Evangeli Ya Mateo 8:1-34
8 Musi o no tsa nṱha ha thavha, gogo ḽa mu tevhela.
2 Ha ḓa munna wa mapele a mu losha* a ri: “Murena, arali u tshi funa, u nga mphodza.”+
3 Yesu a isa tshanḓa a mu kwama, a ri: “Ndi a funa, fhola.”+ Mapele a fhola nga u ṱavhanya.+
4 Yesu a amba nae a ri: “U songo vhudza muthu,+ fhedzi tshimbila u ye kha tshifhe a u vhone,+ u ṋekedze tshifhiwa tshe Mushe a ri tshi ṋekedzwe+ u itela u sumbedza uri wo kuna.”
5 Musi a tshi dzhena Kapernaume, muhulwane wa maswole a ḓa khae, a mu humbela+
6 a ri: “Muṋe wanga, mushumeli wanga o lala nḓuni ngauri o oma lurumbu, u khou vhaisala nga maanḓa.”
7 Yesu a amba nae a ri: “Ndi ḓo mu fhodza musi ndi tshi swika henengei.”
8 Muhulwane wa maswole a fhindula a ri: “Muṋe wanga, amba fhedzi uri mushumeli wanga a fhole, ngauri a thi fanelei uri u dzhene nḓuni yanga.
9 Na nṋe ndi muthu a vhuswaho, fhedzi ndi na maswole ane nda a vhusa, ndi amba na uyu nda ri, ‘Ṱuwa!’ a ṱuwa, nda amba na muṅwe nda ri, ‘Iḓa!’ a ḓa, nda amba na mulanda wanga nda ri, ‘Ita itshi!’ a ita.”
10 Musi Yesu a tshi pfa zwenezwo a mangala, a amba na vha mu tevhelaho a ri: “Ngoho ndi a ni vhudza uri, a thi athu u wana muthu a re na lutendo lungafha kha ḽa Isiraele.+
11 Ndi a ni vhudza ndi ri, vhathu vhanzhi vha ḓo ḓa vha ḽa zwiḽiwa na Abrahamu na Isaka na Yakobo Muvhusoni wa ṱaḓulu vha tshi bva vhubvaḓuvha na vhukovhela;+
12 ngeno vharwa vha Muvhuso vha tshi ḓo poswa nnḓa swiswini. Henefho ndi hune vha ḓo lila na u shenganya maṋo.”+
13 Yesu a amba na muhulwane wa maswole a ri: “Tshimbila ngauri u na lutendo, zwe wa humbela kha zwi itee.”+ Mushumeli a fhola nga tshenetsho tshifhinga.+
14 Yesu a tshi dzhena nḓuni ya Petro, a wana mme a mufumakadzi+ wa Petro o eḓela ngauri o vha o farwa nga mukhushwane.+
15 A mu fara tshanḓa+ a fhola, a vuwa a vha itela zwiḽiwa.
16 Musi ho no vha madekwana, vha mu ḓisela vhathu vhanzhi vha re na madimoni; a a pandela nga u tou amba nao, a fhodza vhoṱhe vha lwalaho,
17 uri hu itee zwe zwa ambiwa nga muporofita Yesaya, a tshi ri: “O hwala malwadze ashu na maṱungu ashu.”+
18 Musi Yesu a tshi vhona vhathu vhanzhi vho mu kuvhanganela, a amba navho uri vha wele seli.+
19 Muṅwe wa vhamaṅwalo a ḓa khae a ri: “Mufunzi, ndi ḓo u tevhela hoṱhe hune wa ya.”+
20 Yesu a ri: “Phunguwe dzi na milindi, na zwiṋoni zwi na zwiṱaha, fhedzi Murwa muthu ha na nnḓu.”*+
21 Muṅwe wa vhafunziwa vhawe a amba nae a ri: “Murena, ntendele ndi thome ndi ye u vhulunga khotsi anga.”+
22 Yesu a ri: “Ntevhele, litsha vhafu vha vhulunge vhafu vhavho.”+
23 Musi a tshi ṋamela tshikepe, vhafunziwa vhawe vha mu tevhela.+
24 Ha vuwa ḓumbu ḽihulu lwanzheni, lwe tshikepe tsha ṱoḓou u tibedzwa nga magabelo; fhedzi Yesu o vha o eḓela.+
25 Vhafunziwa vhawe vha ḓa vha mu vusa, vha ri: “Murena ri tshidze, ri khou fa!”
26 A amba navho a ri: “Ni khou ofha mini, ndi ngani ni na lutendo luṱuku?”+ A vuwa a kaidza ḓumbu na lwanzhe, ha dzika.+
27 Vhafunziwa vhawe vha mangala vha ri: “Ndi muthu-ḓe onoyu? Ḓumbu na lwanzhe zwi a mu thetshelesa.”
28 Musi a tshi wela seli, a swika dzinguni ḽa Gadara, a ṱangana na vhanna vhavhili vha re na madimoni vha tshi khou bva mavhiḓani.+ Vho vha vha tshi ofhisa, hu si na ane a fhira nga yeneyo nḓila.
29 Vha ṱavha mukosi vha ri: “Wo ḓela mini iwe Murwa wa Mudzimu?+ Naa wo ḓela u ri shengedza+ tshifhinga tsho vhewaho tshi sa athu u swika?”+
30 Ho vha hu na nguluvhe dzi tshi khou ḽa kulenyana.+
31 Madimoni a mu humbela a ri: “Arali wa ri pandela, u ri rumele kha dzinguluvhe.”+
32 Yesu a amba nao a ri: “Tshimbilani!” Madimoni a bva a dzhena kha nguluvhe, dza gidimela luwani dza wela lwanzheni, dza fela henefho.
33 Vhalisa vha shavha, vha tshi swika muḓini vha amba zwoṱhe zwe zwa itea, u katela na mafhungo a vhanna vha re na madimoni.
34 Vhathu vhoṱhe muḓini vha bva vha ya u ṱangana na Yesu, vha tshi mu vhona, vha mu humbela uri a ṱuwe dzinguni ḽavho.+
