Evangeli Ya Mateo 6:1-34
6 “Ni ṱhogomele uri ni si ḓiite vho lugaho phanḓa ha vhathu;+ arali na ita nga u ralo, Khotsi aṋu wa ṱaḓulu ha nga ni fhaṱutshedzi.
2 Musi ni tshi ya u ṋekedza zwifhiwa zwa khathutshelo,* ni songo thoma nga u lidza phalaphala, sa zwine zwa itwa sinagogoni na nḓilani nga vhane vha vha na muhoyo uri vha rendwe nga vhathu. Ngoho ndi a ni vhudza uri vho no wana malamba avho nga vhuḓalo.
3 Musi inwi ni tshi ṋekedza zwifhiwa zwa khathutshelo, tshanḓa tshaṋu tsha monde tshi songo ḓivha zwine zwa itwa nga tsha u ḽa,
4 uri zwifhiwa zwaṋu zwa khathutshelo zwi vhe zwa tshiphiri. Ndi hone Khotsi aṋu ane a vhona zwa tshiphirini a tshi ḓo ni fhaṱutshedza.+
5 “Musi ni tshi rabela, ni songo fana na vhane vha vha na muhoyo,+ ngauri vha takalela u rabela vho ima sinagogoni na mafhandeni a nḓila uri vha vhonwe.+ Ngoho ndi a ni vhudza uri vho no wana malamba avho nga vhuḓalo.
6 Inwi ni tshi rabela ni dzhene kamarani ni vale vothi, ni rabele Khotsi aṋu a sa vhonali.+ Ndi hone Khotsi aṋu ane a vhona zwa tshiphirini a tshi ḓo ni fhaṱutshedza.
7 Musi ni tshi rabela, ni songo dovholola zwithu zwithihi lunzhi-lunzhi sa vhathu vha dzitshaka, ngauri vha humbula uri vha ḓo pfiwa nga u amba maipfi manzhi-manzhi.
8 Ni songo vha edzisa, ngauri Khotsi aṋu u a ḓivha zwine na ṱoḓa+ na musi ni sa athu u mu humbela.
9 “Musi ni tshi rabela ni ri:+
“‘Khotsi ashu wa ṱaḓulu, dzina ḽau+ nga ḽi vhe ḽikhethwa.*+
10 Muvhuso+ wau u ḓe. Zwine wa zwi funa+ nga zwi itwe fhano kha ḽifhasi+ vhunga zwi tshi itwa ngei ṱaḓulu.
11 U ri ṋee zwiḽiwa* zwa ṋamusi,+
12 u ri hangwele milandu yashu vhunga na riṋe ri tshi hangwela vho ri khakhelaho.+
13 U songo ri isa milingoni,+ fhedzi u ri tsireledze* kha muvhi.’+
14 “Arali ni tshi hangwela vhathu zwe vha tshinya, na Khotsi aṋu wa ṱaḓulu u ḓo ni hangwela;+
15 arali ni sa hangweli vhathu zwe vha tshinya, na Khotsi aṋu wa ṱaḓulu ha nga ni hangweli.+
16 “Musi ni tshi ḓidzima zwiḽiwa,+ ni litshe u ṱungufhala sa vhane vha vha na muhoyo, ngauri vha a sinyalala uri vha vhonwe uri vha khou ḓidzima.+ Ngoho ndi a ni vhudza uri vho no ḓi wana malamba avho nga vhuḓalo.
17 Musi ni tshi ḓidzima, ni ḓole mapfura kha ṱhoho, ni ṱambe khofheni
18 uri vhathu vha si zwi vhone uri ni khou ḓidzima, fhedzi ni vhonwe nga Khotsi aṋu a sa vhonali. Ndi hone Khotsi aṋu ane a vhona zwa tshiphirini a tshi ḓo ni fhaṱutshedza.
19 “Litshani u kuvhanganya lupfumo fhano kha ḽifhasi,+ hune lwa ḽiwa nga muṱwa* na nga rosi na hune mbava dza kwasha dza tswa.
