṱhe a bvaho mulomoni wa Yehova.’”*+
5 Diabolo a mu isa muḓini mukhethwa,*+ a mu imisa kha ṱhanga* ya thembele+
6 a amba nae a ri: “Arali u murwa wa Mudzimu, ḓipose fhasi, ngauri ho ṅwaliwa u pfi: ‘Mudzimu u ḓo vhudza vharuṅwa vhawe uri vha u takule nga zwanḓa zwavho, uri u si khukhulwe nga tombo.’”+
7 Yesu a ri: “Ho ṅwaliwa u pfi: ‘U songo linga Yehova* Mudzimu wau.’”+
8 Diabolo a dovha a mu isa kha thavha ndapfu-ndapfu, a mu sumbedza mivhuso yoṱhe ya shango na vhugala hayo.+
9 A amba nae a ri: “Hezwi zwoṱhe ndi ḓo u ṋea arali wa gwadama wa nthabela.”
10 Yesu a ri: “Ṱuwa Saṱhane! Ngauri ho ṅwaliwa u pfi: ‘U tea u rabela Yehova* Mudzimu wau,+ u shumele ene fhedzi.’”+
11 Ndi hone Diabolo a tshi ṱutshela Yesu,+ vharuṅwa vha ḓa vha mu ṱhogomela.+
12 Musi Yesu a tshi pfa uri Yohane o farwa,+ a ya Galilea.+
13 Zwiṅwe hafhu, musi o no ṱuwa Nazaretha, a ya a dzula Kapernaume+ tsini na lwanzhe lu re zwiṱirikini zwa Sebuloni na Nafutali,
14 uri hu itee zwe zwa ambiwa nga muporofita Yesaya, a tshi ri:
15 “Iwe shango ḽa Sebuloni na shango ḽa Nafutali, nḓilani i re tsini na lwanzhe, seli ha Mulambo wa Yorodane hune ha vha Galilea ḽa dzitshaka!
16 Vhathu vho dzulaho swiswini vho vhona tshedza tshihulu, vhane vha dzula dzinguni ḽa lufu vho vhonetshelwa nga tshedza.”+
17 U bva nga tshenetsho tshifhinga, Yesu a thoma u huwelela a ri: “Rembuluwani, ngauri Muvhuso wa ṱaḓulu u tsini.”+
18 Musi a tshi khou tshimbila tsini na Lwanzhe lwa Galilea, a vhona Simoni a vhidzwaho Petro+ na Andrea vhane vha vha murathu na mukomana, vha tshi khou posa mambule lwanzheni, ngauri vho vha vhe vharei vha khovhe.+
19 A amba navho a ri: “Ntevheleni, ndi ḓo ni ita vharei vha vhathu.”+
20 Vha sia mambule avho vha mu tevhela.+
21 A tshi bva henefho, a dovha a vhona vhaṅwe vhanna vhavhili vha re murathu na mukomana, Yakobo murwa wa Sebedeo na murathu wawe Yohane.+ Vha tshikepeni na Sebedeo khotsi avho, vha tshi khou luka mambule avho, a vha vhidza.+
22 Vha sia tshikepe na khotsi avho, vha mu tevhela.
23 A tshimbila u mona na ḽoṱhe ḽa Galilea,+ a tshi funza sinagogoni+ dzavho na u huwelela mafhungo maḓifha a Muvhuso na u fhodza vhathu malwadze oṱhe.+
24 Shangoni ḽoṱhe ḽa Siria ha ambiwa nga hae, vha ḓisa vhathu vhoṱhe vha re na malwadze o fhambanaho na maṱungu,+ vha re na madimoni+ na vha lwalaho tshifakhole+ na vho omaho lurumbu, a vha fhodza.
25 Nga nṱhani ha zwenezwo, gogo ḽa mu tevhela ḽi tshi bva Galilea na Dikapoli* na Yerusalema na Yudea na seli ha Yorodane.
Ṱhaluso dzi re magumoni a siaṱari
^ Thevhedz., “vhurotho.”
^ Thevhedz., “vhurotho.”
^ Kana “fhethu hu re nṱhesa.”
^ Ndi Yerusalema.
^ Kana “Miḓi ya Fumi.”