20 Nṱhani hazwo, kuvhanganyani lupfumo ngei ṱaḓulu,+ hune lwa sa ḓo ḽiwa nga muṱwa* na rosi+ na hune mbava dzi si kwashe dza tswa.
21 Ngauri hune lupfumo lwaṋu lwa vha hone, ndi hune mbilu yaṋu ya ḓo vha hone.
22 “Ḽiṱo+ ndi tshedza tsha muvhili. Arali ḽiṱo ḽaṋu ḽi tshi vhona zwavhuḓi, na muvhili waṋu woṱhe u ḓo vha na tshedza.
23 Fhedzi arali ḽiṱo ḽaṋu ḽi ḽivhi,+ na muvhili waṋu woṱhe u ḓo vha na swiswi. Arali tshedza tshi re kha inwi tsho no vha swiswi, ḽeneḽo swiswi ḽi ḓo vha ḽihulu vhukuma.
24 “A hu na ane a nga shumela vhaṋe vhavhili; ngauri u ḓo vhenga muṅwe a funa muṅwe+ kana a nambatela muṅwe a nyadza muṅwe. Ni nga si kone u shumela Mudzimu na Lupfumo.+
25 “Ngauralo, ndi ri litshani u vhilaela+ uri ni ḓo ḽa mini kana ni ḓo nwa mini kana ni ḓo ambara mini.+ Naa vhutshilo a si ha ndeme u fhira zwiḽiwa? Muvhili a si wa ndeme u fhira zwiambaro kani?+
26 Lavhelesani zwiṋoni nga vhuronwane;+ a zwi zwali mbeu, a zwi kaṋi kana u kuvhanganyela maḓuluni. Naho zwo ralo, Khotsi aṋu wa ṱaḓulu u a zwi ṋea zwiḽiwa. Naa a ni vha ndeme u zwi fhira?
27 Naa u vhilaela zwi nga ita uri ni tshile tshifhinga tshilapfu?+
28 Ndi ngani ni tshi vhilaela nga ha zwiambaro? Gudani kha maluvha a masimuni, nḓila ine a aluwa ngayo; ha shumi, ha luki tshithu;
29 fhedzi ndi a ni vhudza ndi ri, naho Salomo+ o vha o pfuma vhukuma, o vha a sa ambari u fana na ḽiṅwe ḽa eneo maluvha.
30 Arali Mudzimu a tshi ambadza zwimela zwa ḓaka zwine zwa vha hone ṋamusi, matshelo zwa poswa muliloni, naa inwi ha nga ni ambadzi u fhira zwenezwo zwimela? Ndi ngani ni na lutendo luṱuku?
31 Ni songo vhuya na vhilaela+ na ri, ‘Ri ḓo ḽa mini?’ kana ‘Ri ḓo nwa mini?’ kana ‘Ri ḓo ambara mini?’+
32 Ngauri zwenezwi zwoṱhe ndi zwithu zwine vha dzitshaka vha zwi ṱoḓesa. Khotsi aṋu wa ṱaḓulu u a zwi ḓivha uri ni ṱoḓa zwenezwi zwithu zwoṱhe.
33 “Dzulani ni tshi ṱoḓa Muvhuso wa Mudzimu na u luga hawe u thoma, zwiṅwe zwithu zwoṱhe ni ḓo engedzwa ngazwo.+
34 Ni songo vhuya na vhilaela zwa matshelo,+ ngauri ḽa matshelo ḽi ḓo vha na mbilaelo dzaḽo. Humbulani nga thaidzo dza ṋamusi fhedzi.
Ṱhaluso dzi re magumoni a siaṱari
^ Kana “zwifhiwa zwine zwa ṋewa vhashai.” Sedzani Mutevhe Wa Ṱhalutshedzo Ya Maipfi.
^ Kana “ḽi itwe ḽikhethwa.”
^ Thevhedz., “vhurotho.”
^ Kana “tshidze.”
^ Kana “mutshenzhe.”
^ Kana “mutshenzhe.”
